Ba artikel tu

•  Nama tanggungjawap apai?

•  Nama kebuah tanggungjawap apai nya spesial?

•  Apai enggau anak indu

•  Lalau ngagai apai

•   Sebedau anak nuan ada. Chara nuan nyadi laki ke diatu, nunjukka nuan deka nyadi apai ke baka ni dudi hari. Bup Do Fathers Matter? madahka:

   “Siku apai ke nulung bini iya benung ngandung bebelika utai, sereta nguluka bini iya beperesa kandung, kesuah iya deka nyadi apai ti betanggungjawap agi pengudah anak sida ada.”

   “Aku enggai bini aku berasai kediri lebuh iya ngandung, nyadi aku deka naka ulih nulung iya. Indah kami sama-sama nyediaka bilik ke anak kami ti deka ada. Nya meh maya ti spesial ke kami duai bini aku seraya kami nganti penatai anak kami.”—James.

   Prinsip Bup Kudus: “Anang semina berundingka diri empu aja, tang berunding mega ke orang bukai.”—Pilipi 2:4.

•   Pengudah anak nuan ada. Nuan ulih ngemansangka kaul ti manah enggau anak lebuh nuan bemain sereta ngerendut iya taja pan iya baru ada. Nuan mega ulih nulung bini ngibun anak. Utai ke dikereja nuan maya ngintu anak, meri kesan ti besai ngagai pemansang anak nuan. Ari semua utai ke dikereja nuan, nunjukka anak nuan amat berega ba nuan.

   “Kekadang, nyadi meh baka anak mit, bemain, ngelucuka diri, sereta anang meh kelalu serius. Kingatka, anak nuan deka belajar pasal pengerindu, ari nuan ke apai indai.”—Richard.

   Prinsip Bup Kudus: ‘Anak mit endang pesaka ti datai ari Jehovah. Sida endang berekat ti bendar.’—Masmur 127:3.

•   Seraya anak nuan mansang besai. Siti pansik nunjukka anak ke rapat enggau apai sida, pandai agi ba sekula, kurang penanggul ba emosi, sereta jarang salah makai dadah tauka ngereja jenayah. Giga meh awak kena ngemansangka kaul ti manah enggau anak nuan.

   “Lebuh anak aku ngidupka diri lalu pansut ari rumah, iya madahka diri lelengauka maya kami berandau lebuh deriba jauh, tauka maya kami makai malam begulai. Kekadang, randau ti pemadu penting ulih nyadi tauka datai ba maya ti enda disadang kitai. Tu nyadi ketegal kitai bisi ngena mayuh awak begulai enggau pangan diri.”—Dennis.

   Prinsip Bup Kudus: “Nya alai, seruran bejaga sereta bejimat, ngambika kita enda idup baka orang ke beli, tang baka orang ke bepenemu-dalam. Kena meh awak kita enggau manah.”—Epesus 5:15, 16.

 Kesuah iya, apai endang betanggungjawap nyediaka utai ke diguna sereta ngelindung diri sebilik, lalu bala indai betanggungjawap nyaga emosi diri sebilik. (Ulang Adat 1:31; Isaiah 49:15) Tang kekadang, tanggungjawap tu engka tebalit ba entara apai enggau indai. Taja pia, bala pemansik madahka, apai enggau indai sama bela bisi tanggungjawap ti penting. a

 Pakar pansik diri sebilik, Judith Wallerstein madahka peneleba diri pasal pekara tu. Iya nulis, “Lebuh anak indu aku ke beumur 12 taun dilantak kerita, iya dekaka apai iya sama enggau iya dalam ambulan, laban iya andalka agi apai iya nyaga iya. Pengudah iya tama sepital, iya minta aku begulai enggau iya sepemanjai hari merindang ati iya.” b

 “Siku apai ulih nulung diri sebilik ngasaika pengelikun sereta berasai dijaga. Kesuah iya, tu meh utai ke tusah dikereja siku indai. Ba maya ti sama, siku indai ulih ngasuh anak sida berasai dikesayau sereta dikeibuhka. Apai indai ulih bekerejasama.”—Daniel.

 Prinsip Bup Kudus: “Anak, dingaka utai ti dipadahka apai indai nuan.”—Jaku-Dalam 1:8.

 Bala apai, nuan betanggungjawap ngajar anak indu nuan nemu, baka ni bala lelaki patut ngelayan anak indu nuan. Anak indu nuan deka belajarka pekara tu nitihka dua iti chara ba baruh tu:

•   Nengah chara nuan ngelayan bini tauka indai iya. Lebuh nuan rindu sereta bebasaka bini nuan, anak indu nuan ulih beratika kualiti ti penting ke patut digiga iya, lebuh iya deka belaki dudi hari.—1 Peter 3:7.

•   Nengah chara nuan ngelayan iya. Lebuh nuan nunjukka basa ngagai anak indu nuan, nuan ngajar iya sayauka diri empu. Iya mega nemu diri patut nerima basa ti sama ari lelaki bukai.

   Enti siku apai seruran ngemaruhka anak indu iya, nya deka ngasuh iya ngasaika diri nadai guna. Tu ngujungka iya ngiga lelaki bukai, ngambika iya ulih berasai dikesayau.

   “Siku anak indu ke selalu dikesayau sereta disukung apai iya, enda senang labuh pengerindu ngagai lelaki ke enda ngembuan perangai ti manah nyadika laki.”—Wayne.