Pemungkal 19:1-38
19 Dua iku melikat nya datai ba Sodom maya lemai hari. Maya nya, Lot benung duduk ba pintu penama Sodom. Iya mansang ngagai seduai iya, besugang lalu ngendukka pala iya.
2 Ku Lot bejaku: “Tuan, aram ngagai rumah aku. Awakka kami masu kaki seduai, lalu seduai ulih bemalam ba rumah aku. Pagila, seduai ulih dani tumu lalu neruska pejalai seduai.” Ku seduai iya nyaut: “Enda ibuh. Kami duai deka bemalam ba dataran.”
3 Tang Lot majak ngasuh seduai iya ngagai rumah iya. Nya alai seduai iya pan nitihka Lot. Udah nya, Lot mai seduai iya makai. Iya manggang roti ti enda beragi, lalu sida pan makai.
4 Sebedau sida tinduk, semua lelaki ba Sodom, enda ngira ke biak tauka tuai, datai ngelingi rumah Lot.
5 Sida majak ngangauka Lot: “Dini lelaki ke datai ngagai rumah nuan lemai tadi? Bai pansut seduai iya, ngambika kami ulih ngereja pengawa seks enggau seduai iya!”
6 Lebuh Lot pansut betemu enggau sida, iya lalu nutup pintu rumah iya.
7 Ku Lot nyaut: “Anang baka nya madi. Anang ngereja utai ti jai baka tu.
8 Aku bisi dua iku anak indu ke nadai kala besetubuh* enggau lelaki. Awakka aku mai seduai iya pansut kitu. Barang ku kita meh ngereja nama-nama utai ngagai seduai iya. Tang anang ngereja utai ngagai dua iku lelaki nya, laban seduai iya temuai aku lalu aku patut nyaga seduai iya.”
9 Ku sida madah: “Anang ngempang kami! Nuan nya semina orang asing ba menua kami. Berani amat nuan ngerara kami! Kami deka merinsaka nuan balat agi ari dua iku lelaki nya.” Sida ngeju Lot lalu deka mechahka pintu.
10 Tang dua iku lelaki ke ba dalam rumah nya narit Lot ke dalam, lalu nutup pintu.
11 Udah nya, seduai iya lalu ngasuh semua orang ke ba luar rumah nya, enda ngira sida ke biak tauka tuai, buta magang. Semua sida ke lelaki nya nyau lelak begigaka pintu rumah nya.
12 Ku dua iku lelaki nya nanya Lot: “Sapa agi bala nuan ke bisi ba ditu? Enti nuan bisi menantu lelaki, anak lelaki tauka anak indu, sereta kaban belayan ke bukai, bai sida pansut ari kuta tu.
13 Kami deka nganchurka kuta tu laban Jehovah udah ninga mayuh jaku putap pasal kuta tu. Nya meh kebuah Jehovah nganjung kami duai nganchurka kuta tu.”
14 Nya alai, Lot pansut lalu bejaku enggau bakal menantu iya: “Jampat! Pansut seduai ari tempat tu, laban Jehovah deka nganchurka kuta tu.” Tang seduai iya ngumbai Lot benung betundi.
15 Lebuh mata panas nyauka tumbuh, dua iku melikat nya ngansak Lot: “Jampat! Bai bini enggau dua iku anak indu nuan, ke diau begulai enggau nuan, ngambika kita enda mati lebuh kuta tu dirusak ketegal dosa iya.”
16 Tang Lot enda beguai mupuk. Nya alai, Jehovah ngayanka pengasih ngagai iya. Dua iku melikat nya lalu megai jari Lot, megai jari bini iya, enggau megai jari dua iku anak indu iya, lalu mai sida pansut ari kuta nya.
17 Sepengudah dua iku melikat nya mai sida menyanak pansut ari kuta nya, siku ari melikat nya bejaku: “Rari kita ngambika kita ulih idup! Anang malik ke belakang lalu anang ngetu ba dini-dini endur seagi-agi endur nya ba kawasan Jordan. Rari meh ngagai kawasan gunung ngambika kita enda kena bunuh!”
18 Ku Lot nyaut seduai iya: “Jehovah, anang ngasuh kami kin.
19 Nuan udah kasihka nembiak Nuan tu. Nuan udah amat manah ati enggau aku* lebuh Nuan nyelamatka nyawa aku. Tang aku takut ka rari kin, enggaika bisi penusah nyadi lalu aku mati din.
20 Bisi siti kuta ti mit enda jauh ari tu. Awakka aku rari kin ngambika aku ulih selamat. Kuta nya mit aja.”
21 Ku melikat* nya nyaut: “Au. Aku deka nitihka peminta nuan. Enda aku ngerusak kuta ke disebut nuan nya.
22 Jampat! Rari nuan kin. Aku enda ulih ngereja sebarang utai sebedau nuan datai din.” Nya alai kuta nya dikumbai Soar.*
23 Mata panas udah tumbuh lebuh Lot datai ba Soar.
24 Udah nya, Jehovah ngasuh api enggau merirang* labuh baka ujan ninggang Sodom enggau Gomorah. Utai nya labuh ari langit, ari Jehovah.
25 Petara nganchurka Sodom enggau Gomorah. Semua kawasan ba dia anchur magang, nyengkaum semua orang ke diau ba dia sereta utai tumbuh.
26 Tang bini Lot, ke nitih iya ari belakang, malik ke belakang, lalu iya nyadi tiang garam.
27 Abraham dani tumu pagi, lalu mansang ngagai endur alai iya udah bediri sereta bejaku enggau Jehovah.
28 Lebuh iya malik ngagai Sodom enggau Gomorah sereta semua kawasan Jordan, iya tekenyit meda asap tebal ba endur nya, baka asap tebal ke pansut ari serumbung api.
29 Petara agi ingatka utai ke disebut Iya ngagai Abraham. Nya alai Iya nyelamatka Lot, ke diau ba endur nya, sebedau Iya nganchurka kuta-kuta ba kawasan Jordan nya.
30 Lot takut diau ba Soar. Nya alai, iya enggau dua iku anak indu iya ninggalka Soar. Sida pindah ngagai kawasan gunung lalu diau ba dalam lubang gua.
31 Ku anak tuai Lot bejaku ngagai menyadi iya: “Apai tua udah tuai lalu nadai lelaki ba menua tu ke ulih kawin enggau tua, baka ke biasa digaga orang bukai.
32 Aram tua ngasuh apai ngirup wain. Udah nya, tua tinduk* enggau iya ngambika tua ulih neruska peturun iya.”
33 Malam nya, seduai iya meri mayuh wain ngagai apai seduai iya nyentukka iya mabuk. Udah nya, anak Lot ke tuai besetubuh enggau apai iya. Tang Lot enda nemu anak iya udah besetubuh enggau iya.
34 Ba hari siti, anak ke tuai nya madah ngagai menyadi iya: “Aku udah tinduk enggau apai malam tadi. Malam tu, tua meri iya wain baru. Udah nya, nuan tinduk enggau iya ngambika tua ulih neruska peturun iya.”
35 Malam nya, seduai iya mega meri apai seduai iya mayuh wain nyentukka iya mabuk. Udah nya, anak Lot ke biak besetubuh enggau iya. Tang Lot enda nemu anak iya udah besetubuh enggau iya.
36 Nya alai, kedua-dua anak indu Lot ngandungka anak apai seduai iya.
37 Anak ke tuai ngadaka siku anak lelaki, lalu meri anak nya nama Moap. Orang bansa Moap ke diatu datai ari iya.
38 Anak ke biak mega ngadaka siku anak lelaki, lalu iya meri anak nya nama Ben-ami. Orang bansa Amon ke diatu datai ari Ben-ami.
Nota Kaki
^ Iya nya, pengawa seks entara siku lelaki enggau siku indu.
^ Tauka “amat setia ngayanka pengerindu ngagai aku.”
^ Iya nya, melikat ke ngarika Petara.
^ Reti nya “Mit.”
^ Nya merujuk ngagai sebengkah batu ke senang angus.
^ Tauka “besetubuh.”
