Gerempung kami nadai tuai pengarap ke dibayar gaji. Baka ke digaga lebuh eklisia Kristian berengkah ditubuhka, bala tuai ke layak dipilih kena ‘ngibun eklisia Petara.’ (Kereja Rasul 20:28) Bala tuai gempuru tu orang ke tegap ba pengarap, lalu sida deka ngiring ba eklisia sereta ngibun, ‘ukai ari pejal, tang enggau ati ti ransing, baka ti dikedekaka Petara.’(1 Peter 5:1-3) Nama pengawa ti dikereja sida ke kami?

Sida ibuhka kami sereta nyaga kami. Bala tuai gempuru nyediaka iring ari Bup Kudus, lalu nulung bala raban ba eklisia ngambika mengkang semak ngagai Jehovah. Sida nemu diri nerima tanggungjawap ti berat tu ari Petara, nya alai sida enda merintah orang, tang sida meri pengelantang sereta ngemansangka pengarap orang bukai. (2 Korint 1:24) Baka pengibun bedus ke bebendar nyaga genap iku bedus iya, bala tuai gempuru mega bebendar nyaga genap iku raban ba eklisia.—Jaku Dalam 27:23.

Sida ngajar kami baka ni ngereja peneka Petara. Ninting minggu, bala tuai gempuru ngiring pengawa begempuru ba eklisia kena ngeringka pengarap kami. (Kereja Rasul 15:32) Sida mega ngulu ba pengawa nginjil, nginjil enggau kami sereta ngelatih kami ba semua pengawa nginjil.

Sida meri peransang ngagai kami. Kena ngeringka kaul kami enggau Jehovah, bala tuai gempuru engka berandau enggau kami ba rumah tauka ba Palan Gempuru kena meri tulung sereta jaku ti ngelantangka ati ari Bup Kudus.—James 5:14, 15.

Kelimpah ari pengawa ba eklisia, mayuh ari bala tuai gempuru begunaka awak endur ngiga belanja sereta bisi tanggungjawap ba ruang bilik. Bala menyadi Kristian ke bagas tu patut nerima basa ari kitai.—1 Tesalonika 5:12, 13.

• Nama tanggungjawap bala tuai gempuru eklisia?

• Baka ni bala tuai gempuru ngayanka pengibuh ke kami?