Josua 24:1-33
24 Udah nya, Josua ngempuruka semua raban bansa Israel ba Shikem. Iya ngangauka bala tuai orang Israel, bala tuai raban bansa, bala hakim, enggau bala pegawai. Sida bediri ba depan Petara ti bendar.
2 Ku Josua madah ngagai semua orang: “Tu meh utai ke dipadahka Jehovah, Petara orang Israel: ‘Kelia menya, aki ini kita, nyengkaum Terah, iya nya apai Abraham enggau Nahor, diau ba seberai Sungai Eupratis. Sida kala nyembah petara-petara bukai.
3 “‘Pengudah sesiti timpuh, Aku mai aki kita, Abraham, ari seberai Sungai Eupratis, ngasuh iya bejalai ba serata menua Kanaan, lalu ngasuh peturun iya nyadi mayuh. Aku meri iya Isak,
4 lalu Aku meri Jakop enggau Esau ngagai Isak. Udah nya, Aku meri Gunung Seir ngagai Esau. Tang Jakop enggau bala anak iya mupuk ngagai Ejip.
5 Udah nya, Aku nganjung Moses enggau Aron, lalu Aku ngasuh menua Ejip ditinggang penulah. Udah nya, Aku mai kita pansut ari menua nya.
6 Lebuh Aku mai bala apai kita pansut ari menua Ejip, orang Ejip begagaika sida ngena kerita kuda enggau raban soldadu ke nepan kuda sampai ngagai Tasik Mirah. Lebuh sida iya datai ba tebing tasik,
7 sida ngangauka Aku, Jehovah, minta tulung. Nya alai, Aku ngengkahka pemetang ba entara sida enggau orang Ejip, lalu ngasuh orang Ejip tengelam ba tasik. Kita empu udah meda utai ke digaga Aku ba menua Ejip. Udah nya, kita diau ba menua puang betaun-taun.
8 “‘Aku lalu mai kita ngagai menua orang Amor, ke ba sepiak timur Sungai Jordan. Sida beperang ngelaban kita. Tang Aku nyerahka sida ngagai jari kita, lalu munuh sida ngambika kita ulih ngempu menua sida.
9 Udah nya, raja Moap, iya nya Balak anak Sipur, angkat ngelaban orang Israel. Iya minta Balam anak Beor datai, lalu ngasuh iya nyumpah kita.
10 Tang Aku enda mendingka Balam. Nya alai, iya merekatka kita bekali-kali, lalu Aku nyelamatka kita ari jari iya.
11 “‘Udah nya, kita meraka Sungai Jordan lalu datai ba Jeriko. Bala ketuai* Jeriko, orang Amor, orang Peris, orang Kanaan, orang Het, orang Girgas, orang Ibi, enggau orang Jebus beperang ngelaban kita. Tang Aku udah nyerahka sida ngagai kita.
12 Sebedau kita datai, Aku udah ngasuh sida lemi semengat,* lalu sida iya pan rari ari kita, baka ke udah nyadi ngagai dua iku raja orang Amor. Nya nyadi ukai ketegal pedang enggau panah kita.
13 Aku udah meri kita menua, lalu kita enda ibuh bebendar ngulihka menua nya. Aku meri kita kuta-kuta ke enda digaga kita, lalu kita diau ba dia. Kita mega makai buah anggur enggau buah kana ari ladang ke enda ditanam kita.’
14 “Nya alai, ayanka basa ti besai ngagai* Jehovah, lalu sembah meh Iya enggau setia* sereta enggau ati ti tuchi.* Buai semua petara-petara ke disembah aki ini kita ba seberai Sungai Eupratis enggau ba menua Ejip, lalu sembah meh Jehovah.
15 Enti kita ngasaika nyembah Jehovah nya ukai utai ti manah, pilih meh seharitu, ni bagi petara ke deka disembah kita, sekalika nya petara-petara ke disembah aki ini kita ba seberai Sungai Eupratis, tauka petara-petara orang Amor ba menua alai kita diau diatu. Tang aku enggau kami sebilik, kami sigi deka nyembah Jehovah.”
16 Ku orang Israel nyaut: “Kami nadai kala berunding deka ninggalka Jehovah, lalu nyembah petara bukai.
17 Petara kitai, Jehovah meh ke mai kitai enggau apai kitai pansut ari Ejip, menua alai kitai nyadi ulun. Iya udah ngereja pengawa ti amat luar biasa ba depan mata kitai. Iya mega nyaga kitai ba sepemanjai pejalai kitai, sereta nyaga kitai lebuh kitai nengah menua bansa bukai.
18 Jehovah pan udah muru semua orang, nyengkaum orang Amor ke udah diau ba menua tu dulu ari kitai. Nya alai, kami mega deka nyembah Jehovah laban Iya meh Petara kitai.”
19 Udah nya, Josua bejaku ngagai orang Israel: “Amat kita deka terus nyembah Jehovah? Iya Petara ti kudus. Iya Petara ke dekaka kita nyembah Iya siku aja. Enti kita enda ngereja nya, Iya enggai ngampunka penyalah* enggau dosa kita.
20 Enti kita ninggalka Jehovah lalu nyembah petara bukai, Iya mega deka ngelaban kita lalu munuh kita, taja pan sebedau tu Iya manah enggau kita.”
21 Tang ku orang Israel nyaut Josua: “Enda! Semina Jehovah aja ke deka disembah kami.”
22 Ku Josua bejaku ngagai sida: “Kita empu meh ke udah milih nyembah Jehovah. Nyadi, kita meh ke nyadi saksi ke diri empu pasal nya.” Ku orang Israel nyaut: “Au. Kami meh ke nyadi saksi.”
23 “Enti pia, buai petara-petara bukai ke bisi ba bala kita, lalu sembah meh Jehovah, Petara orang Israel, enggau pengabis ati kita.”
24 Ku orang Israel nyaut Josua: “Kami deka nyembah Petara kitai, Jehovah, lalu kami deka ngasika Iya!”
25 Nya alai ba hari nya, Josua ngaga sempekat enggau orang Israel ba Shikem, lalu iya netapka atur ke sida.
26 Josua lalu nuliska semua nya ba bup Adat Petara. Udah nya, iya ngambi batu ti besai lalu ngengkahka batu nya ba baruh pun kayu ti besai, ke semak enggau endur ke dikuduska Jehovah.
27 Josua lalu bejaku ngagai sida: “Peda kita! Batu tu deka nyadi saksi kitai, laban iya udah ninga semua utai ke dipadahka Jehovah ngagai kitai. Batu tu mega deka nyadi saksi ke kita ngambika kita enda madahka diri enda ngelala Petara kita.”
28 Udah nya, Josua ngasuh sida pulai ngagai menua sida empu.
29 Enda lama udah nya, nembiak Jehovah, Josua anak Nun, mati lebuh iya beumur 110 taun.
30 Nyadi, iya dikuburka ba tanah pesaka iya empu, ba Timnat-serah ke ba kawasan gunung Efraim, ba sepiak utara Gunung Gaas.
31 Orang Israel terus nyembah Jehovah ba sepemanjai pengidup Josua. Sida mega terus nyembah Iya pengudah Josua mati, sereta ba sepemanjai pengidup bala tuai ke udah meda semua utai ke digaga Jehovah ke orang Israel.
32 Tulang Josep ke dibai orang Israel ari menua Ejip dikuburka ba Shikem, ba tanah ke dibeli Jakop ari peturun Hamor, iya nya apai Shikem. Tanah nya dibeli Jakop ngena rega 100 singkap duit pirak. Tanah nya meh ke diempu bala peturun Josep.
33 Eleasar anak Aron mega mati. Iya dikuburka ba Bukit Pinehas ba kawasan gunung Efraim, iya nya bukit ke diempu anak iya, Pinehas.
Nota Kaki
^ Tauka engka, “Orang ke ngempu menua.”
^ Tauka engka, “balat kesal; takut.”
^ Tauka “Nya alai, nangika.”
^ Tauka “sembah meh Iya dalam pemendar.”
^ Tauka “enggau chara ti nadai bepenyalah.”
^ Tauka “enggai ngampunka kita ke ngelaban.”
