IHE ya John wa papitisiwa otja Omuhongonone wa Jehova momaandero wozombura nḓa 1950, mokahuro Gujarat, ku ke ri moIndia. John, novangu, novaṱena kwe, na ina, va ri Ovakatolika ovaṱakame, nowo aave pirukire ongamburiro ya ihe.

Eyuva rimwe ihe ya John, wa ningira John kutja me mu twarere ombapira komukambure ngu ri mombongo ya ihe. Posi yokutja omuhuka mbo, John we rikonda omunwe we koruungu. Mena rokutja aa vanga okuraisa onḓuviro ku ihe, eye wa kuta erapi komunwe we mbwaau ziza ombinḓu, na twara ombapira ya ihe.

Indu John tja ya ngo, wa kavaza omukazendu womukambure kaa sokutwara ombapira, nu ngwa ri Omuhongonone wa Jehova. Omukazendu ngwi tja kambura ombapira, wa muna kutja John we rihihamisa omunwe, na ningire kutja me mu vatere. Eye wa kapaha okakesa ke komiti, a kohorora otjiraro nu a manga nerapi. Okuzambo wa hangera John otee ngunda ama hungire kuna ye ohunga nOmbeibela.

Oruveze ndwo, onyengo John ndja ri na yo ohunga nOvahongonone va Jehova, ya uta okuzenga, nu otja pura omukazendu ngwi ohunga nomapu yevari nga tjita kutja ongamburiro ye na indji oya ihe i panguke. Eye wa pura kutja, Jesus ongu ri Mukuru, nu Ovakriste ve sokukumba ku Maria poo indee? Mena rokutja omukazendu ngwi aa tjiwa okuhungira Otjigujarati, eye wa yenena okuzira John meraka re omuini. Eye wa zira omapuriro we okuza mOmbeibela, okuzambo e mu pe okambo nga “This Good News of the Kingdom.”

John tja kalesa okambo ngo kombunda, ee rimunu tjimuna me rihongo ouatjiri wOmbeibela otjikando otjitenga. Eye wa ya komuhonge wokereka ke hita, ne kemupura omapuriro otjingewo nga pura komukazendu ngwi. Omuhonge wa pindika tjinene ne mu vete nOmbeibela, okuzambo e mu rokohere na tja: “Ove nambano wa rire Satan! Ndji raisira kutja pe pi Ombeibela pu i tja Jesus kaMukuru. Ndji raisira kutja pe pi pu i tja katu sokurikotamena ku Maria. Ndji raisira!” John wa urumisiwa i ongaro omuhonge ndja raisa, na tja ku ye: “Ami hi nokurora okuyatera ombaze yandje mokereka yOkatolika rukwao.” Nu kena pa rora!

John wa uta okurihonga Ombeibela kuna Ovahongonone va Jehova, a toora ongurameno momerikotameno wouatjiri, na utu okukarera Jehova. Kombunda, ovandu tjiva meṱunḓu ra John va tjita nao wina. Kundino, John ngamba u notjito komunwe mbwe rikonda ozombura ape 60 nḓa kapita. Eye u zemburuka nondjoroka ondjito imwe youwa ndje mu nanena komerikotameneno wouatjiri.—2 Kor. 6:4, 6.