1. Matu rihongo tjike okuza komambo wOmbara Salomo nge ri mOmuzuvarise 7:20?

 OMBARA Salomo ya tjanga nai: “Kape nomundu omusemba kombanda yehi ngu tjita ouwa porwawo, nu ngu ha tjiti ouvi wina.” (Omuzuv. 7:20) Omambo ngo tjiri ouatjiri. Atuhe tu tjita ouvi. (1 Joh. 1:8) Ku nao, atuhe tu hepa ondjesiro okuza ku Mukuru na kovandu varwe.

2. Hapo ove u fula vi indu epanga roye ropopezu tji re ku isire?

² Mo zemburuka eyuva ndi wa hihamisa epanga roye ropopezu? Ove mape ya wa ningira ondjesiro ku ye, mena rokutja oo vanga kutja mu rire omapanga rukwao. Hapo wa fula vi indu epanga roye tji re ku isira okuza komutima? Otjiperi kutja wa uta okufula nawa.

3. Matu kahungirira ku ye morupa ndwi?

³ Tu vanga kutja Jehova ma rire Epanga retu ropopezu, posi ya povikando tjiva tu hungira otjiṋa poo tu tjita otjiṋa tji mape ya atji mu hihamisa. Matu tjiwa vi kutja Jehova u vanga okutuisira? Pe nombangu yaye pokati komuano Jehova me tu isira nomuano mbu tu isira ovandu varwe? Nu hapo Mukuru u isira ovangendu?

4. Ongwaye tji tu nongamburiro yokutja Jehova u vanga okutuisira?

⁴ Ombeibela i raisa oukahu kutja Jehova u vanga okutuisira.  Indu Jehova tje ritjiukisa omuini ku Moses kOndundu Sinai okupitira momuengeli, eye wa tja: “Muhona, Muhona, ongu ri Ndjambi ngu ri omunaunyaṋutima nomunatjari, ngu nomuretima, nu ngwa tumba otjari nouṱakame. Eye ongu ma ṱakamisire omayovi otjari tje, nongu ma isire ouhasemba nozongatukiro nouvi.” (Eks. 34:6, 7) Jehova oMukuru wotjari nounyaṋutima, ngu vanga okuisira imba mbe ritanaura komauvi wawo.—Neh. 9:17; Eps. 86:15.

5. Mena rokutja Jehova u tu tjiwa nawa, ihi tji mu hinga okutjita vi otja kEpsalme 103:13, 14?

⁵ Jehova u tjiwa oviṋa avihe ohunga na eṱe, mena rokutja we tu uta. Otjiṋa otjiwa okutjiwa kutja Jehova u tjiwa oviṋa avihe ohunga nomundu auhe kombanda yehi. (Eps. 139:15-17) Eye u tjiwa kutja kaweṱe ohomonena mena rouvi mbu twa rumata kovanene vetu. Eye wina u tjiwa oviṋa avihe mbya tjitwa mehupo retu, nu mbya ṱuna komuano mbu tu ritjinda ndino. Mena rokutja Jehova u tu tjiwa nawa nao, hapo ihi tji mu hinga okutjita vi? Ihi tji mu hinga okuturaisira otjari.—Eps. 78:39; lesa Epsalme 103:13, 14.

6. Omomuano uṋe Jehova ma raisa kutja tjiri u vanga okutuisira?

⁶ Jehova wa raisa kutja u vanga okutuisira. Eye u tjiwa kutja omukambo omuvi omurumendu omutenga Adam mbwa toora, wa tjita kutja tu rumate ouvi nonḓiro. (Rom. 5:12) Kape notjiṋa tjarwe tji matu yenene okutjita okurikutura oveni poo okukutura varwe kouvi nonḓiro. (Eps. 49:7-9) Posi yokutja, Mukuru wetu worusuvero we tu raisira otjari na tjiti otjiṋa kutja tu kuturwe kouvi nonḓiro. Hapo eye wa tjita vi? Johanes 3:16 ri raisa kutja Jehova wa hinda Omuna we omukwatwaerike kutja me yekutuṱira. (Mat. 20:28; Rom. 5:19) Jesus we tu ṱira kutja ma kuture ingwi ngu ma kambura mu ye. (Hebr. 2:9) Ihi tja ri otjiṋa otjihihamise ku Jehova okumuna Omuna we omusuverwa ama ṱu onḓiro ombi ondetarise ndjo. Otjingaperi kutja Jehova katja yandjera Omuna we omukwatwaerike okutuṱira, andakuzu kaa vanga okutuisira.

7. Ovandu veṋe tjiva mba tamunwa mOmbeibela mba isirwa i Jehova?

⁷ MOmbeibela mu novihorera vyovandu ovengi Jehova mba yenena okuveisira. (Ef.  4:32) Ouṋe ngu mo zemburuka? Porumwe mo ripura nOmbara Manasse. Omurumendu omurunde ngo wa katuka komurungu wa Jehova momiano omiyaukise tjinene. Eye ee rikotamene koomukuru wovisenginina nu aa tunduuza varwe okutjita nao wina. Eye wa zepa ovanatje ve omuini ne ve punguha kokutja ve rire ombunguhiro oningiririsiwa koomukuru wovisenginina. Eye nandarire wa twa otjiserekarera tjoomukuru wovisenginina mOndjuwo ondjapuke ya Muhona. Ombeibela i tja nai ohunga na Manasse: “[Eye] wa tura ondjo tjinene komurungu waMuhona ne Mu pindikisa.” (2 Ekuruh. 33:2-7) Posi ya, indu Manasse tja raisa kutja tjiri we ritanaura, Jehova we mu isira. Mukuru wina we mu tjita kutja ma rire ombara rukwao. (2 Ekuruh. 33:12, 13) Ngahino wina ove we ripura ohunga nOmbara David, ngwa tjitire ouvi ounene komurungu wa Mukuru, mbwaau kamburire mo okukatuka orukupo nokuzepa. Posi ya, indu David tje rimuna kutja u nondjo ne ritanaura tjiri, Jehova wina we mu isira. (2 Sam. 12:9, 10, 13, 14) Matu yenene okukara nongamburiro yokutja Jehova tjiri u vanga okutuisira. Omuano Jehova me tu isira wa panguka komuano mbu tu isira.

8. Mena rokutja Jehova Omupangure omusemba, hapo otjiṋa hi tji ṱuna vi komuano me isira?

⁸ Jehova “Omupangure wehi arihe.” (Gen. 18:25) Omupangure omusemba u hepa okutjiwa oveta nawa. Jehova Omupangure wetu, nEye u tjiwa omatwako nawa mena rokutja ongu ye yandja. (Jes. 33:22) Kape nomundu ngu ma tjiwa ouwa nouvi okukapita Jehova. Otjikwaye tjarwe omupangure omusemba tje hepa okutjita? Eye u hepa okutjiwa ouatjiri auhe ngunda e hi ya toora omukambo. Ku nao, Jehova Omupangure omusemba mena rokutja u tjiwa ouatjiri auhe.

9. Otjikeṋa Jehova tje tjiwa indu tja tye okuisira poo okuhinokuisira omundu?

⁹ Jehova ke ri tjimuna ovapangure wovandu, orondu aruhe u tjiwa ouatjiri auhe ohunga notjiṋa tji tja tjitwa. (Gen. 18:20, 21; Eps. 90:8) Eye ke ri tjimuna ovandu mbe pangurira koviṋa mbi mave munu nokuzuva uriri. Eye u tjiwa kutja omikambo omundu mbi ma toora vi hingwa i yomuano me kurisiwa, otjisisiro okuza kovanene ve, omahongero nga muna noruveze pe kara. Nu wina vi ṱunwa i youveruke we. Jehova wina u tjiwa omutima womundu auhe. Eye u tjiwa kutja ongwaye omundu tji ma tjiti otjiṋa kaaṋi ho. Nu kape notjiṋa tji tji yenena okuhorekwa komurungu wa Jehova. (Hebr. 4:13) Ku nao, indu Jehova tji ma isire omundu, omena rokutja ma tjiwa ouatjiri auhe ohunga nongaro me ri.

10. Ongwaye tji matu tja aruhe Jehova u pangura osemba? (Deuteronomium 32:4)

¹⁰ Jehova aruhe u pangura osemba nokuhinondoorora. Eye ke nombangu. Jehova ka isire omundu mena rokutja u nombuniko ombwa, omutumbe, omundu omutjiukwa motjiwaṋa, poo u nondjiviro onyingi moviṋa pekepeke. (1 Sam. 16:7; Jak. 2:1-4) Kape nomundu ngu ma yenene okuṋiṋikiza Jehova poo okumupa otjisuta tjombopero. (2 Ekuruh. 19:7) Omukambo auhe Jehova mbu ma toora, kau ṱunwa i yomuano mbu ma fula. (Eks. 34:7) Jehova Omupangure omusemba mena rokutja u tjiwa oviṋa avihe ohunga na eṱe, nozongaro mu tu ri.—Lesa Deuteronomium 32:4.

11. Omuano Jehova me isira wa panguka vi komuano ovandu mu ve isirasana?

¹¹ Ovatjange vOmatjangwa wOtjiheberi va tja Jehova u isira momuano wapeke. Povikando tjiva, owo va ungurisa embo rOtjiheberi  ndi kahurura ondjesiro ya Jehova. Nu omakonḓononeno yemwe ya tja, oro “ri ungurisiwa okukahurura omuano Mukuru me isira ovandu mba tjiti ouvi. Nembo ndo ka ri ungurisiwa okukahurura omuano ovandu mu ve isirasana.” OJehova erike ongu nousemba wokuisira omundu ngwe ritanaura komauvi we oparukaze. Hapo ku kongorera tjike indu Jehova tje tu isire?

12-13. (a) Otjikeṋa omundu tje yorokera indu tja isirwa i Jehova? (b) Ouwa wondjesiro ya Jehova u kambura orure ndu ṱa pi?

¹² Indu tji twa yakura kutja Jehova we tu isire, eṱe tu yorokera “otuveze twomasuviro” nu wina tu kara nohange momuinyo nomeritjiviro omawa womomutima. Eṱe matu yenene okukara nondjoroka ndjo indu tji twa isirwa i “Muhona.” (Oviung. 3:20) Indu Jehova tje tu isire, eye u yarura ko oupanga wetu na ye, nu pe sana tjimuna kape na indu twa tjitire ouvi oparukaze.

¹³ Indu Jehova tje tu isire, eye kemee tu pe ondjo poo okutuverera ouvi mbo rukwao. (Jes. 43:25; Jer. 31:34) Jehova ma humburura ouvi wetu kokure na eṱe “otja omukuma wokomuhuka punga au ri kokure na imbwi wokongurova.” * (Eps. 103:12) Indu tji twe ripurire komuano Jehova me isira, eṱe tu kara nondangi nenyando enene. (Eps. 130:4) Posi yokutja ouṋe ngu ma yenene okuisirwa i Jehova?

14. Twe rihongo tjike ohunga nokutja ongwaye Jehova tje isira omundu poo tje he mu isire?

¹⁴ Eṱe twe rihongo kutja Jehova tja tye okuisira omundu ka tara kutja ouvi mbwa tjiti ouṱiṱi poo ounene. Wina, twe rihongo kutja Jehova u ungurisa ounongo we otja Omuute, Omuyandje womatwako nOmupangure, indu tja tye kutja ma isire omundu poo indee. Nungwari omapu yeṋe Jehova nge ripurira ko, indu tja tye okuisira poo okuhinokuisira omundu?

15. Otja ku Lukas 12:47, 48, otjikeṋa Jehova tje tara ko indu tji me tu isire?

¹⁵ Jehova u tara kutja omunauvi ma tjiwa kutja otjiṋa tja tjiti otjivi poo indee. Jesus wa kahurura otjiṋa ho mu Lukas 12:47, 48. (Lesa.) Indu omundu tja tye okutjita  ourunde mbu ma tjiwa nawa kutja Mukuru ka yakura, okuzambo e u tjiti, eye wa tjiti ouvi ounene. Nu Jehova mape ya a tye okuhinokuisira omundu ngo. (Mar. 3:29; Joh. 9:41) Ku nao, eṱe matu sokuyakura kutja oviṋa mbi tu tjita povikando tjiva tu tjiwa kutja kavi tjata ku Mukuru. Hapo eṱe mape ya atu isirwa? Ii. Mena rokutja pe notjiṋa tjarwe wina Jehova tje ripurira ko indu tja tye okutuisira.

16. Okuritanaura ku heya tjike, nu ongwaye tji matu hepa okuritanaura indu tji matu vanga kutja Jehova me tu isire?

¹⁶ Epu rarwe, Jehova u tara kutja omunauvi tjiri we ritanaura. Hapo okuritanaura ku heya tjike? Okuritanaura ku heya “okurundurura omeripura, ongaro poo ondando yoye.” Okwo ku kamburira mo omuhihamwatima nokufula navi tjinene ohunga noviṋa ovivi mbi wa tjiti, poo mena rokuhinokutjita otjiṋa otjiwa. Omundu ngwa tjiti ouvi u fula navi mena roviṋa ovivi mbya tjiti, nokutja wa ngundiparisa oupanga we ku na Jehova. Zemburuka kutja Ombara Manasse nOmbara David va tjitire ouvi ounene, nungwari Jehova we ve isira mena rokutja owo tjiri ve ritanaurire. (1 Ozomb. 14:8) Tjiri Jehova utu isira indu tja munu kutja eṱe twe ritanaura tjiri. Posi yokutja, okuhihamwa omutima uriri mena rouvi mbu twa tjiti kaku ya yenena. Eṱe matu hepa okutoora omukambo. * Iho matji tu yeta kepu rarwe Jehova ke tara ko.

17. Okurivingurura ku heya tjike, nu ongwaye tje ri ounanḓengu indu tji matu vanga okuhinokuyarukira po ouvi mbu twa tjita? (Jesaja 55:7)

¹⁷ Otjiṋa tjarwe otjinahepero Jehova tje tara ko, okurivingurura. Okurivingurura ku he ya “okuritanaura.” Pu mape hee kutja omundu ma sokuisa oviṋa ovivi mbyaa tjiti, nokutjita imbi Jehova mbye vanga kutja ovandu ve tjite. (Lesa Jesaja 55:7.) Omundu ma sokurundurura omeripura we kokutja me ripure tjimuna Jehova tje ripura. (Rom. 12:2; Ef. 4:23) Eye ma sokuisa omeripura omavi noviṋa ovivi mbyaa tjiti. (Kol. 3:7-10) Otjingaperi kutja ongamburiro yetu mombunguhiro ya Kristus ondji tjita kutja Jehova me tu  isire nokutukohorora komauvi wetu. Jehova me tu isire mena rombunguhiro ndjo, indu tja munu kutja eṱe tu tjita ozongondjero zokurundurura ongaro yetu.—1 Joh. 1:7.

18. Twe rihongo tjike ohunga nomuano Jehova me isira?

¹⁸ Ngatu rizemburukise rukwao omapu omananḓengu ngu twa hungirire ko. Jehova ongu ri Omuisire omusembasemba mevaverwa arihe. Ongwaye tji matu tja nao? Epu etenga orondi rokutja, eye aruhe u ri kamwaha okutuisira. Epu oritjavari, eye u tjiwa oviṋa avihe ohunga na eṱe. Nu eye omundu omusembasemba ngu ma sokutya kutja eṱe twe ritanaura tjiri poo indee. Epu oritjatatu, Jehova tji me tu isire u tu isira oparukaze, nu ku ye pe munika aayo katu ya tjita ouvi mbwo oparukaze. Nu ihi tji tjita kutja tu kare nomeritjiviro omawa womomutima nokuyakurwa i Jehova.

19. Ongwaye tji matu yenene okukara nondjoroka, nandarire kutja kaweṱe ohomonena nu tu tjita ouvi?

¹⁹ Otjiperi kutja, mena rokutja kaweṱe ohomonena eṱe tu tjita ouvi. Nungwari, matu yenene okutunduuzwa i yomambo nge ri membo ndi Insight on the Scriptures, Embo 2, pomukuma 771. Owo maye tja: “Mena rokutja Jehova u notjari, eye u ripurira koungundipare wovakarere ve. Ku nao, owo kave nokuhepa okurivera tjinene indu tji mave tjiti ozondataiziro mena rokuhinokurira ohomonena. (Eps. 103:8-14; 130:3) Indu tji mave kondjo pu mave yenene okuhupa otja komirari vya Mukuru, owo mave yenene okukara nondjoroka. (Fil. 4:4-6; 1 Joh. 3:19-22).” Iho tjiri otjiyanḓiparise.

20. Matu katara ku ye morupa ndu maru kongorere ko?

²⁰ Eṱe tu nondangi tjinene kutja Jehova u zera okutuisira ozondataiziro zetu, indu tji tu nomuhihamwatima tjiri kouvi mbu twa tjiti. Posi ya, hapo eṱe matu yenene vi okuhorera komuano Jehova me isira? Omomiano viṋe omuano mu tu isira mu u ri tjimuna omuano Jehova me isira, nu omomuano uṋe mu wa panguka? Ongwaye tje ri ounahepero okutjiwa ombangu ndjo? Orupa ndu maru kongorere ko maru kazira omapuriro ngo.