Omapu ngu maye kongorere kehi mba maye raisa kutja omena raye Ovahongonone va Jehova tji ve ha i kovita:

1.   Onḓuviro ku Mukuru. Ombeibela i tja ovakarere va Mukuru mave “hambura omangaruvyo wavyo ye rire otuvyo twovitaure vyehi . . . nu kamaavi rirongerere okurwa ovita rukwao.”—Jesaja 2:4.

2.   Onḓuviro ku Jesus. Jesus wa raera omuapostele Petrus na tja: “Yarura mo engaruvyo roye motjihweka tjaro. Avehe mbu mave toora engaruvyo mave ṱengaruvyo.” (Mateus 26:52) Jesus wa raisa kutja ovemukongorere kave sokutjinda ovirwise vyovita.

    Ovahongewa va Jesus va puratena kerakiza re ndi: “Otja tjinga ambi he ri owouye, owo wina otjinga ave he ri ovouye.” Ku nao kave kara norupa movitjitwa vyozopolotika. (Johanes 17:16) Owo kave pirukire omikambo mbya toorwa i yorupa rwovita poo imba mba toorora okukakarera morupa rwovita.

3.   Okusuvera varwe. Jesus wa rakiza ovahongewa ve kutja mave “sokusuverasana.” (Johanes 13:34, 35) Ku nao owo mave rire orupa rweṱunḓu rovakambure mouye auhe. Nu kape nomundu ngu ma sekamene omukwao movita orondu oweṱe ovangu nomarumbi.—1 Johanes 3:10-12

4.   Otjihorera tjOvakriste voruveze orukuru. Embo ndi Encyclopedia of Religion and War ra tja: “Ovahongewa va Jesus voruveze orukuru kaave i kovita poo okuungura morupa rwovita.” Owo aave munu kutja okutjita oviṋa mbi “kaku nokuhitasana norusuvero rwa Jesus nerakiza kutja mave sokusuvera ovanavita na wo.” Momuano tjingewo mbwo, omukonḓonone wozongamburiro Omundoitji wena Peter Meinhold, wa tja ohunga novahongewa va Jesus voruveze orukuru: “Okurira Omukriste nokurira omurwe wovita oviṋa vivari mbi ha hitasana.”

 Ovahongonone va Jehova ovandu ovawa tjinene motjiwaṋa nu kave noumba mbu ve eta mehi mu ve kara. Eṱe tu raisa ondengero kouhonapare wohoromende mokuungurisa omirari vyOmbeibela mbi ri kehi mba:

•   “Omundu auhe nge riwise kehi youhonapare.”—Ovaroma 13:1.

•   “Yandjeye ovyombara kombara, nu imbi ovyaNdjambi mu yandje ku Ndjambi.”—Mateus 22:21.

 Ku nao tu puratena koveta, tu suta otjisuta otjitjamurongo tjohoromende, nu tu puratena komirari vyohoromende mbi tjita kutja ovandu ve hupe mondjeverero.