Pemungkal 42:1-38
42 Lebuh Jakop ninga menua Ejip bisi pemakai,* iya lalu bejaku enggau bala anak iya. Ku iya: “Nama kebuah kita nadai ngereja utai?
2 Aku ninga menua Ejip bisi pemakai. Alai kita kin, lalu beli pemakai ke kitai ngambika kitai enda mati keberuran.”
3 Nyadi, 10 iku menyadi Josep pan mupuk ngagai Ejip, meli pemakai.
4 Tang Jakop enda ngasuh Benjamin, iya nya menyadi kandung Josep, mupuk enggau sida. Jakop irau enggaika bisi utai ke jai nyadi ba Benjamin.
5 Nya alai, bala anak lelaki Israel enggau orang bukai mupuk ngagai Ejip meli pemakai, laban lapar pungkang mega nyadi ba menua Kanaan.
6 Josep bekuasa ba menua Ejip, lalu iya meh ke nyual pemakai ngagai orang ke datai ari serata dunya. Nya alai, lebuh bala menyadi Josep datai, sida lalu besugang ngagai iya.
7 Lebuh Josep meda bala menyadi iya, iya terus ngelala sida. Tang iya enda madahka diri iya menyadi sida. Iya bejaku kasar lebuh iya nanya sida: “Ari ni kita tu?” Ku sida nyaut: “Kami datai ari menua Kanaan deka meli pemakai.”
8 Josep ngelala bala menyadi iya, tang sida enda ngelala iya.
9 Iya lalu teingatka mimpi iya pasal sida. Ku iya: “Kita tu pengintip! Kita datai kitu laban kita deka nemu pengelemi menua kami.”
10 Ku sida nyaut: “Ukai baka nya tuan. Kami tu ulun tuan. Kami datai laban kami deka meli pemakai.
11 Kami semua diri menyadi magang. Kami ukai pengintip. Kami orang ke jujur.”
12 Ku Josep: “Enda! Kita datai laban kita deka nemu pengelemi menua kami!”
13 Ku sida: “Tuan, apai kami diau ba menua Kanaan, lalu iya bisi 12 iku anak lelaki. Iya ke biak sekali bisi enggau apai kami, lalu siku da agi udah nadai.”
14 Tang ku Josep: “Betul ku aku tadi. Kita tu pengintip!
15 Diatu aku deka nguji kita kena nemu sekalika kita bula tauka enda. Aku besumpah atas nama Firaun, kita enda tau ninggalka endur tu sampai menyadi kita ke biak nya datai kitu.
16 Asuh siku ari kita pulai lalu mai menyadi kita ke biak kitu. Tang kita ke bukai deka ditan dulu. Enggau nya, aku ulih nemu kita bula tauka enda. Tang enti kita enda mai menyadi kita kitu, kita endang pengintip.”
17 Udah nya, Josep ngasuh sida dijil pengelama tiga hari.
18 Ba hari ketiga, Josep bejaku ngagai sida: “Aku nangika Petara ti bendar. Nya alai kereja utai ke diasuh aku, ngambika kita ulih terus idup.
19 Enti kita amat jujur, awakka siku ari kita tinggal ba ditu. Lalu ke bukai ulih pulai mai pemakai ngagai ruang bilik kita ngambika sida enda keberuran.
20 Udah nya, bai menyadi kita ke biak sekali nya ngagai aku. Nya baru aku nemu utai ku kita nya endang amat, lalu kita enda diukum mati.” Sida pan setuju.
21 Udah nya, ku sida bejaku enggau pangan diri: “Kitai diukum ketegal utai ke digaga kitai ngagai menyadi kitai. Iya udah bebendar minta kasih ari kitai, tang kitai enggai mendingka iya. Nya kebuah kitai dituntung penusah ke baka tu.”
22 Ku Reuben: “Aku udah madah ngagai kita: ‘Anang ngemediska iya!’ Tang kita enggai ninga. Diatu kitai patut betanggungjawap laban iya mati* ketegal kitai!”
23 Tang sida enda nemu Josep ulih meretika utai ke disebut sida, laban ngelama tu Josep bejaku enggau sida nengah siku orang ke ulih ngalihka bansa jaku.
24 Josep ninggalka sida lalu nyabak. Lebuh iya pulai lalu bejaku baru enggau sida, iya milih Simion lalu nanchang iya ba depan sida.
25 Josep lalu ngasuh orang ngisi guni bala menyadi iya enggau pemakai, lalu mulaika duit sida ngagai guni sida siku-siku. Josep mega bepesan ngambika bala menyadi iya diberi pemakai kena sida ba rantau jalai. Semua utai ke diasuh Josep dikereja magang.
26 Sida manggaika guni pemakai ba atas keledai sida lalu mupuk.
27 Lebuh ba tempat alai bemalam, siku ari sida muka guni iya laban deka meri pemakai ngagai keledai iya. Maya nya, iya tetemuka duit ba dalam guni nya.
28 Ku iya bejaku ngagai bala menyadi iya: “Duit aku udah diberi pulai baru. Tu duit aku dalam guni aku!” Ati sida kesal, lalu sida berasai takut. Ku sida bejaku enggau pangan diri: “Tu tentu ukum ari Petara!”
29 Lebuh sida datai ba menua Kanaan, sida madahka ngagai apai sida, Jakop, pasal utai ke udah nyadi. Ku sida:
30 “Lelaki ke bekuasa ba menua nya bejaku kasar enggau kami. Iya nuduh kami ngintip menua iya.
31 Tang ku kami: ‘Kami ukai pengintip. Kami orang ke jujur.
32 Apai kami diau ba menua Kanaan, lalu iya bisi 12 iku anak lelaki. Iya ke biak sekali bisi enggau apai kami, lalu siku da agi udah nadai.’
33 Ku lelaki ke bekuasa ba menua nya madah ngagai kami: ‘Enti kita amat jujur, awakka siku ari kita tinggal ba ditu. Lalu ke bukai ulih pulai mai pemakai ngagai ruang bilik kita, ngambika sida enda keberuran.
34 Udah nya, bai menyadi kita ke biak sekali nya ngagai aku. Nya baru aku nemu kita orang ke jujur, ukai pengintip. Udah nya, aku deka mulaika baru menyadi kita ke ditan aku. Nya baru kita ulih meli pemakai ba menua tu.’”
35 Lebuh sida nuang guni sida, tiap iku sida tetemuka duit diri empu dalam guni sida. Lebuh sida enggau apai sida meda duit nya, sida lalu berasai takut.
36 Ku apai sida Jakop bejaku ngagai sida: “Kita udah ngasuh aku lenyau anak. Josep udah nadai, Simion pan nadai, lalu diatu kita ka ngambi Benjamin! Nama kebuah utai tu nyadi ba aku?”
37 Ku Reuben bejaku enggau apai iya: “Enti aku enda mai Benjamin pulai baru ngagai nuan, nuan tau munuh dua iku anak lelaki aku. Awakka aku nyaga Benjamin, lalu aku besemaya deka mai iya pulai baru.”
38 Tang ku Jakop: “Anak aku enda tau mupuk enggau kita! Menyadi iya udah mati, lalu siku iya aja ke agi tinggal. Enti bisi utai nyadi ba iya lalu iya mati ba rantau jalai, kita deka ngasuh aku mati tuai enggau ati ti tusah.”
