Kena 30 Oktober 2021, Menyadi Peter Gewitz, seiku ari Komiti Pampang Opis Scandinavia ngeluarka Bup Kudus Salin Dunya Baru Begian Sempekat Baru ba bansa jaku Greenland. Bup Kudus tu dikeluarka nengah gempuru ti spesial ke dipandangka ba online nengah JW Stream ngagai 413 iku orang ke meda, nyengkaum 164 iku orang ke meda ba Greenland. Bup Kudus nya udah bisi ba fail bansa digital. Bup Kudus tu deka dichelak ila.

Menara Jaga udah disalin ngagai bansa jaku Greenland kenyau ari 1973. Kira-kira 57,000 iku orang ngena bansa jaku nya lalu iya sebaka enggau bansa jaku bukai ke dikena ba begian Kutub Utara. Salin Bup Kudus ke baru tu pemeri ti special ngagai 134 iku penginjil ke ngena bansa jaku Greenland.

Orang ke diau ba Greenland amat bebasaka Bup Kudus. Kena 1766 seiku anak missionary ari Norway nyadi orang keterubah nyalin Bup Kudus Sempekat Baru ngagai bansa jaku Greenland. Kena 1822, seiku missionary ari Denmark nyalin bup Pemungkal lalu ngena nama Petara, Jehovah. Kena taun 1900 nya baru tiap iti bup dalam Bup Kudus udah bisi ba bansa jaku Greenland. Lalu kena taun 2000, nya baru semua bup mit digumpulka ba siti bup.

Lebuh program nya dipejalaika, Menyadi Gewitz madahka, “Lebuh nuan macha salin tu nuan ulih pechaya utai ke dibacha nuan, laban tu meh Jaku Petara ke disalin enggau betul ngagai bansa jaku Greenland ti moden.” Salin tu madahka pasal asai ati mensia enggau manah agi. Ngambika chunto, John 11:38 madahka pasal asai ati Jesus lebuh iya ba pendam Lasarus. Sekeda Bup Kudus ba bansa jaku Greenland madahka Jesus “nyadi ringat” tauka “pedis ati” maya nya. Bup Kudus Salin Dunya Baru Begian Sempekat Baru enggau terang madahka Jesus “bedemuh.”

Kitai andal, salin ti terang sereta betul tu deka nulung orang ke ngena bansa jaku Greenland deka “mereti” agi utai ke dipadah ba Bup Kudus.—Matthew 13:51.