Diserang ngena chara seksual nya nyengkaum mayuh macham chara. Chunto, megai ba endur ti enda patut tauka mansutka leka jaku ti bisi ngembuan seks. Tang, kekadang tusah deka nentu sekalika nya semina betundi aja tauka diserang ngena chara seksual.

 Nemu nuan nama bida iya? Peda  kuis diserang ngena chara seksual lalu giga saut iya!

 Diserang ngena chara seksual ukai semina nyadi ba sekula. Enti berengkah ari diatu nuan udah nemu chara sereta lebih nyediaka diri, dudi hari nuan ulih nyaga diri ari diserang ngena chara seksual. Nuan mega engka ulih nagang orang ke nyerang orang bukai ngena chara seksual!

 Enti nuan deka ngetuka ari diserang ngena chara seksual, nuan patut nemu nama reti nya? Peratika tiga iti pekara ba baruh tu lalu perundingka chara kena napi penanggul nya:

 CHUNTO:

“Beberapa iku orang ke sama gawa ti tuai agi selalu madahka aku bajik. Sida mega ngasaika manah amat enti sida beumur 30 taun biak agi. Nyentukka seiku ari sida nitihka aku ari belakang lalu nyium buk aku!”—Tabitha, 20.

 Tabitha engka berunding: “Enti aku enda bedulika iya lalu terus sabar, engka iya ulih ngetu.”

 Kebuah runding tu enda entu manah: Nitihka pansik, enti orang ke diserang ngena chara seksual nya enda bedulika pekara tu, nya ulih ngasuh penanggul tu majak nyadi lalu engka majak jai-sejai.

 Uji tu: Enggau basa tang berani, padahka ngagai orang ke nyerang ngena chara seksual nya, nuan enda rinduka chara iya bejaku enggau ulah iya. Taryn ke beumur 22 taun madah, “Enti bisi orang negu aku, aku tentu nangkan iya enda ngereja nya agi. Kesuah iya, orang nya tekenyit.” Enti orang nya agi ngachau nuan, terus meh berani lalu anang putus pengarap. Bekaul enggau standard moral, Bup Kudus ngelalau kitai ngambika “kitai nyadi orang ke besai tuai dalam pengarap.”—Kolosi 4:12.

 Baka ni enti orang ke nyerang ngena chara seksual nya madahka diri deka ngemediska nuan? Enti tu nyadi, rari meh ari endur nya enggau jampat, lalu minta bantu ari orang ke besai tuai ti dipechayaka nuan.

 CHUNTO:

“Maya aku primari enam, dua iku nembiak indu ngempang aku ba ujung bengunan sekula. Seiku ari seduai iya nya lesbian. Iya mai aku besulu enggau iya. Taja pan aku madahka diri enggai, tang seduai iya majak ngachau aku ninting hari. Bisi sekali, seduai iya ngempitka aku ngagai tisi dinding nyentukka aku enda ulih engkebut!”—Victoria, 18.

 Victoria engka berunding: “Enti aku madahka orang bukai pasal tu, sida engka ngumbai aku lemi, lalu engka nadai orang pechayaka aku.”

 Kebuah runding tu enda entu manah: Enti nuan belalaika pekara tu, orang ke nyerang nuan ngena chara seksual nya engka majak ngachau nuan. Iya mega engka ngachau orang bukai.—Pengajar 8:11.

 Uji tu: Minta tulung ari orang bukai. Apai indai tauka pengajar nuan ulih nulung nuan ngetuka penanggul nya. Tang, baka ni enti sida enda ibuhka utai ti dipadahka nuan? Enti baka nya, tiap kali nuan diserang, tuliska utai ti nyadi, baka haribulan, jam, endur, sereta utai ke disebut orang ke nyerang nya. Udah nya, beri ngagai apai indai tauka pengajar, utai ke ditulis nuan nya. Kesuah iya, orang deka agi ibuh lebuh sida meda utai ke dipadahka nuan enggau chara betulis.

 CHUNTO:

“Aku amat takut ngagai orang ke bemain ragbi. Peninggi sida nyauka dua meter, lalu pemerat sida abis kurang 135 kilo! Iya ngumbai diri tentu ulih tinduk enggau aku. Pengelama setaun, iya ngachau aku nyauka ninting hari. Bisi sekali, kami duai aja dalam kelas, lalu iya belabuh semak ngagai aku. Aku jejampat angkat lalu belanda ke luar.”—Julieta, 18.

 Julieta engka berunding: “Nembiak lelaki sigi baka nya.”

 Kebuah runding tu enda entu manah: Orang ke nyerang ngena chara seksual nya, enda kala deka ngetu seagi semua orang ngasaika pengawa iya enda salah.

 Uji tu: Tentuka ulah, nyengkaum gamal nuan nunjukka nuan enda nerima ulah orang ke nyerang ngena chara seksual nya. Enti nuan enda entu ibuhka utai ti nyadi tauka betundi enggau iya, iya tentu ngumbai pengawa iya nya ukai penyalah ti besai.

 CHERITA TI BENDAR 1:

“Aku enda rindu enda nunjukka basa ngagai orang bukai. Nya kebuah, enti bisi orang ngachau, aku tentu minta sida ngetu. Tang, lebuh bejaku enggau sida, aku tuchum lalu enda kelalu kasar. Tu kebuah sida ngumbai aku baka ke deka betundi enggau sida.”—Tabitha.

•   Enti nuan Tabitha, baka ni nuan mutarka penanggul tu? Nama kebuah?

•   Nama kebuah orang ke nyerang ngena chara seksual nya ngumbai nuan semina deka betundi aja?

 CHERITA TI BENDAR 2:

“Keterubah, beberapa iku nembiak lelaki ba kelas sukan aku nyebut leka jaku ti enda bemoral ngagai aku. Aku enda bedulika sida pengelama beberapa minggu. Tang, penanggul nya majak nyadi. Sida berengkah duduk semak aku lalu ngengkahka lengan sida ba bau aku. Aku nulak lengan sida, tang sida majak enda ngetu. Tu ngujungka, seiku nembiak lelaki meri aku siti keretas ti ngembuan leka jaku ke amat enda bemoral. Aku nyuaka keretas nya ngagai pengajar aku, lalu nembiak lelaki nya digantung ari sekula. Aku patut tumu agi madahka pengajar aku!”—Sabina.

•   Ba runding nuan, nama kebuah Sabina enda tumu agi madah ngagai pengajar iya? Kati pemutus iya nya betul? Nama kebuah au tauka enda?

 CHERITA TI BENDAR 3:

“Menyadi lelaki aku Greg dalam jamban, lalu seiku nembiak lelaki datai semak lalu madah, ‘Sium meh aku.’ Greg madahka enggai, tang iya tetap enda rari ari endur nya. Iya ke amat, Greg patut ngejuka nembiak lelaki nya.”—Suzanne.

•   Ba runding nuan, kati Greg amat diserang ngena chara seksual? Nama kebuah au tauka enda?

•   Ba runding nuan, nama kebuah sekeda nembiak lelaki enggai madahka orang bukai lebuh sida dikachau nembiak lelaki ke bukai?

•   Kati Greg ngaga pemutus ti betul ba pekara tu? Nama deka digaga nuan?