Rome 7:1-25
7 Bala menyadi, diatu aku benung bejaku enggau kita ke nemu pasal adat. Kati kita enda nemu, Adat nya tuan ke bekuasa atas sesiku orang seagi-agi iya idup?
2 Ambika chunto, nitihka adat, indu ke udah belaki patut mengkang jadi enggau laki iya seagi-agi laki iya idup. Tang enti laki iya mati, iya dilepaska ari adat laki iya.
3 Nya alai, enti iya jadi enggau laki bukai taja pan laki iya agi idup, iya butang.* Tang enti laki iya udah mati, iya dilepaska ari adat laki iya. Nya alai, enti iya belaki baru, iya enda butang.
4 Pia mega enggau kita, bala menyadi. Nengah tubuh Kristus, kita dilepaska ari* Adat Moses. Enggau nya, kita ulih diempu Kristus ke udah diidupka baru ari mati. Nya alai, diatu kitai ulih ngemuliaka Petara.*
5 Lebuh kitai idup nitihka pengingin tubuh kitai, Adat enggau terang nunjukka pengingin tubuh ti jai ngasuh tubuh kitai bedosa, lalu dosa nya ngujungka pemati.
6 Tang diatu kitai udah dilepaska ari Adat laban Adat nya nadai agi kuasa atas kitai. Diatu, kitai nyembah Petara nengah chara ti baru, iya nya nengah iring kuasa kudus, ukai nengah chara ti lama ke nitihka iring Adat ke udah ditulis.
7 Enti pia, kati Adat nya dosa? Tentu enda! Enti nadai Adat, aku enda nemu nama utai ke dikumbai dosa. Ambika chunto, enti Adat nadai madahka: “Anang inginka utai orang,” aku tentu enda nemu pengingin ke baka nya salah.
8 Tang nengah pesan nya, dosa ngasuh aku bisi semua macham pengingin ke utai orang. Enti nadai adat, dosa nadai kuasa.
9 Kebendar iya, sebedau Adat bisi, aku idup. Lebuh Adat datai, dosa idup baru, tang aku mati.
10 Pesan ke patut meri aku pengidup kebendar iya ngujungka aku mati.
11 Nya ketegal dosa ngena pesan nya nipu aku lalu munuh aku.
12 Taja pia, Adat nya kudus, lalu pesan nya manah, lurus, sereta kudus.
13 Kati reti nya aku mati ketegal utai ti manah? Tentu enda! Dosa ke ngasuh aku mati. Adat nya manah, lalu iya enggau terang nunjukka dosa meh ke ngasuh aku mati. Nya alai, pesan nunjukka dosa nya balat jai.
14 Kitai nemu Adat nya datai ari Petara nengah kuasa kudus Iya. Tang aku enda sempurna, lalu dijual nyadi ulun dosa.
15 Aku enda entu nemu nama utai ke dikereja aku. Ari ke ngereja utai ke dikedekaka aku, aku ngereja utai ke dipegedika aku.
16 Aku setuju Adat nya manah, tang aku agi ngereja utai ke enggai dikereja aku.
17 Nya alai, ukai aku ke ngereja utai ti jai nya, tang dosa ke ba dalam aku ke ngereja utai nya.
18 Aku nemu nadai utai ke manah ba aku, iya nya ba tubuh aku ti enda sempurna. Taja pan aku ingin deka ngereja utai ti manah, tang aku enda ulih ngereja nya.
19 Aku enda ngereja utai ti manah ke dikedekaka aku, tang aku ngereja utai ti jai ke dikenggaika aku.
20 Enti aku ngereja utai ke dikenggaika aku, ukai aku ke ngereja nya, tang dosa ke ba dalam aku ke ngereja nya.
21 Nyadi aku beratika adat tu ke nguasa aku: Lebuh aku ingin deka ngereja utai ti manah, pengingin deka ngereja utai ti jai bisi ba dalam aku.
22 Dalam ati aku, aku amat rinduka adat Petara.
23 Tang aku beratika dalam tubuh aku, bisi siti agi adat ke beperang ngelaban adat dalam runding aku, lalu adat nya dosa ke bekuasa dalam tubuh aku.
24 Chukup balat merinsa aku tu! Sapa ke deka nyelamatka aku ari tubuh ke deka ngasuh aku mati?
25 Aku beterima kasih ngagai Petara, laban Iya nyelamatka aku nengah Tuan kitai, Jesus Kristus! Ngena runding aku, aku nyadi ulun adat Petara, tang ngena tubuh aku, aku nyadi ulun ke adat dosa.
Nota Kaki
^ Orang ti udah kawin ngereja ulah seks enggau orang ke ukai kaling pengidup iya.
^ Tauka “mati bekaul enggau.”
^ Jaku Asal, “kitai patut mansutka buah ke Petara.”
