Jehovah Petara ti bendar ke disebut dalam Bup Kudus. Iya nempa semua utai. (Pemandang 4:11) Nabi Abraham, Moses enggau Jesus, nyembah Iya. (Pemungkal 24:27; Pemansut 15:1, 2; John 20:17) Jehovah nya Petara ke “semua dunya.”—Masmur 47:2.

 Jehovah nya nama Petara ke ditulis dalam Bup Kudus. (Pemansut 3:15; Masmur 83:18; Peda Jaku Penerang dalam Bup Kudus Baru enggau NWT) Nama Jehovah datai ari jaku Hebrew ke mai reti “nyadi.” Sekeda pakar madah, reti nama nya “Iya ti Ngasuh Nyadi.” Pekara tu sejalai enggau pengawa ke digaga Jehovah ke nyadi Penempa sereta Pengamat tuju Iya. (Isaiah 55:10, 11) Bup Kudus nulung kitai lebih agi ngelala Jehovah sereta kualiti Iya ti pemadu nyulut iya nya pengerindu.—Pemansut 34:5-7; Luke 6:35; 1 John 4:8.

 Nama Jehovah dalam jaku Hebrew ditulis ngena empat iti urup יהוה (YHWH), ke dikumbai Tetragrammaton. Sebut ti betul ke nama Hebrew kelia tu enda ditemu. Tang dalam jaku Iban nama Jehovah ditulis enggau chara nulis ti sebaka, lalu udah dikena kenyau ari suba. a

Nama kebuah chara nyebut nama Petara dalam jaku Hebrew kelia enda ditemu?

 Jaku Hebrew kelia ditulis ngena urup konsenan aja, nadai ngena urup vokal. Bala pemacha jaku Hebrew ulih nepuka urup vokal ti engkeman enggau mudah. Pengudah Bup Kudus begian Hebrew (“Sempekat Lama”) tembu, sekeda orang Judah berengkah pechaya utai ti salah ke madahka nya salah enti nyebut nama Petara. Lebuh macha ayat Bup Kudus ke ngembuan nama Petara, sida nganti nama nya enggau gelar “Tuan” tauka “Tuhan.” Nyau kelama, penemu ti salah tu ngelekai ngagai mayuh endur, lalu chara asal nyebut nama Petara mega lenyau. b

 Bisi sekeda orang ke madahka chara nyebut nama Petara nya “Yahweh,” tang bisi orang mega ke madahka chara nyebut ti bukai. Gulung Surat Tasik Mati bisi begian ari bup Adat Lewi dalam jaku Gerika ke nyalin nama Petara nitihka chara nyebut ti asal iya nya Iao. Kelimpah ari nya, penulis Gerika kelia mega ngumbai nama Petara engka disebut baka Iae, I·a·beʹ, enggau I·a·ou·eʹ, taja pia nadai bukti ke nunjukka chara nyebut tu dikena ba jaku Hebrew kelia.

Penemu ti salah pasal nama Petara dalam Bup Kudus

 Penemu ti Salah: Nama Petara enda patut dikena dalam Bup Kudus laban chara nyebut ti asal dalam jaku Hebrew enda ditemu.

 Utai ti Bendar: Orang ke ngembuan penemu tu pechaya Petara deka semua orang nyebut nama Iya enggau chara ti sama enda ngira bansa jaku ke dikena sida. Taja pia, Bup Kudus nunjukka penyembah Petara ngena chara nyebut ti enda sebaka ke nama orang ti sama nitihka bansa jaku ke dikena.

 Ambika chunto, peratika nama Hakim Josua. Orang Kristian abad keterubah ke ngena jaku Hebrew nyebut nama nya Yehoh·shuʹaʽ, tang orang ke ngena jaku Gerika nyebut nama Iya, I·e·sousʹ. Ba Bup Kudus, nama Josua ke datai ari jaku Hebrew udah disalin ngagai jaku Gerika. Nya alai orang Kristian maya nya ngaga pemutus ti betul. Sida ngena chara nyebut ke suah dikena dalam bansa jaku sida.—Surat Kereja Rasul 7:45; Hebrew 4:8.

 Chara nyalin ke baka tu mega ulih dikena ba nama Petara. Tang utai ti pemadu beguna ukai chara nyebut nama Petara. Tang nama nya patut dijaga dalam Bup Kudus.