Pemansang ba teknologi, ngenyenangka agi bos, orang ke sama gawa, tauka bala klien ngiga nuan barang maya. Tu engka siti penanggul ba nuan. Nuan engka tusah deka ngembuan runding ti betul pasal kereja enggau utai ti beguna agi ba pengidup, iya nya tikah nuan.

•  Utai ke patut ditemu nuan

•  Chara ngembuan runding ti betul

•  Nama runding laki-bini ke bukai

•  Utai ke ulih dikerandauka

•   Taja pan nuan udah pulai ke rumah, tang nuan agi tetap nerima email tauka mesej ti bekaul enggau kereja. Kingatka, nya ulih ngachau awak ke patut dikena nuan enggau kaling pengidup.

   “Tusah amat deka ngiga awak begulai enggau diri sebilik. Maya nerima email tauka nama-nama utai ke bekaul enggau kereja, endang sigi nya meh ke dikemeratka, ukai ngagai kaling pengidup agi.”—Jeanette.

•   Ngambi ngembuan runding ti betul entara kereja enggau kaling pengidup, nuan patut ngaga pelan. Enti enda, kereja engka ulih ngerusak tikah nuan.

   “Utai ke keterubah ba runding nuan, ‘Enda ngawa, nemu iya deh. Iya tentu enda kiruhka pekara mit baka tu. Legi meh aku begulai enggau iya.’”—Holly.

•   Kemeratka tikah nuan. Ajar Bup Kudus: ‘Nya alai, nadai orang tau nyeraraka utai ti udah ditampilka Petara.’ (Matthew 19:6) Enti nuan enggai mensia “nyeraraka” tikah seduai laki-bini, pia mega anang nejuka kereja nyadika tiang pengerusak rumah tangga seduai.

   “Sekeda klien ngasaika diri ulih ngiga nuan ba barang maya, laban sida udah mayar nuan. Tang aku sedar, tikah aku nya meh utai ke dikemeratka aku. Nya alai, aku sigi madahka sida, aku enda kereja maya hari aku enda bekereja. Enti sida ngiga aku maya tu, aku deka malas mesej sida maya aku kereja aja.”—Mark.

   Tanya diri empu, “Kati ulah aku nunjukka tikah aku nya jauh beguna agi ari kereja aku?”

•   Berani madahka enda. Ajar Bup Kudus: “Enti nuan nemu ngemaruhka diri, nuan bepenemu-dalam.” (Jaku Dalam 11:2) Ketegal nuan baruh ati, nuan nemu tatak diri, lalu patut nulak sekeda kereja tauka minta tulung ari orang bukai.

   “Aku tukang paip. Sekeda orang amat begunaka tulung ari aku, enti enda disadang paip sida rusak ba rumah. Nyadi, enti aku enda ulih nulung ba maya sida begunaka bantu, aku madahka tukang paip ke bukai kena nulung sida.”—Christopher.

   Tanya diri empu, “Enti sekeda kereja overtime ngasuh kaling pengidup aku berasai enda dikeibuhka, kati aku sanggup nulak pengawa nya? Kati kaling pengidup aku ulih ngasaika, aku sanggup ngereja nya ke iya?”

•   Begulai ngaga pelan. Ajar Bup Kudus: “Semua utai ti nyadi di dunya ti endang nyadi ba maya ti diletak.” (Pengajar 3:1) Nuan patut ngaga pelan begulai enggau kaling pengidup nuan. Kelebih agi maya nuan kisuk. Tentuka nuan nitihka pelan nya.

   “Enti kami kisuk, kami netapka awak begulai enggau pangan diri, taja pan enda lama aja. Kami engka ngatur makai malam begulai, tauka bejalai ke pantai.”—Deborah.

   Tanya diri empu, “Kati aku netapka awak begulai enggau kaling aku, lalu nentuka nadai nama-nama utai ngachau kami? Kati kaling pengidup aku ngasaika aku sanggup ngereja nya ke iya?”

•   Tutup perengka elektronik. Ajar Bup Kudus: “Nemu milih utai ti pemadu badas.” (Pilipi 1:10) Kekadang, ulih nuan nutup perengka eletronik nuan, lalu meri awak ngagai kaling pengidup nuan?

   “Aku enggau naka ulih ngetu kereja maya abis jam kereja. Udah nya, aku nutup notifikasi talipun aku.”—Jeremy.

   Tanya diri empu, “Kati aku amat patut seruran muka talipun, ngambika bos tauka klien ulih ngiga aku? Bekaul enggau pekara tu, nama runding kaling pengidup aku?”

•    Kekadang enda ulih diseliahka. Ajar Bup Kudus: “Awakka semua orang nemu penyiru kita.” (Pilipi 4:5) Kekadang, sekeda kereja enda ulih diseliahka lalu patut ditembuka. Chunto, kereja kaling pengidup nuan engka patut seruran besedia, laban iya barang maya dikangauka gawa. Nyadi, uji meh meretika pengawa iya.

   “Laki aku bisi bisnis ti mit. Kekadang iya patut kereja lebih jam nembuka sekeda pengawa. Bisi ga maya iya aku berasai gidan meda iya gawa lebih jam. Tang aku enda ringat, laban iya tetap bisi meri awak begulai enggau aku.”—Beverly.

   Tanya diri empu, “Kati aku meretika utai ti diasaika kaling pengidup aku, lalu enda kelalu mejal iya meri awak ngagai aku? Bekaul enggau pekara tu, nama runding kaling pengidup aku?”

Keterubah, uji perundingka tanya ba baruh tu kediri. Udah nya, seduai ulih berandauka saut seduai begulai.

• Kati kala kaling pengidup nuan muchau laban nuan mai kereja ke rumah? Enti au, kati nuan mega setuju pengawa nya enda patut dikereja?

• Nama ubah ti nyemetak ke patut digaga nuan, ngambi ulih ngembuan runding ti betul pasal kereja sereta utai bukai?

• Kala nuan ngasaika kaling pengidup nuan kelalu beberatka kereja iya? Enti au, uji perundingka, kemaya utai nya nyadi?

• Nama ubah ke patut digaga kaling pengidup nuan, ngambi iya bisi ngembuan runding ti betul pasal kereja?