Nadai. Bup Kudus nadai ngajar “sekali selamat, selamat belama iya.” Seseiku orang ulih lenyau pengarap ngagai Jesus Kristus sereta peluang deka diselamatka. Bup Kudus kala madah, seseiku orang patut “bebendar gawa ke pengarap” ngambi ulih selamat. (Jude 3, 5) Orang Kristian ba abad keterubah ke arapka Jesus diasuh: “Kelebih agi lebuh aku enda begulai enggau kita, awakka kita bekereja enggau ati ti nangi sereta getar-getar ngenyukupka pengelepas kita.”—Pilipi 2:12

Nadai ayat Bup Kudus ke nyukung rambai jaku “sekali selamat, selamat belama iya”

•   Bup Kudus nangkan pasal dosa ke ngujungka seseiku orang enda ulih bempu Perintah Petara. (1 Korint 6:9-11; Galatia 5:19-21) Enti amat seseiku orang nya tentu ulih selamat, jaku tangkan tu deka nyadi lebu ngapa. Tang, Bup Kudus nunjukka seseiku orang ke udah diselamatka ulih ngereja dosa lalu limpang ari pemendar. Ngambika chunto, ba Hebrew 10:26 madah: ‘Enti kitai sengaja majak bedosa lebuh kitai udah nerima penemu pasal pemendar, kitai nadai agi pemeri pengampun dosa.’—Hebrew 6:4-6; 2 Peter 2:20-22.

•   Jesus nerangka guna tetap ngembuan pengarap nengah siti sempama. Ba sempama tu, Jesus digambarka siti pun anggur lalu nembiak iya dan pun anggur. Sekeda ari nembiak Jesus mansutka buah, tauka ngereja ulah ti manah. Tang udah nya, sida enda ulih ngereja nya agi lalu baka dan ke “deka digumpul, ditikauka ngagai api lalu ditunu.” Reti iya, sida enda ulih diselamatka agi. (John 15:1-6) Rasul Paul mega ngena sempama ti sama ke madahka, orang Kristian ke nadai agi ngembuan pengarap baka ‘dan ke udah ditetak.’—Rome 11:17-22.

•   Orang Kristian seruran dilalau ngambika “bejaga.” (Matthew 24:42; 25:13) Orang ke ngereja pengawa ba pemetang tauka orang ke enda ngereja pengawa ke diasuh Jesus sempama benung tinduk ba pengarap. Tu ulih ngujungka sida enda ulih diselamatka.—Rome 13:11-13; Pemandang 3:1-3.

•   Mayuh ayat Bup Kudus nunjukka, sida ke deka selamat patut tetap ati nyentukka ujung. (Matthew 24:13; Hebrew 10:36; 12:2, 3; Pemandang 2:10) Orang Kristian abad keterubah gaga ati, lebuh sida nemu menyadi ke sama pengarap mengkang tetap ati. (1 Tesalonika 1:2, 3; 3 John 3, 4) Nya alai, enti orang ke enda tetap ati agi ulih diselamatka, kati nya beguna Bup Kudus majak beberatka pasal guna mengkang tetap ati nyentukka ujung?

•   Lebuh Paul nemu diri deka mati enda lama da agi, baru meh iya nemu iya tentu ulih selamat. (2 Timoti 4:6-8) Sebedau nya, iya nemu diri udah diuji pengingin tubuh, lalu iya ngumbai diri enda ulih diselamat. Nya kebuah iya nulis: “Aku mandam tubuh aku lalu ngaga iya nyadi ulun aku, enggai ke aku enda bulih prais lebuh aku udah nusui Berita Manah ngagai orang bukai.”—1 Korint 9:27; Pilipi 3:12-14.