Dua Korint 8:1-24
8 Bala menyadi, diatu kami deka kita nemu pasal pemanah ati Petara ti besai ke udah diayanka ngagai bala raban gempuru ba Masedonia.
2 Lebuh sida merinsa sereta napi penguji ti balat, sida agi ngayanka pengaga ati ti besai. Lalu sida amat gerah jari,* taja pan sida balat seranta.
3 Aku empu ulih nyadi saksi. Sida meri nitihka ulih diri, indah sida meri lebih ari ke ulih diberi sida.
4 Sida empu majak minta ari kami enggau bebendar ngambika sida bulih basa enggau peluang, kena meri utai sereta ngambika sida ulih sama enggau nulung nembiak Petara ti kudus.
5 Utai ke dikereja sida lebih ari ke dijangka kami. Sejalai enggau peneka Petara, sida enggau pengabis ati gawa ke Tuan sereta nulung kami.
6 Nya alai, laban Titus udah berengkah ngumpul pemeri ari kita ti manah ati, kami meransang iya ngambika nembuka pengawa nya.
7 Kita udah ngereja semua utai enggau manah amat. Pengarap kita tegap, kita landik bejaku, kita mayuh penemu, kita bebendar ngereja semua utai, lalu kita rinduka orang bukai baka kami ke rinduka kita. Nya alai, kami mega ngarapka kita meri bantu enggau gerah jari.
8 Utai ke disebut aku ukai atur ke patut dititihka kita. Aku semina deka kita nemu pasal orang bukai ke benung bebendar ngereja utai, lalu aku mega deka nguji sekalika pengerindu kita amat tauka enda.
9 Kita nemu pemanah ati ti besai ke diayanka Tuan kitai, Jesus Kristus. Taja pan iya kaya, iya nyadi seranta ke penguntung kita, ngambika kita nyadi kaya nengah penyeranta iya.
10 Aku madahka runding aku pasal pekara tu: Pengawa tu mai penguntung ke kita. Setaun ti udah, kita ukai aja bisi ati deka ngereja pengawa tu, tang indah kita udah berengkah ngereja iya.
11 Nyadi diatu, tembuka meh pengawa nya. Ketegal sebedau tu kita sanggup ngereja pengawa nya, nya alai tembuka meh pengawa nya enggau naka ulih kita.
12 Orang ke meri ari ati ngagaka ati Petara, laban Petara deka orang meri nitihka utai ke dikemisi diri, ukai utai ke enda dikemisi diri.
13 Aku ukai deka ngelantangka orang bukai lalu ngenusahka kita.
14 Aku semina deka kita bela bisi utai ke diguna. Kita ke bisi mayuh utai ulih nulung sida ke mimit utai, ngambika sida ke mayuh utai ulih nulung kita ke mimit utai.
15 Baka ke udah ditulis ba Bup Kudus: “Orang ke bepemisi enda ngembuan kelalu mayuh utai, lalu orang ke enda bepemisi enda ngembuan kelalu mimit utai.”
16 Terima kasih ngagai Petara, laban Titus mega balat ibuhka kita baka kami.
17 Iya ukai aja ngereja utai ke dipinta kami, tang iya empu ke keran deka ngereja nya. Nya alai, iya empu ke deka mansang ngagai kita.
18 Kami mega nganjung siku menyadi lelaki enggau iya kin. Menyadi nya dipuji semua raban gempuru, ketegal utai ke dikereja iya ke Berita Manah.
19 Nambahka nya, iya udah dipilih bala raban gempuru ngambika sama enggau kami nyadung pemeri nya. Kami ngereja nya kena ngemuliaka Tuan kitai sereta nunjukka kami sanggup mantu orang bukai.
20 Nya alai, kami bejimat lebuh ngatur pemeri ke diberi kita enggau gerah jari, ngambika orang enda ulih nyalahka kami.
21 Kami ‘ngatur semua utai enggau lurus, ukai aja ba mua Jehovah tang mega ba mua mensia.’
22 Nambahka nya, kami mega nganjung siku agi menyadi lelaki kitai enggau seduai iya. Kami suah nguji iya, lalu beratika iya bagas ngereja pengawa. Ketegal iya amat andalka kita, nya alai diatu, iya deka bagas agi ngereja pengawa.
23 Enti bisi utai ke deka ditanya pasal Titus, padahka meh iya kaban aku, ke sama enggau aku gawa ke penguntung kita. Enti bisi utai ke deka ditanya pasal menyadi ke enggau iya, padahka meh seduai iya rasul ba raban gempuru ke ngemuliaka Kristus.
24 Nya alai, ayanka meh pengerindu kita ngagai sida, lalu tunjukka ngagai bala raban gempuru kebuah kami temegahka kita.
Nota Kaki
^ Tauka “Lalu pengerah jari sida belimpah.”
