Bup Kudus bisi nyebut pasal orang ti ngembuan pengingin ti dalam deka ngelantangka ati Petara sereta ngembuan runding Iya. Orang ti baka nya, enggau naka ulih, idup sejalai enggau standard Petara lalu nitihka iring ari Roh Kudus Iya. a—Rome 8:5; Epesus 5:1.

 Bup Kudus nerangka bida entara orang ti ngembuan kaul enggau Petara enggau orang bukai. Ambika chunto, pasal sida ti nadai kaul enggau Petara, Bup Kudus nyebut, ‘Orang ke nadai Roh Kudus enda ulih nerima pemeri ti diberi Roh Petara’ tauka ajar ari Petara. (1 Korint 2:14-16) Pia mega, orang ke nadai Roh Kudus suah agi “kepapas, lalu belaya enggau pangan diri”. Sida enda rindu gerah jari tauka bebaik enggau orang. (1 Korint 3:1-3) Sida ke bejakuka orang lalu mechahka kaul entara pangan “diperintah pengingin dunya, sereta nadai ngembuan Roh Kudus.”—Jude 19; Jaku Dalam 16:28. b

Dalam artikel tu

•  Nama kebuah mensia ulih ngembuan kaul enggau Petara?

•  Nama kebuah beguna bendar ngembuan kaul enggau Petara?

•  Baka ni aku ulih ngemansangka kaul aku enggau Petara?

•  Kati aku begunaka pengarap enti aku deka ngembuan kaul enggau Petara?

•  Runding ti salah pasal chara ngembuan kaul enggau Petara

•  Ayat Bup Kudus pasal chara ngembuan kaul enggau Petara

 Kitai ulih ngembuan kaul enggau Petara laban kitai digaga neladan gamal Iya. (Pemungkal 1:27) Ketegal tu, mayuh ari kitai rindu belajar pasal utai ti enda ulih dipeda tauka ditegu.

 Kitai bisi penau ngayanka kualiti Petara Jehovah, c baka pemaik, pengasih, sereta enda bepilih mata. (James 3:17) Lebuh kitai bebendar nitihka pesan Jehovah, Petara nulung kitai ngembuan kaul ti manah agi enggau Iya.—Surat Kereja Rasul 5:32.

 Enti kitai ngembuan kaul ti manah enggau Petara, kitai deka bisi “pengidup enggau pemaik.” (Rome 8:6) Pemeri ari Petara tu amat berega.

•   Pengidup: Petara besemaya meri pengidup ti meruan belama iya ngagai sida ke ngembuan kaul ti manah enggau Iya.—John 17:3; Galatia 6:8.

•   Ngembuan kaul ti manah enggau Petara: Orang ti semina berundingka utai ti diguna sida empu bemunsuh ngelaban Petara. (Rome 8:7) Tang, Petara merekatka orang ti ngemansangka kaul sida enggau Iya. Sida nerima ‘pemaik Petara, ti ngelui peragam mensia.’ (Pilipi 4:6, 7) Ketegal sida ngembuan kaul ti manah enggau Petara, pengidup sida lantang agi.—Matthew 5:3.

•   Belajar lalu nitihka ajar Petara. Bacha meh Bup Kudus ti ngembuan runding Petara. Bup Kudus ditulis bala lelaki ke “dibai Roh Kudus.” (2 Peter 1:21) Utai ti dipelajar nuan ulih nulung nuan nyembah Petara “dalam Roh enggau pemendar,” diiring roh kudus nitihka peneka Petara.—John 4:24.

•   Besampi minta tulung ari Petara. (Luke 11:13) Petara deka nulung nuan ngemansangka kualiti manah ke patut diayanka orang ti ngembuan kaul enggau Iya. (Galatia 5:22, 23) Sampi mega ulih nulung nuan bulih penemu-dalam maya napi penusah.—James 1:5.

•   Begulai enggau orang bukai ti ngembuan kaul enggau Petara. Sida deka meransang nuan ngemansangka kaul nuan enggau Petara. (Rome 1:11, 12) Tang, enti nuan milih begulai enggau orang ke enda sepenemu enggau Petara, tu ulih ngachau kaul nuan enggau Iya.—James 4:4.

 Enti kitai deka ngembuan kaul enggau Petara, nitihka sesiti pengarap enda chukup. Bup Kudus madah: “Enti orang ngumbai diri orang ke bepengarap, lalu enda nagang dilah diri, tang nipu diri empu, pengarap sida nya nadai guna.”—James 1:26.

 Bup Kudus nerangka, orang ti deka ngembuan kaul enggau Petara patut nyembah Iya enggau chara ti dikedekaka Iya. Sida nemu Roh Kudus Petara siti aja. Roh Kudus Petara nya ngiring sida nyembah Petara dalam “tubuh siti aja,” iya nya seraban orang ti nyaga “penyerakup dalam Roh ngena pemaik ti nanggam kita semua.”—Epesus 4:1-4.

 Runding ti salah: Semua orang sereta jelu ulih ngembuan kaul enggau Petara.

 Ajar ti betul: Semua utai ti ditempa Petara mai puji ngagai Iya. (Masmur 145:10; Rome 1:20) Tang, semina melikat sereta mensia tau ngembuan kaul enggau Petara. Bala jelu nitihka pengasai lalu enda ulih nyadi pangan Petara. Utai ti digaga sida semina bepanggai ba utai ti diguna sida ba sehari-hari. (2 Peter 2:12) Nya kebuah Bup Kudus madahka orang ti nadai kaul enggau Petara bisi runding sebaka enggau jelu.—James 3:15; Jude 19.