Bini iya tepedaka resia iya. Iya enggau bebendar minta ampun. Iya besemaya deka badu. Iya mujur badu, tang enda lama aja. Udah nya, iya berengkah baru lalu utai tu nyadi berulang-ulang kali.

 Kati nuan napi penanggul ti sama? Enti au, nuan patut nemu tebiat meda pornografi ulih meri kesan ngagai kaling nuan, lalu baka ni nuan ulih badu ngereja tebiat tu? a

Ba artikel tu

•  Utai ke patut ditemu nuan

•  Utai ke ulih dikereja nuan

•  Lebuh laki nuan meda pornografi

 Pornografi ulih ngerusak tikah. Nya ulih ngasuh kaling bedendam lalu enda ulih pechayaka kaling iya agi. b

 Utai ke diasaika bini enti laki sida meda pornografi:

•   Dikemula. Siku bini ke benama Sarah madah, “Aku ngasaika laki aku butang bekali-kali.”

•   Enda yakin. Siku bini madah, tebiat laki iya ke meda pornografi ngasuh iya ngasaika diri “enda bajik sereta ngemaluka.”

•   Enda pechaya. “Aku nyangka nyauka tiap iti pengawa laki aku,” ku siku bini ke benama Helen.

•   Irau. Siku bini ke benama Catherine ngaku, “Ketegal irauka tebiat laki aku nya, aku nyau kelalu irau ke iya lebih ari pengidup aku empu.”

 Perundingka: Bup Kudus ngajar laki patut rinduka bini. (Epesus 5:25) Tang enti laki ngereja tu, kati nya ulih ngasuh bini iya berasai dikesayau?

 Tebiat meda pornografi enda senang diketuka. Ku siku bini ke benama Stacey madah, “Laki aku udah badu nginsap, makai dadah, sereta gian ngirup. Tang, iya agi tusah badu meda pornografi.”

 Enti nuan napi penanggul ti sama, cadangan ba baruh ulih nulung nuan badu ari tebiat tu.

•   Sedar pornografi nya enda manah. Pornografi semina ngemuaska pengingin diri empu, lalu tu ulih ngerusak pengerindu, pengandal, penetap ati ke amat beguna dalam tikah. Tebiat tu mega enda ngayanka basa ngagai Penempa ke ngepunka tikah, iya nya Petara Jehovah.

   Prinsip Bup Kudus: “Awakka tikah dipebasa semua orang.”—Hebrew 13:4.

•   Betanggungjawap ke ulah diri. Anang nyebut, “Aku begunaka pornografi ketegal bini aku enda narit ati.” Enda adil nyalahka bini nuan. Laban tu ulih nyadika alasan nuan ngereja tebiat nya baru.

   Prinsip Bup Kudus: “Tang, tiap iku orang diuji lebuh pengingin iya empu ngumpan iya sereta narit ati iya.”—James 1:14.

•   Beterus-terang sereta jujur enggau kaling nuan. Siku laki ke benama Kevin madah: “Ninting hari aku nanya bini aku, sekalika aku bisi meda utai ti enda menuku? Asil iya, iya enda ngasaika aku bisi utai dilalaika ari iya.”

   Prinsip Bup Kudus: “Kami deka ngereja semua utai enggau lurus.”—Hebrew 13:18.

•   Mengkang bejaga. Tebiat tu engka ulih datai baru taja pan udah betaun-taun nuan ngetu ari tebiat tu. Munyi ku Kevin ke disebut tadi, “Aku udah ngetu meda pornografi pengelama 10 taun, lalu andal aku sigi badu ngereja nya. Tang tebiat tu ulih datai baru ba maya ti enda disangka.”

   Prinsip Bup Kudus: “Orang ke ngumbai diri bediri tegap patut bejimat, ngambika iya enda labuh.”—1 Korint 10:12.

•   Lebuh pengingin tu datai baru, berunding dulu. Enti nuan enda ulih nagang diri ari pengingin tu, nuan ulih milih sekalika nuan patut ngereja utai ke ulih nagang tebiat tu. Chara iya, nuan engka ulih berundingka pengawa bukai ngambika runding nuan ulih limpang ari tebiat tu.

   Prinsip Bup Kudus: “Tiap iku kita patut nemu nagang tubuh diri, ngambika kita mengkang kudus sereta dipebasa orang. Kita enda patut . . . enda nemu puas nurutka pengingin seks ti enda ditagang.”—1 Tesalonika 4:4, 5.

•   Seliahka diri ari utai ke ulih meransang pengingin ti salah. Jaku ke diambi ari bup Willpower’s Not Enough madah, “Enti kitai enda nyeliahka situasi ke baka nya, tu baka nuan nekiska machis lalu nikauka iya ngagai minyak api. Nyadi api nya deka nyadi mau.”

   Prinsip Bup Kudus: “Anang nejuka penyai ngalahka aku.”—Masmur 119:133.

•   Anang putus harapan. Tu begunaka timpuh ti panjai, tauka engka beberapa taun alai nuan ngasuh kaling nuan pechayaka nuan baru. Tang mayuh laki bini udah mujur ngereja tu.

   Prinsip Bup Kudus: “Orang ke bisi pengerindu nya orang ti sabar.”—1 Korint 13:4.