Jesus enggau bala rasul iya agi begulai ba siti bilik dalam rumah alai sida ngintu pengerami Makai Malam Tuan. Iya deka meransang sida. Ku iya: “Anang tusah ati. Arapka Petara, lalu arap mega ke aku.”—John 13:36; 14:1.

Jesus madahka kebuah bala rasul iya ti setia enda ibuh tusah ati lebuh iya mupuk: “Ba rumah Apai aku, bisi mayuh endur diau. . . . Pengudah aku mupuk nyediaka endur ke kita, aku deka datai baru lalu mai kita ngagai rumah aku, ngambika ba dini alai aku, ba dia mega alai kita.” Tang bala rasul enda nemu Jesus benung bejaku pasal iya ke deka ngagai serega. Nya alai, Thomas nanya: “Tuan, kami enda nemu kini nuan deka mupuk. Nya alai, baka ni ku kami tau nemu jalai nya?”—John 14:2-5.

Ku Jesus nyaut iya: “Aku tu meh jalai, pemendar, enggau pengidup.” Semina orang ke nerima Jesus enggau ajar iya, sereta neladan chara pengidup iya ulih tama ngagai rumah Apai iya ti di serega. Jesus madahka: “Nadai orang ulih datai ngagai Apai, enti enda nengah aku.”—John 14:6.

Udah nya Philip minta ngagai Jesus: “Tuan, pandangka Apai ngagai kami. Nya pan udah chukup.” Philip engka deka Petara ngayanka diri ngagai sida, baka Iya ke kala meri genera ngagai Moses, Elijah enggau Isaiah. Taja pia, bala rasul udah nerima utai ti jauh manah agi ari genera. Ku Jesus madah ngagai sida: “Aku udah lama begulai enggau kita. Tang Philip, kati ku nuan tak agi enda ngelala aku? Barang sapa udah meda aku, udah mega meda Apai.” Jesus neladan sifat Apai iya enggau sempurna. Nya alai, ketegal bala rasul begulai sereta meda Jesus, nyadi sida baka ke udah meda Apai. Tang Apai besai agi ari Jesus laban iya madah: “Utai ke dipadahka aku ngagai kita enda datai ari aku empu.” (John 14:8-10) Enggau tu, bala rasul nemu Jesus meri semua puji ngagai Apai iya laban semua ajar ke dipadahka iya datai ari Apai.

Bala rasul Jesus udah meda iya ngereja mayuh pengawa ti luar biasa. Sida mega udah ninga iya nusui Berita Manah pasal Perintah Petara. Nyadi, iya madah ngagai sida: “Barang sapa ke arapka aku deka ngereja utai ke digaga aku. Kebendar nya, iya deka ngereja utai ti besai agi.” (John 14:12) Jesus ukai madahka bala murid iya deka ngereja pengawa ajih ke jauh luar biasa ari  ke kala digaga iya. Tang bala murid iya deka neruska pengawa nginjil dalam timpuh ti jauh lama agi, ngagai kawasan ke jauh agi, sereta ngagai mayuh agi orang.

Taja pan Jesus deka mupuk, tang iya enda ninggalka bala rasul iya pia aja, laban iya udah besemaya: “Enti kita minta nama-nama utai dalam nama aku, aku deka ngereja nya.” Iya mega madah: “Aku deka minta ngagai Apai, lalu Iya deka meri kita penulung bukai ke deka enggau kita belama iya, iya nya kuasa kudus Petara ke mandangka pemendar.” (John 14:14, 16, 17) Jesus madahka, sida tentu deka nerima penulung bukai, iya nya kuasa kudus. Lalu, utai tu nyadi ba Pengerami Pentikos kena taun 33 M.

Jesus lalu madah: “Enda lama agi, dunya enda meda aku agi. Tang kita deka meda aku, laban aku idup lalu kita mega deka idup.” (John 14:19) Jesus ukai semina deka ngayanka diri ngagai sida pengudah iya diidupka baru. Tang iya mega deka ngangkatka sida idup baru, lalu mai sida enggau iya ba serega.

Udah nya, Jesus madahka tu: “Barang sapa ke nerima lalu nitihka pesan aku nya, orang ke rinduka aku. Barang sapa ke rinduka aku, dikerinduka Apai aku. Lalu aku mega deka rinduka iya. Lalu aku enggau terang deka mandangka diri ngagai iya.” Pengudah nya, rasul Judas ke mega dikumbai Tadius nanya: “Tuan, nama utai ke udah nyadi nyentukka nuan deka enggau terang mandangka diri ngagai kami, tang ukai ngagai dunya?” Jesus nyaut iya: “Barang sapa ke rinduka aku, deka nitihka ajar aku. Apai aku deka rinduka iya . . . Barang sapa enda rinduka aku, enda nitihka ajar aku.” (John 14:21-24) Nya alai, bala rasul nerima Jesus. Tang orang ba dunya tu enda nerima Jesus ke nyadi jalai, pemendar enggau pengidup.

Jesus deka mupuk. Nya alai, baka ni bala murid iya ulih ingatka semua utai ke kala diajar iya ngagai sida? Ku Jesus nerangka: “Penulung nya, iya nya kuasa kudus Petara ke deka dikirumka Apai dalam nama aku, deka ngajar kita semua utai lalu deka ngingatka kita pasal semua utai ke udah disebut aku ngagai kita.” Bala rasul udah meda semua pengawa ke ulih digaga Jesus ketegal bantu ari kuasa kudus. Nyadi, jaku Jesus nya tentu ngelantangka ati sida. Jesus mega madahka: “Aku ninggalka pengelantang ke kita. Aku meri kita pengelantang aku. . . . Anang tusah ati lalu anang takut.” (John 14:26, 27) Nya meh kebuah iya, bala murid enda ibuh berasai tusah ati laban Jehovah deka nyaga sereta ngiring sida.

Enda lama pengudah nya, bala murid Jesus deka meda bukti ti nunjukka Petara ulih nyaga sida. Jesus madah: “Pemerintah dunya tu deka datai, tang iya nadai kuasa atas aku.” (John 14:30) Sebedau tu, Sitan udah mujur ngawal sereta ngena Judas. Taja pia, Jesus nadai pengelemi sereta enda bedosa. Nyadi, Sitan enda ulih ngasuh iya ngelaban Petara, lalu Sitan mega enda ulih nagang Jesus diangkatka idup baru. Nama kebuah? Laban Jesus madah: “Aku ngereja utai ke diasuh Apai kereja aku.” Jesus yakin, Apai iya tentu deka ngidupka iya ari mati.—John 14:31.