Mukuru wa yandja ouyara kovandu okuhungira kuna ye nokumuraera oumune wawo okupitira mongumbiro. Omuprofete David wa kumba kutja, “Ove ngu u zuvira ozongumbiro. Ovandu koṋa akuhe mave ya kOve.” (Epsalme 65:2) Nungwari matu yenene vi okukumba kutja tu zuvirwe nokuyakurwa i Mukuru?

Ongumbiro yoye mai ku vatere okuraera omaumba woye aehe ku Mukuru. (Epsalme 62:8) Mukuru Omunamasaaehe u nonyuṋe mozongumbiro nḓe kumbwa okuza komutima tjiri.

Nandarire kutja Mukuru u nomaisaneno omengi wondjozikiro, eye u nena re omuini. Ombeibela i tja: “Ove erike, ngu nena indi Jehova.” (Epsalme 83:19, EEP) Ena ndi Jehova ri munika povikando ape 7 000 momatjangwa omakuru wOmbeibela. Ovaprofete ovengi aave ungurisa ena ra Mukuru mongumbiro. Abraham wa tja: “Jehova, arikana, . . . ndji yandjera mbi hungire komurungu kuna ove.” (Genesis 18:30, NW) Eṱe wina matu sokuungurisa ena ra Mukuru indi Jehova mongumbiro.

Mukuru u tjiwa omeripura noumune wetu kainatja kutja matu hungire eraka riṋe. Embo re re tu kwizikira kutja, “Ndjambi u vara ovandu avehe pu pe ṱeki pamwe. Eye u yakura omundu auhe ngu nondira ku Ye, nu ngu tjita ousemba, nangarire kutja eye owotjiwaṋa kaaṋi ho.”—Oviungura 10:34, 35.

Posi yokutja, kutja Mukuru me tu yakure, matu hepa okutjita ovingi pendje nokukumba uriri. Motupa tu matu kongorere ko, matu ke rihonga imbi mbi matu hepa okutjita.