Eṱe tu kongorera Ombeibela indu tji matu zemburuka Omariro Omayapuke wa Muhona, wina nge tjiukwa otja Omazemburukiro wOnḓiro ya Jesus. (1 Ovakorinte 11:20) Nungwari, ozongamburiro ozengi kaze zemburuka omazemburukiro ngo tjimuna Ombeibela tji rakiza.

 Ondando yOmariro Omayapuke wa Muhona oyokuzemburuka Jesus, okuraisa ondangi kombunguhiro ndje tu pa. (Mateus 20:28; 1 Ovakorinte 11:24) Ovandu tjiva ve muna kutja omauvi wawo maye isirwa indu tji va ri omboroto nokunwa kotjinwino pOmariro Omayapuke wa Muhona. Posi ya Ombeibela kai tja nao. Ombeibela i honga kutja eṱe kamaatu isirwa omauvi mena rovizerika vyozongamburiro, nungwari omena rongamburiro yetu mu Jesus.—Ovaroma 3:25; 1 Johanes 2:1, 2.

 Jesus wa raera ovahongewa ve okuzemburuka Omariro Omayapuke wa Muhona, posi ya ke ve raerere kutja opovikando vingapi. (Lukas 22:19) Tjiva ve muna kutja mave sokuyezemburuka omueze auhe, ngunda varwe ave ye zemburuka otjivike atjihe, eyuva arihe, omayuva tjiva motjivike, poo owo ve ye zemburuka otja konḓero yawo. Posi ya pe nomapu tjiva mu matu sokutara ko.

 Jesus wa zikamisa Omariro Omayapuke wa Muhona meyuva rOpaska, nu eye wa ṱa kombunda meyuva tjingero ndo. (Mateus 26:1, 2) Omena raye eyuva ndo tji ra ri enanḓengu? Omatjangwa ye sasaneka ombunguhiro ya Jesus ku nondjona yOpaska. (1 Ovakorinte 5:7, 8) Opaska aai zemburukwa rumwe mombura aihe. (Eksodus 12:1-6; Levitikus 23:5) Momuano tjingewo, Omazemburukiro wOnḓiro ya Jesus aye zemburukwa rumwe mombura aihe i yOvakriste veserewondo etenga, a nu Ovahongonone va Jehova ve tjita nao wina.

 Jesus wa twa po otjihorera otjiwa kutja oruṋe tji matu sokuzemburuka Omazemburukiro wOnḓiro ye. Jesus wa tjivisa Omazemburukiro nga tji ya ri 14 komueze mbwaau tjiukwa otja Nisan, kombunda mozoiri zomapeta. (Mateus 26:18-20, 26) Mombura aihe, eṱe tu kayenda komurungu okuzemburuka Omazemburukiro wOnḓiro ya Jesus meyuva ndo, nu tu kongorera omuano Ovakriste veserewondo etenga maave tjiti. b

 14 ku Nisan, mombura ndji 33 O.Z. ya ri Oritjatano. Posi ya moruveze rwetu, eyuva rOmazemburukiro wOnḓiro ya Jesus mape ya ari kara meyuva rarwe rotjivike ombura aihe. Eṱe tu tara eyuva ndi 14 ku Nisan pu ri wira mokalenda ketu ombura aihe mokuungurisa omuhunga tjimuna mbwaau ungurisiwa moruveze rwa Jesus, pendje nokuungurisa omuhunga mbu ungurisiwa mokalenda kOvajuda moruveze rwetu. c

 Indu Jesus tje tu raisira omuano mu matu sokuzemburuka onḓiro ye, eye wa ungurisa omboroto ndji hi nosure nomavinu mbya hupire okuza keriro rOpaska. (Mateus 26:26-28) Mokuhorera kotjihorera tja Jesus, eṱe tu ungurisa omboroto ndji hi nosure nu katu weza ko otjiṋa tjarwe. Wina tu ungurisa omavinu oyeni uriri (red wine), nungwari kamavinu nga ungurwa pomandjembere poo omavinu nga weziwa ko oviṋa vyarwe, tjimuna outji, poo ovitjatise vyarwe.

 Ozongamburiro tjiva ze ungurisa omboroto ndji nosure, posi yokutja osure povikando ovingi mOmbeibela i ungurisiwa otjotjiraisiro tjouvi. (Lukas 12:1; 1 Ovakorinte 5:6-8; Ovagalate 5:7-9) Ku nao, omboroto ndji mai yenene okukuramena po orutu rwa Kristus ndu hi nouvi, oyo ndji hi nosure nu ndji hi na ya weziwa ko oviṋa varwe. (1 Petrus 2:22) Ozongamburiro tjiva ze honga posyo kutja okunwa otjikariha ouvi, ku nao ozo ze ungurisa osapa yomandjembere (grape juice) okupingena po omavinu.—1 Timoteus 5:23.

 Omboroto ndje hi nosure notjinwino mbi ungurisiwa pOmazemburukiro wOnḓiro ya Jesus oviraisiro uriri, nungwari kambinḓu nu karutu rwa Kristus. Ovyo kavi tjituka okutanaukira mombinḓu norutu rwa Jesus otja tjiva tji ve ripura. Ngatu tare kOmatjangwa ngu maye ṋunisa epu ndi.

•   Ndoovazu Jesus wa rakiza ovahongewa ve okunwa ombinḓu ye, eye etje ve raera okuhinokukara nonḓuviro komatwako wa Mukuru ohunga nombinḓu. (Genesis 9:4; Oviungura 15:28, 29) Nungwari iho katji tjitirwe, mena rokutja Jesus katja raera varwe okukatuka omatwako wa Mukuru ohunga nouyapuke wombinḓu.—Johanes 8:28, 29.

•   Ndoovazu ovaapostele tjiri va nwa ombinḓu ya Jesus, eye katja tja ‘ombinḓu yandje ndji mai tirihiwa,’ tji tji raisa kutja ombunguhiro ye ai sokukatjitwa.—Mateus 26:28.

•   Ombunguhiro ya Jesus ya tjitwa “nambano na aruhe.” (Ovaheberi 9:25, 26) Posi ya, andakuzu omboroto notjinwino vya tanaukira morutu nombinḓu ya Jesus pOmariro Omayapuke wa Muhona, pu mape hee kutja imba mbe zemburuka Omariro Omayapuke wa Muhona nai ve tjita ombunguhiro ndjo rukwao.

•   Jesus wa tja: “Ihi tjiteye kokuzemburuka Ami,” nungwari ka tjere: ‘Ndji punguhe.’—1 Ovakorinte 11:24.

 Imba mbe kambura momahongero wokutja omboroto notjinwino vi tanaukira morutu nombinḓu rwa Jesus, owo ve zikamisira omahongero wawo ngo komazeva tjiva mOmbeibela. Otjotjihorera, momatorokero omengi wOzombeibela, Jesus wa torokwa nai indu tja hungire ohunga notjinwino: “Indji ombinḓu yandje.” (Mateus 26:28) Posi ya omambo wa Jesus wina maye yenene okutorokwa kutja: “Ihi matji hee ombinḓu yandje,” “Ihi matji kuramene po ombinḓu yandje,” poo “Ihi otjiraisiro tjombinḓu yandje.” d Tjimuna tja tjiti aruhe, Jesus tjaa hongo aa ungurisa ovisasanekero.—Mateus 13:34, 35.

 Indu Ovahongonone va Jehova tji mave zemburuka Omariro Omayapuke wa Muhona, ovandu ovaṱiṱi uriri ombe kara norupa mokurya omboroto nokunwa otjinwino. Omena raye?

 Ombinḓu ya Jesus ndja tirahiwa i raisa “omerikutiropamwe omape” nga pingena omerikutiropamwe pokati ka Jehova Mukuru notjiwaṋa tjOvaisrael otjikuru. (Ovaheberi 8:10-13) Imba mbe kara norupa momerikutiropamwe omape ve yenena okurya omboroto nokunwa otjinwino. Iho katji kamburire mo Ovakriste avehe, posi ya owo mba “mba isanewa” momuano wapeke i Mukuru. (Ovaheberi 9:15; Lukas 22:20) Imbo ombu mave kahonapara meyuru pu na Kristus, nu Ombeibela i tja ovandu 144 000 uriri ombu mave kamuna ondaya ndjo.—Lukas 22:28-30; Omavandururiro 5:9, 10; 14:1, 3.

 Imba mba toororwa okukahonapara ku na Jesus ‘okarupanda okaṱiṱi’ uriri. Posi ya, imbo varwe ovengi mbe nomaundjiro wokukamuna omuinyo waaruhe kombanda yehi “otjimbumba otjinene.” (Lukas 12:32; Omavandururiro 7:9, 10) Imba mbe nomaundjiro wokukahupa kombanda yehi kave ri omboroto nokunwa otjinwino pOmazemburukiro wOnḓiro ya Jesus, posi ya ve kara norupa mokuraisa ondangi kombunguhiro Jesus ndje tu pa.—1 Johanes 2:2.