Gerempung Pengelikun enggau Bekerejasama ba Eropah (OSCE) a bisi ngatur siti aum kena 23 Julai 2020. Ba maya aum nya, pengari Amerika Serikat seretai enggau kira-kira 30 menua Eropah ke bukai, balat mantah menua Rusia ketegal sengaja lalu bisi atur merinsa Saksi-Saksi Jehovah ba menua nya.

Pengari Amerika Serikat ke OSCE nya, Lane Darnell Bahl, madah ngagai semua pegawai politik ke baum: “Amerika Serikat enggau mayuh amat menua bukai ke baum ditu saritu, udah mantah lalu deka terus mantah perintah Rusia. Tu ketegal pemayuh riput ti madahka, piak ti bekuasa ba Rusia nyelungkai mayuh rumah bala Saksi, nangkap sida enggau nadai kebuah, nyamah sida, sereta ngejil sida nyentukka pengelama enam taun.”

Bala pegawai ke mantah nya, kelebih agi irau pasal riput ke baru pasal piak ti bekuasa ba Rusia nyelungkai lebih ari 100 buah rumah Saksi-Saksi Jehovah ba begian Voronezh. Lane Darnell Bahl madah: “Utai ti ngenyitka ati aku, iya nya, raban pengarap ti mit tu balat diperinsa taja pan nadai ngaga sebarang penyarut.”

Seiku pengari ari Britain ke benama Nicola Murray mega irau laban “majak mayuh rumah bala Saksi diserungkai. Nambahka nya, mayuh rumah diserungkai ba maya ti sama. Tu nunjukka, Saksi-Saksi Jehovah ba Rusia ukai diperinsa sekali sekala aja, tang pengawa tu baka ke endang diatur perintah.” Ku iya nampung baru: “Maya piak ti bekuasa bedawa bala Saksi ba Rusia, sida ngaga pengawa besembah ti biasa aja nyadika ‘bukti’ nuduh bala Saksi besalah.”

Piak ti bekuasa ba Voronezh nuduh Saksi-Saksi Jehovah besalah laban sida nyimpan fail elektronik, diatur nitihka raban, lalu ngena video call kena begempuru. Tang Lane Darnell Bahl nunjukka tuduh tu endang enda betul. Indah, iya ngumbai dawa nya “beli.” Ku iya madah: “Aku empu ngereja semua utai nya ba pengidup ninting hari.” Iya nunjukka, pegawai Rusia pan bepura-pura, laban maya aum OSCE nya, sida mega begempuru ngena video call, ngena fail elektronik sereta diatur dalam raban—semua pengawa ke dikereja bala Saksi, ti dikumbai perintah Rusia nya salah.

Dua-puluh tujuh menua ari European Union (EU) seretai enggau lapan menua ke bukai, begulai ngeluarka siti surat ti madah: “Udah beberapa kali, pegawai Rusia madah ngagai OSCE tu, Saksi-Saksi Jehovah bibas bejalaika sembah sida ba menua Rusia, lalu hak sida milih pengarap diri sereta utai ke dipechaya, endang ditanka sereta disukung perintah Rusia. Taja pia, kami seruran nerima riput pasal piak ti bekuasa ba Rusia nyelungkai rumah bala Saksi, ngetanka sida ba jil, lalu bedawaka sida ba kot. Pengawa tu endang enda sejalai enggau utai ke disebut pegawai Rusia.”

Surat nya mega nambah: “Hak semua mensia, nyengkaum bala Saksi-Saksi Jehovah, ti bibas milih pengarap, enda patut dikachau. Sida mega patut bibas begulai enggau pangan diri, begempuru, mansutka runding enggau utai ke dipechaya sida, lalu enda nyadi mansa piak ti bekuasa ke bechiping. Semua hak mensia tu endang disengkaum dalam undang-undang menua Rusia, undang-undang entarabansa, sereta semaya perintah Rusia ngagai OSCE.”

Nicola Murray, pengari ari Britain, ngujungka surat iya enggau minta perintah Rusia badu agi merinsaka Saksi-Saksi Jehovah.

Lane Darnell Bahl mega ngasuh Rusia: (1) badu agi bedawaka Saksi-Saksi Jehovah ba kot, (2) mulaika baru pampang opis Saksi-Saksi Jehovah ti udah dirampas ari sida, lalu (3) ngelepaska tiap iku Saksi Jehovah ke dijil enggau lengkas.

Tu ukai keterubah kali gerempung entarabansa mantah Rusia ketegal merinsaka bala menyadi kitai. Perintah Rusia udah ditangkan. Semua dunya udah nemu Saksi-Saksi Jehovah balat amat diperinsa ba menua nya. Tang ke berat agi, Jehovah endang nemu utai ke ditapi bala menyadi kitai ba Rusia. (Masmur 37:18) Apai kitai ti bepengerindu tentu deka merekatka sida ketegal pengarap, pemerani enggau pengeliat ati sida.—Masmur 37:5, 28, 34.