Lebuh penusah ngenyit nuntung, Saksi-Saksi Jehovah enggau jampat ngatur tulung ngagai bala menyadi Kristian sida ke ditinggang penusah. Tu ngayanka pengerindu kami ti bendar ngagai pangan diri. (John 13:34, 35; 1 John 3:17, 18) Baka ni chara kami nulung?

Kami meri duit. Lebuh lapar pungkang balat nyadi ba Judea, orang Kristian maya jeman keterubah ba Antiok ngirumka duit ngagai bala menyadi Kristian ba Judea. (Kereja Rasul 11:27-30) Pia mega, lebuh kami nemu bala menyadi Kristian kami ba serata dunya bisi napi penusah, kami ngirumka duit nengah eklisia kami kena nulung sida ke begunaka bantu.—2 Korint 8:13-15.

Kami meri tulung ti diguna. Bala tuai gempuru ke bisi ba endur ti ditinggang penusah deka ngiga semua raban eklisia kena nentuka semua sida bisi magang sereta selamat. Komiti ke meri tulung deka ngatur pengawa meri pemakai, ai irup ti beresi, gari, endur beteduh enggau bantu berubat. Mayuh Saksi ke ngembuan pengelandik ti diguna datai ngena duit diri empu lalu sama enggau ngereja pengawa meri tulung tauka ngaduka rumah sereta Palan Gempuru ke udah rusak. Laban bisi penyerakup ba gerempung kami sereta bisi peneleba begulai gawa, tu ngasuh kami meri tulung enggau jampat. Kami ukai aja nulung ‘orang ke sama pengarap enggau kami,’ tang enti ulih, kami mega nulung orang bukai enda ngira nama pengarap sida. —Galatia 6:10.

Kami meri pengelantang ari Bup Kudus sereta sukung ba emosi. Orang ke ditinggang penusah ngenyit, kelebih agi begunaka pengelantang ati. Maya nya, kami bulih pengering ari Jehovah, ‘Petara ti pun semua pengelantang.’ (2 Korint 1:3, 4) Kami rindu bekunsika semaya ari Bup Kudus enggau orang ke balat tusah ati, madahka semaya pasal enda lama da agi Perintah Petara deka muai semua penusah ke ngasuh pedis enggau merinsa.—Pemandang 21:4.

• Nama kebuah bala Saksi ulih meri tulung enggau jampat lebuh penusah ngenyit nyadi?

• Nama pengelantang ari Bup Kudus ke ulih dikunsika kitai enggau sida ke selamat?