PELAJAR 2
Rebekah Deka Jehovah Gaga Ati
Rebekah sayauka Jehovah. Nama laki iya Isak. Isak mega sayauka Jehovah. Baka ni Rebekah betemu enggau Isak? Baka ni iya ngasuh Jehovah gaga ati? Aram belajar pasal iya.
Abraham seduai Sarah nya apai indai Isak. Sida diau ba menua Kanaan. Orang Kanaan enda nyembah Jehovah. Tang, Abraham deka Isak kawin enggau indu ke nyembah Jehovah. Iya nganjung ulun iya Elieser, ngiga bini ke Isak ba menua Haran. Sekeda kaban belayan Abraham diau dia.
Rebekah rajin nyauk ai ke bala unta
Elieser mupuk enggau ulun Abraham ti bukai. Pejalai sida jauh. Sida mai sepuluh iku unta kena ngundan pemakai enggau hadiah. Baka ni Elieser ulih nemu ni bagi indu ke patut nyadi bini Isak? Maya Elieser enggau bala ulun ti bukai datai ba Haran, sida ngetu semak telaga laban Elieser nemu enda lama agi orang indu deka nyauk. Iya besampi ngagai Jehovah: ‘Enti aku minta ai irup ari seiku indu dara, lalu iya meri aku enggau unta aku ai irup, aku nemu nya meh indu ti dipilih Nuan.’
Udah nya Rebekah datai ngagai telaga. Bup Kudus madahka gamal iya bajik amat. Elieser minta ai irup ari iya. Rebekah nyaut: ‘Ulih. Aku deka meri nuan ai irup, pia mega ke unta nuan.’ Uji pikir! Unta ke aus ngirup mayuh ai. Nya alai, Rebekah suah nyauk ngambika semua unta ulih ngirup magang. Ulih nuan meda ba gambar iya rajin gawa?— Elieser alit ati meda chara Jehovah nyaut sampi iya.
Elieser meri Rebekah mayuh hadiah ti manah. Rebekah ngemai Elieser enggau bala ulun ti bukai ngagai rumah apai iya. Elieser madahka kebuah Abraham ngasuh iya datai, lalu baka ni Jehovah nyaut sampi iya. Sida Rebekah sebilik gaga ati ngasuh iya kawin enggau Isak.
Rebekah ke Kanaan enggau Elieser, lalu kawin enggau Isak
Kati Rebekah deka kawin enggau Isak?— Rebekah nemu Jehovah ti ngasuh Elieser datai. Nya alai, maya sida Rebekah sebilik nanya sekalika iya deka ke Kanaan lalu kawin enggau Isak, iya nyaut: ‘Ka.’ Iya lalu mupuk enggau Elieser. Maya sida datai ba Kanaan, Rebekah kawin enggau Isak.
Rebekah nitihka utai ti diasuh Jehovah. Nya alai, Jehovah merekat iya. Betaun udah nya, Jesus ada ari peturun iya! Enti nuan deka Jehovah gaga ati, nuan patut nunda Rebekah. Jehovah mega deka merekat nuan.
