Pemungkal 41:1-57
41 Dua taun udah nya, Firaun bemimpi. Dalam mimpi nya, iya bediri ba tebing Sungai Nil.
2 Iya meda tujuh iku sapi ke gemu sereta manah gamal pansut ari Sungai Nil, lalu makai rumput ba tebing sungai nya.
3 Udah nya, bisi tujuh iku sapi ke kurus sereta jai gamal pansut ari Sungai Nil, lalu bediri ngimbai tujuh iku sapi ke gemu ba tebing sungai nya.
4 Sapi ke kurus sereta jai gamal makai tujuh iku sapi ke gemu sereta manah gamal nya. Firaun pan lalu tedani.
5 Udah nya, iya tinduk baru lalu bemimpi baru. Iya meda tujuh iti tangkai gandum ke perisi sereta manah ba siti batang gandum.
6 Udah nya, tumbuh tujuh iti tangkai gandum ke bukai ti kurus sereta layu laban dipuputka angin angat ari timur.
7 Tangkai gandum ke kurus nya nelan tangkai gandum ke perisi sereta manah. Firaun lalu tedani. Nya baru iya nemu diri udah bemimpi.
8 Pagi nya, Firaun enda lantang ati. Nya alai, iya ngangauka semua bala imam ke nemu ilmu sihir* sereta bala sida ke bepenemu-dalam ba Ejip. Iya madahka mimpi iya ngagai sida, tang nadai siku pan ulih nerangka reti mimpi nya ngagai iya.
9 Ku ketuai ke nyaga ai irup Firaun: “Aku ka ngaku penyalah diri seharitu.
10 Tuan raja kala ringat ngagai aku enggau ngagai ketuai ke ngaga roti. Nya alai, kami duai dijil ba rumah ketuai soldadu ke nyaga tuan raja.
11 Bisi sekali, maya malam hari, kami duai bisi mimpi, lalu mimpi kami duai enda sama reti.
12 Ba rumah jil nya bisi siku lelaki orang Hebrew ke agi biak. Iya orang gaji ketuai soldadu ke nyaga tuan raja. Lebuh kami duai madahka mimpi diri ngagai iya, iya lalu nerangka reti mimpi nya.
13 Utai ke dipadah iya amat-amat nyadi. Aku bulih baru pengawa aku. Tang ketuai ke ngaga roti digantung ba tiang.”
14 Nya alai, Firaun ngasuh orang mai Josep ngagai iya. Josep pan dibai pansut ari rumah jil. Iya nyukur ragum enggau pala iya, lalu nukar gari iya. Udah nya, iya betemu enggau Firaun.
15 Ku Firaun bejaku enggau Josep: “Aku bisi mimpi. Tang nadai siku pan ulih nerangka reti mimpi nya. Bisi orang madahka nuan nemu nerangka reti mimpi.”
16 Ku Josep nyaut: “Petara ke deka nerangka reti mimpi nya ngagai tuan raja, ukai aku. Iya deka madahka reti mimpi ti manah ngagai tuan raja.”
17 Ku Firaun madah ngagai Josep: “Dalam mimpi, aku bediri ba tebing Sungai Nil.
18 Aku meda tujuh iku sapi ke gemu sereta manah gamal pansut ari Sungai Nil, lalu makai rumput ba tebing sungai nya.
19 Udah nya, pansut tujuh iku sapi ke lemi, kurus, sereta jai gamal. Nadai kala aku meda sapi ke balat jai gamal baka nya ba menua Ejip.
20 Sapi ke kurus sereta jai gamal nya lalu makai tujuh iku sapi ke gemu nya.
21 Taja pan sida udah makai sapi ke gemu nya, tang sida baka ke bedau makai laban sida agi kurus sereta jai gamal. Maya nya, aku pan lalu tedani.
22 “Udah nya aku bemimpi baru. Aku meda tujuh iti tangkai gandum ke perisi sereta manah ba siti batang gandum.
23 Udah nya, tumbuh tujuh iti tangkai gandum ke bukai ti kurus sereta layu laban dipuputka angin angat ari timur.
24 Tangkai gandum ke kurus nya nelan tangkai gandum ke perisi sereta manah. Aku madahka mimpi aku ngagai bala imam ke nemu sihir, tang nadai siku pan ulih nerangka reti mimpi nya.”
25 Ku Josep bejaku enggau Firaun: “Kedua-dua mimpi nya sama reti. Petara ti bendar udah madah ngagai tuan raja utai ke deka dikereja Iya.
26 Tujuh iku sapi ke gemu nya mai reti tujuh taun. Pia mega, tujuh iti tangkai gandum ke perisi mai reti tujuh taun. Kedua-dua mimpi nya sama reti.
27 Tujuh iku sapi ke kurus sereta jai gamal, ke datai dudi, enggau tujuh iti tangkai gandum ke kurus sereta layu, mai reti lapar pungkang ke deka nyadi pengelama tujuh taun.
28 Baka ke udah dipadah aku tadi, Petara ti bendar udah madah ngagai tuan raja utai ke deka dikereja Iya.
29 “Pengelama tujuh taun, serata menua Ejip deka bisi mayuh pemakai.
30 Udah nya, lapar pungkang deka nyadi pengelama tujuh taun, dataika orang nyau nadai agi teingatka maya sida kala bisi mayuh pemakai. Lalu lapar pungkang nya deka ngerusak menua Ejip.
31 Ketegal lapar pungkang nya kelalu balat, nya alai orang nyau enda agi teingatka maya sida kala bisi mayuh pemakai.
32 Petara ti bendar udah meri tuan raja dua iti mimpi nya laban Iya udah nentuka utai nya sigi deka nyadi, lalu Iya Empu deka ngamatka nya enda lama da agi.
33 “Diatu, tuan raja patut milih siku orang ke bepenemu-dalam, lalu meri iya kuasa atas serata menua Ejip.
34 Tuan raja mega patut milih bala pegawai ngambika ngumpul 20 peratus asil utai ke ditanam ba Ejip dalam timpuh tujuh taun ke bisi mayuh pemakai.
35 Asuh sida ngumpul semua asil nya maya taun ke bisi mayuh pemakai. Sida patut nyimpan sereta nyaga pemakai nya ba tiap iti kuta. Semua pemakai nya patut disimpan dalam setor tuan raja.
36 Pemakai nya deka dikena maya lapar pungkang ke deka nyadi ba menua Ejip pengelama tujuh taun. Enggau nya, orang enggau bala jelu enda mati keberuran.”
37 Firaun enggau bala pegawai iya setuju enggau utai ke disebut Josep.
38 Ku Firaun bejaku enggau bala pegawai iya: “Nadai orang ke layak agi ari Josep megai pengawa tu, laban iya bisi kuasa ari Petara.”
39 Nya alai, ku Firaun bejaku ngagai Josep: “Laban Petara udah ngasuh nuan nemu pasal semua utai tu, nyadi nadai orang bukai ke bepenemu-dalam agi ari nuan.
40 Aku deka ngasuh nuan bekuasa nyaga rumah aku, lalu rayat aku deka ngasika semua utai ke disebut nuan. Taja pia, pangkat aku besai agi ari pangkat nuan, laban aku raja.”
41 Ku Firaun agi: “Aku deka meri nuan kuasa ba serata menua Ejip.”
42 Firaun muka tinchin iya lalu ngerasukka tinchin nya ba tunjuk jari Josep. Tinchin nya bisi chop diraja. Firaun mega ngerasukka kain linin ti pemadu manah ba Josep, lalu ngerasukka marik emas ba rekung Josep.
43 Firaun mega ngasuh Josep nepan kerita kuda diraja ti lumur dua, lalu ngasuh orang bejalai ba depan Josep. Bala orang nya ngangau enggau nyawa ti inggar: “Avrekh!”* Baka nya meh Firaun ngelantik Josep nyaga serata menua Ejip.
44 Ku Firaun agi: “Taja pan aku Firaun, tang nadai siku pan tau ngereja nama-nama utai ba menua Ejip enti nuan enda ngemendarka nya.”
45 Udah nya, Firaun meri Josep nama Sapenat-paniah. Iya mega meri Asenat, anak indu Potipera, nyadika bini Josep. Potipera nya imam ba On.* Josep pan berengkah bejalai ba* serata menua Ejip.
46 Umur Josep 30 taun lebuh iya berengkah bekereja ke* Firaun, raja menua Ejip.
Udah nya, iya mupuk ninggalka Firaun, lalu bejalai ba serata menua Ejip.
47 Dalam tujuh taun nya, menua nya ngasilka mayuh amat pemakai.
48 Sepemanjai timpuh nya, Josep majak ngumpul pemakai sereta nyimpan pemakai nya ba tiap iti kuta. Pemakai ke disimpan nya datai ari ladang-ladang ke ngelingi kuta nya.
49 Asil pemakai ke digumpul Josep amat mayuh, baka ngemayuh pasir ba tasik. Nya alai, sida badu agi ngitung laban penyampau nya nyau udah kelalu mayuh.
50 Sebedau lapar pungkang nyadi, Asenat ngadaka dua iku anak lelaki ke Josep. Asenat nya anak indu Potipera, imam ba On.*
51 Ku Josep: “Petara udah ngasuh aku badu agi ingatka pemerinsa aku enggau pemerinsa ruang bilik apai aku.” Nya alai, iya meri anak iya ke tuai nama Manasi.*
52 Anak Josep ti kedua diberi nama Efraim,* laban ku Josep madah: “Petara udah meri aku anak ba menua alai aku napi penusah.”
53 Tujuh taun alai menua Ejip bisi mayuh pemakai pan abis.
54 Lalu tujuh taun lapar pungkang berengkah nyadi, baka ke udah dipadah Josep. Lapar pungkang nya nyadi ba semua menua ke bukai. Tang ba menua Ejip bisi pemakai.*
55 Nyau kelama, lapar pungkang majak balat ba menua Ejip. Bala rayat minta pemakai ari Firaun. Ku Firaun bejaku ngagai sida: “Alai ngagai Josep, lalu kereja utai ke diasuh iya.”
56 Lapar pungkang balat amat nyadi ba menua Ejip. Nya alai, Josep muka semua setor alai nyimpan pemakai, lalu nyual pemakai nya ngagai orang Ejip. Lapar pungkang mega majak nyadi ba serata dunya.
57 Nya alai, orang ari serata dunya datai ngagai menua Ejip, lalu meli pemakai ari Josep, laban lapar pungkang balat amat nyadi ba serata dunya.
Nota Kaki
^ Peda Penerang Leka Jaku, “Ilmu sihir.”
^ Leka jaku tu nunjukka orang patut ngayanka basa.
^ Iya nya, Heliopolis.
^ Tauka “berengkah ngemataka.”
^ Tauka “berengkah bediri ba depan.”
^ Iya nya, Heliopolis.
^ Reti nya “Iya ke Ngasuh Badu Ingat.”
^ Reti nya “Beranak Dua Kali Lipat.”
^ Tauka “roti.”
