Jesus enggau bala murid iya udah tiga hari bemalam ba Betani pengudah sida datai ari Jeriko. Diatu Hari Satu, 10 Nisan, sida tumu pagi mupuk ngagai Jerusalem. Maya nya, Jesus berasai lapar. Nya alai, iya mansang ngagai sepun kayu ara. Kati pun kayu nya bisi buah?

Maya nya ujung bulan Mac, lalu musin buah ara semina deka datai maya bulan Jun. Taja pia, kayu ara nya tumu bisi daun. Nya kebuah Jesus ngumbai pun kayu nya berengkah bebuah. Jesus lalu madah: “Awakka orang nadai agi makai buah nuan.” (Mark 11:14) Tekala nya, pun kayu nya berengkah layu. Nama kebuah Jesus nyumpah pun kayu ara nya? Pagi siti, Jesus deka nerangka reti iya.

Enda lama udah nya, Jesus enggau bala murid iya datai ba Jerusalem. Sehari sebedau nya maya lemai hari, Jesus meda semua utai dalam Rumah Sembiang. Tang diatu iya tama, lalu ngereja utai ti nyauka sama enggau utai ke digaga iya tiga taun sebedau nya ba Pengerami Paska 30 M. (John 2:14-16) Jesus muru “semua orang ke bejual-bebeli dalam Rumah Sembiang.” Lalu iya nungkupka “mija orang ke penukar duit enggau bangku orang ke nyual burung achang.” (Mark 11:15) Iya mega enda ngemendarka orang mai nama-nama utai nengah Rumah Sembiang.

Nama kebuah Jesus amat terit ngagai sida ba Rumah Sembiang? Iya madah: “Endaka udah ditulis, ‘Rumah Aku deka dikumbai rumah endur besampi ke semua bansa.’ Tang kita ngaga iya nyadi sarang perumpak.” (Mark 11:17) Jesus ngumbai sida nya perumpak, laban netapka rega ti kelalu mar ngagai orang ke deka meli jelu ke dikena nyadika pemeri.

Pengudah bala tuai imam, penulis Adat enggau bala tuai bansa ninga utai ke digaga Jesus, sida ngiga chara deka munuh iya. Tang sida enda ulih ngereja nya, laban semua orang majak nitihka iya sereta deka ninga jaku ajar iya.

Maya nya, orang Judah enggau orang ke megai pengarap Judah datai ngintu Pengerami Paska. Maya nya, sekeda orang Gerika mansang ngagai Philip, lalu madah sida deka betemu enggau Jesus. Sida engka nanya Philip laban nama iya diambi ari jaku Gerika. Tang Philip enda nemu sekalika atur tu ngena tauka enda. Nya alai, iya nanya ngagai Andrew, lalu seduai iya madahka tu ngagai Jesus ba Rumah Sembiang.

Jesus nemu, dalam beberapa hari agi, iya deka mati. Nyadi, nya ukai maya ti ngena alai iya masau jam ngasuh diri nyadi tebilang, tauka nyaut tanya orang ke ukai amat deka nitihka iya. Nya alai, Jesus meri siti jaku sempama ngagai Philip enggau Andrew. Ku iya: “Maya udah datai alai Anak Mensia dimuliaka. Enggau bendar aku madah ngagai kita: Enti seleka gandum enda labuh ke tanah lalu mati, iya deka meruan nyadi seleka gandum. Tang enti iya mati, iya deka mansutka mayuh gandum.”—John 12:23, 24.

Seleka gandum baka ke enda berega. Tang lebuh leka gandum nya ditanam, iya baka ke “mati.” Taja pia, leka nya deka tumbuh lalu ngasilka mayuh agi gandum. Baka nya mega, Jesus siku mensia ti sempurna lalu iya tetap ati ke Petara nyentukka mati. Ketegal pemati iya, semua orang ke neladan sifat Jesus ti enda berundingka diri empu ulih idup belama iya. Ku Jesus madahka: “Barang sapa ke sayauka nyawa diri, deka ngelenyauka nyawa iya. Tang barang sapa ke begedika nyawa diri ba dunya tu, deka nyelamatka nyawa iya lalu bulih pengidup ti meruan belama iya.”—John 12:25.

Jesus enda berunding pasal diri empu aja laban iya madahka: “Barang sapa ke deka nyadi ulun aku, iya patut nitihka aku. Ba dini alai aku, ba dia meh alai iya. Barang sapa ke nyadi ulun aku,  deka dipebasa Apai aku.” (John 12:26) Berekat tu amat berega! Orang ke dipebasa Petara deka merintah enggau Kristus ba Perintah Petara.

Ketegal Jesus nemu iya deka balat diperinsa lalu dibunuh, iya madah: “Diatu, ati aku balat tusah. Lalu, nama utai ke patut disebut aku? Apai, selamatka aku ari maya ti balat tusah tu.” Taja pia, Jesus sanggup ngereja peneka Petara laban iya madah: “Tang ketegal maya ti tusah tu meh, aku datai ke dunya.” (John 12:27) Jesus seruran ngasika Petara, nyentukka iya sanggup nyerahka nyawa diri nyadika tebus.