Sebedau tu ba Perea, Jesus madah: “Mayuh orang ke dulu deka nyadi dudi, lalu orang ke dudi deka nyadi dulu.” (Matthew 19:30) Diatu Jesus madahka siti agi jaku sempama bekaul enggau pekara tu.

Ku iya: “Perintah serega baka orang siku ke bempu kebun anggur. Tumu pagi, iya mupuk ngiga orang ke tau digaji iya gawa ba kebun anggur iya. Pengudah iya besetuju deka meri sesingkap duit seling denari ke gaji sehari, iya lalu ngasuh sida bekereja ba kebun anggur iya. Ba urung pukul semilan pagi, iya pansut, lalu ba pasar iya tepedaka beberapa iku orang ke bediri ngapa nadai pengawa. Iya lalu bejaku ngagai sida: ‘Alai kita gawa ba kebun anggur aku. Aku deka meri kita gaji ti patut.’ Sida lalu mupuk. Ba urung pukul 12 tengah hari, enggau urung pukul 3 ngalih hari, iya pansut lalu ngereja utai ti sama. Pengujung iya, ba urung pukul lima lemai, iya pansut, lalu tepedaka beberapa iku orang ke bediri ngapa nadai pengawa. Iya nanya sida: ‘Nama kebuah kita sehari-hari bediri ba ditu nadai pengawa?’ Ku sida nyaut: ‘Laban nadai orang ngaji kami gawa.’ Ku iya bejaku ngagai sida: ‘Enti pia, alai kita gawa ba kebun anggur aku.’”—Matthew 20:1-7.

Lebuh orang ninga pasal “Perintah serega” enggau “orang siku ke bempu kebun anggur,” sida engka berunding pasal Petara Jehovah. Ayat Bup Kudus madah Jehovah nya orang ke bempu ladang anggur, lalu ladang anggur nya bansa Israel. (Masmur 80:8, 9; Isaiah 5:3, 4) Pekerja ladang ngambarka orang ke bisi kaul enggau sempekat Adat Moses. Tang Jesus, enda bejakuka utai ke nyadi suba. Ba sempama tu, iya benung madahka utai ke nyadi ba jeman iya.

Kebendar iya, tuai pengarap enggau orang Parisi patut bebendar gawa ke Petara. Sida baka orang ke gawa sepemanjai hari ke ngumbai diri deka nerima gaji sesingkap duit seling denari, iya nya sama enggau gaji sehari.

Tuai pengarap enggau bala imam ngumbai orang Judah enda bebendar gawa ke Petara, laban sida baka orang ke enda gawa sepemanjai hari ba ladang anggur. Ba sempama Jesus, sida baka ke berengkah gawa “pukul semilan pagi,” pukul 12tengah hari, enggau urung pukul tiga ngalih hari lalu pengujung iya, ba urung pukul lima lemai.

Bala tuai pengarap ngumbai orang ke nitihka Jesus nya ‘orang ke enda nemu pasal Adat.’ (John 7:49) Mayuh entara sida nyadi orang ke berikan tauka kereja kasar. Udah nya, ba musin ruruh kena taun 29 M., “orang ke bempu kebun anggur” ngasuh Jesus mai sida gawa ke Petara nyadi murid Jesus. Nitih ku Jesus, sida “orang ke dudi” gawa ba kebun anggur nya.

Pengujung iya, Jesus madahka utai ke nyadi pengudah sida abis gawa: “Lebuh hari nyau lemai, orang ke bempu kebun anggur nya madah ngagai mandur: ‘Kangauka bala pekereja lalu bayar gaji sida, belabuh ari sida ke pemadu dudi, nyentuk ngagai sida ke pemadu dulu belabuh gawa.’ Lebuh pekereja ke berengkah gawa ari pukul lima lemai datai, tiap iku sida nerima sesingkap duit seling denari. Lebuh pekereja ke dulu belabuh gawa datai, sida ngumbai diri deka nerima gaji ti besai agi. Tang sida mega diberi sesingkap duit seling denari. Lebuh sida nerima gaji nya, sida lalu mut-mut ngagai orang ke bempu kebun anggur nya. Ku sida: ‘Orang ke pemadu dudi semina bekereja sejam aja, tang nuan udah ngaga gaji sida sebaka enggau gaji kami ke udah bekereja sehari-hari tu natka diri laban panas.’ Ku iya nyaut siku ari sida: ‘Unggal, nadai aku ngakal nuan. Endaka  nuan empu ke besetujuka gaji sesingkap duit seling denari? Ambi gaji nuan, lalu pulai. Aku deka meri gaji ngagai pekereja ke pemadu dudi tu sama penyampau enggau gaji nuan. Kati nya salah enti aku deka ngena duit aku sepeneka ati aku? Tauka nuan kepapas meda aku manah enggau sida?’ Enggau tu, orang ke dudi deka nyadi dulu, lalu orang ke dulu deka nyadi dudi.”—Matthew 20:8-16.

Bala murid Jesus engka enda entu meretika jaku Jesus nya. Tuai pengarap orang Judah ngumbai diri orang ke “dulu.” Tang baka ni sida nyadi orang ke “dudi”? Lalu baka ni ke bala murid Jesus tau nyadi orang ke “dulu”?

Orang Parisi enggau orang bukai ngumbai bala murid Jesus nya orang ke “dudi.” Tang bala murid Jesus deka nyadi orang ti “dulu,” lalu bulih upah ti penuh. Pengudah Jesus mati, Petara nulak bansa Israel lalu milih bansa ti baru, iya nya “orang Israel ke enggi Petara.” (Galatia 6:16; Matthew 23:38) Baka ke dipadahka John Pemaptisa, bansa ti baru tu dibaptisa ngena kuasa kudus. Sida ke “dudi” deka dulu agi dibaptisa lalu diberi basa ti besai nyadi saksi Jesus “nyentuk ngagai ujung dunya.” (Surat Kereja Rasul 1:5, 8; Matthew 3:11) Lebuh bala murid udah faham sempama Jesus lalu beratika ubah ke dipadahka iya, sida engka nemu bala tuai pengarap ke nyadi orang ke “dudi” begedika sida.