Pemungkal 35:1-29
35 Udah nya, ku Petara bejaku enggau Jakop: “Angkat, lalu mupuk nuan ngagai Bethel, lalu diau ba dia. Gaga siti alta ke Aku ba dia. Aku tu Petara ti bendar ke ngayanka Diri ngagai nuan, lebuh nuan ngerarika diri ari menyadi nuan Esau.”
2 Jakop lalu bejaku enggau sida sebilik sereta semua orang ke enggau iya: “Buai semua patung petara pelesu ke disimpan kita. Tentuka kita tuchi, lalu tukar gari kita.
3 Aram kitai angkat lalu mupuk ngagai Bethel. Ba dia, aku deka ngaga siti alta ke Petara ti bendar. Iya udah ninga sampi aku lebuh aku dituntung penusah. Lalu Iya seruran enggau aku enda ngira kini ke penunga aku.”
4 Nya alai, sida meri ngagai Jakop semua patung petara pelesu ke disimpan sida. Sida mega meri antin sida ngagai iya. Udah nya, Jakop nanam semua utai nya ba baruh siti pun kayu ti besai semak Shikem.
5 Lebuh sida ba rantau jalai, Petara ngasuh orang ke diau ba kuta-kuta ke ngelingi sida berasai takut. Nya alai, sida enda begagaika bala anak Jakop lalu nyerang sida.
6 Jakop sereta semua sida ke enggau iya pan datai ba Lus, iya nya Bethel, ba menua Kanaan.
7 Ba dia, iya ngaga siti alta lalu ngangauka tempat nya El-bethel,* laban ba dia meh Petara ti bendar udah ngayanka Diri ngagai iya lebuh iya ngerarika diri ari menyadi iya.
8 Udah nya, Deborah, indu ke nyaga Rebekah ari mit, pan mati. Iya dikuburka ba baruh pun kayu oak, semak Bethel. Nya kebuah Jakop meri pun kayu nya nama Alon-bakut.*
9 Lebuh Jakop pansut ari Padan-aram, Petara ngayanka Diri baru ngagai Jakop lalu merekatka iya.
10 Ku Petara bejaku ngagai iya: “Nama nuan Jakop. Tang diatu, nama nuan ukai agi Jakop, tang Israel.” Petara lalu berengkah ngangauka iya Israel.
11 Petara mega madah ngagai iya: “Aku tu Petara ti Pemadu Bekuasa. Awakka peturun nuan beranak betelesak lalu majak mayuh. Mayuh bengkah bansa deka datai ari nuan, lalu sekeda ari peturun nuan deka nyadi raja.
12 Menua ke udah diberi Aku ngagai Abraham enggau Isak mega deka diberi Aku ngagai nuan enggau peturun nuan.”
13 Pengudah Petara bejaku enggau Jakop, Petara pan mupuk ninggalka iya.
14 Nya alai, Jakop nirika siti batu pengingat ba tempat alai Petara udah bejaku enggau iya. Iya lalu nuang wain ba batu nya nyadika pemeri ngagai Petara. Udah nya, iya nuangka minyak ba atas batu nya.
15 Jakop agi ngangauka tempat nya Bethel, laban ba dia meh Petara udah bejaku enggau iya.
16 Udah nya, sida mupuk ari Bethel. Sebedau sida datai ba Eprat, Rachel lalu pedis perut deka beranak. Tang iya tusah amat deka ngadaka anak iya.
17 Lebuh Rachel balat pedis, ku indu bidan bejaku: “Anang takut, laban nuan deka ngadaka siku da agi anak lelaki.”
18 Maya Rachel nyauka mati, iya nya sebedau iya ngapuska seput iya, iya meri anak nya nama Ben-oni.* Tang Jakop meri anak nya nama Benjamin.*
19 Pengudah Rachel mati, iya dikuburka ba jalai ke nuju ngagai Eprat, iya nya Betlehem.
20 Jakop ngengkahka sigi batu ti besai kena nandaka tempat alai Rachel dikuburka. Batu nya agi mengkang bisi ba tempat nya nyentukka seharitu.
21 Udah nya, Israel mupuk ari endur nya lalu nirika langkau kain iya ngilah menara Eder.
22 Bisi sekali, lebuh Israel diau ba menua nya, Reuben besetubuh* enggau Bilhah, iya nya siku ari bini apai iya. Lalu Israel nemu pasal nya.
Jakop bisi 12 iku anak lelaki.
23 Anak lelaki ke diadaka Leah nya Reuben. Iya anak tuai Jakop. Udah nya Simion, Lewi, Judah, Isakar, enggau Sebulun.
24 Anak lelaki ke diadaka Rachel nya Josep enggau Benjamin.
25 Anak lelaki ke diadaka Bilhah nya Dan enggau Naptali. Bilhah nya ulun Rachel.
26 Anak lelaki ke diadaka Silpah nya Gat enggau Aser. Silpah nya ulun Leah. Tu meh bala anak lelaki Jakop ke ada ba Padan-aram.
27 Jakop pan datai ba tempat alai apai iya diau. Tempat nya ba Mamre, di Kiriat-arba. Kiriat-arba mega dikumbai Hebron, lalu ba dia meh Abraham enggau Isak diau nyadi orang asing.
28 Isak idup pengelama 180 taun.
29 Umur iya panjai lalu iya idup enggau lantang ati. Udah nya, iya mati lalu dikuburka baka aki ini iya.* Anak iya Esau enggau Jakop pan nguburka iya.
Nota Kaki
^ Reti nya “Petara Bethel.”
^ Reti nya “Pun Kayu Oak Alai Nyabak.”
^ Reti nya “Anak Lelaki ke Diadaka Aku lebuh Aku Tusah Ati.”
^ Reti nya “Anak Lelaki Jari Kanan,” iya nya anak ti dikesayauka aku.
^ Iya nya, pengawa seks entara siku lelaki enggau siku indu.
^ Rambai jaku tu dikena lebuh sesiku orang mati.
