Dua Tesalonika 3:1-18
3 Ke pengujung iya, bala menyadi, anang ngetu besampi ke kami, ngambika jaku Jehovah terus jampat ngelekai sereta dimuliaka, baka ke nyadi ba bala kita.
2 Besampi mega ngambika kami diselamatka ari orang ti balat jai, laban ukai semua orang arap.
3 Tang Tuan kitai tetap ati, lalu iya deka ngeringka kita sereta nyaga kita ari Sitan.*
4 Nambahka nya, kami, nembiak Tuan, andal kita benung ngereja utai ke dipesan kami, lalu kita deka terus ngereja nya.
5 Ngarapka Tuan terus mujur ngiring ati kita, ngambika kita rinduka Petara sereta betan ketegal Kristus.
6 Diatu, bala menyadi, dalam nama Tuan kitai, Jesus Kristus, kami ngasuh kita ngenyauhka diri ari tiap iku menyadi ke enda ngasi* sereta ke enda nitihka utai ke diajar* kami ngagai kita.*
7 Kita empu nemu baka ni kita patut neladan kami, laban kami seruran idup enggau chara ti patut lebuh begulai enggau bala kita.
8 Kami mega enda kala enda bebayar lebuh makai.* Tang kami bagas sereta enda ngetu gawa siang malam, laban kami enggai balat nating sapa-sapa ari bala kita ketegal ngintu kami.
9 Kami bisi hak minta, tang kami enggai ngereja nya, laban kami deka nyadi teladan ke ulih dititihka kita.
10 Kebendar iya, lebuh kami enggau kita, kami kala meri pesan tu: “Barang sapa ke enggai gawa, enda ibuh makai.”
11 Kami bisi ninga, sekeda ari bala kita enda ngasi.* Sida balat enggai gawa, tang rindu masuk champur enggau pengawa orang.
12 Dalam nama Tuan Jesus Kristus, kami ngasuh sereta ngelalau orang ke baka nya ngambika diau diri, lalu gawa ngulihka pemakai ke diri empu.
13 Tang bala menyadi, anang meh leju* ngereja pengawa ti manah.
14 Enti bisi orang enda ngasika jaku kami ba surat tu, bejimat meh enggau* orang nya, lalu badu agi begulai enggau iya, ngambika iya nemu malu.
15 Taja pia, anang ngumbai iya munsuh kita. Tang terus meh ngelalau iya laban iya agi menyadi kita.
16 Ngarapka Tuan pengelantang seruran meri kita pengelantang ba semua pekara. Ngarapka Tuan kitai bisi enggau semua kita.
17 Aku, Paul, ngirumka salam ngagai kita, lalu tu ditulis aku empu. Baka tu meh chara aku nulis semua surat aku ngambika kita nemu aku meh ke nulis iya.
18 Ngarapka pemanah ati ti besai ari Tuan kitai, Jesus Kristus, bisi enggau semua kita.
Nota Kaki
^ Jaku Asal, “iya ti jai.”
^ Tu ulih ditujuka ngagai sida ke enda idup sejalai enggau prinsip Petara.
^ Tauka “pesan.”
^ Tauka engka, “sida.”
^ Tauka “enda kala makai pechuma.”
^ Tu ulih ditujuka ngagai sida ke enda idup sejalai enggau prinsip Petara.
^ Tauka “putus asa.”
^ Jaku Asal, “tanda meh.”
