Kena nemu kemaya hari ti penudi datai, kitai patut dulu nemu baka ni Bup Kudus ngena leka jaku “dunya.” Dalam leka jaku Gerika koʹsmos, kesuah iya disalin ngagai “dunya.” Leka jaku tu selalu iya mai reti, mensia. Kelebih agi orang ke enda nitihka peneka Petara. (John 15:18, 19; 2 Peter 2:5) Kekadang koʹsmos nya nerangka pasal chara pengidup mensia, baka pengarap, pengawa dagang, enggau sistem politik.—1 Korint 7:31; 1 John 2:15, 16. a

Nama reti “hari ti penudi”?

 Ba Bup Kudus, leka jaku “hari ti penudi” mega disalinka ngagai “pengujung dunya.” (Matthew 24:3) Jaku tu ukai ditujuka ngagai pengerusak ngagai bumi tauka semua mensia, tang tu pasal deka ngerusak semua chara pengidup mensia ke enda sejalai enggau peneka Petara.—1 John 2:17.

 Bup Kudus ngajar, “orang ke jai deka diburu” ngambika semua orang ke manah ulih terus idup ba dunya. (Masmur 37:9-11) Pengerusak tu deka nyadi maya “penusah ti besai”, sereta ba maya perang Armagedon nyadi.—Matthew 24:21, 22; Pemandang 16:14, 16.

Kemaya “hari ti penudi”?

 Jesus madahka, ‘Nadai orang nemu hari tauka jam utai tu deka nyadi. Semina Apai aja nemu.’ (Matthew 24:36, 42) Pia mega Jesus bisi nyebut, hari nya deka datai ba maya ti enda disadang. Iya nya “ba jam ti enda disangka kita.”—Matthew 24:44.

 Taja pan kitai enda nemu hari berapa sereta jam iya, Jesus bisi madahka kitai “tanda” tauka utai ke deka nyadi sebedau hari ti penudi nya datai. (Matthew 24:3, 7-14) Ba Bup Kudus semina madahka tu “hari ti penudi” enggau “pengujung dunya.”—Daniel 12:4; 2 Timoti 3:1-5.

Ba hari ti penudi, kati semua mensia sereta bumi tu deka abis dirusak?

 Enda. Bumi kitai tetap bisi laban Bup Kudus bisi madahka, “Nuan udah ngengkahka dunya tegap ba pugu iya, lalu iya enda dikinsitka.” (Masmur 104:5) Bumi tu mega deka penuh enggau mensia baka ke dipadahka dalam Bup Kudus, “Orang ke lurus deka bempu menua tu lalu diau ditu belama iya.” (Masmur 37:29) Sejalai enggau tuju asal Petara, Iya deka ngubah utai tu:

•   Paradais.—Isaiah 35:1; Luke 23:43.

•   Pemaik sereta pengelikun.—Mikah 4:4.

•   Semua orang bisi pengawa ti manah sereta ngemuaska ati.—Isaiah 65:21-23.

•   Bibas ari penyakit sereta meruan biak.—Job 33:25; Isaiah 33:24.