Saksi-Saksi Jehovah lama udah tebilang enggau ajar teokratik. Sekula ti spesial disediaka ngagai sida ke gawa penuh jam ngerembaika berita manah pasal Perintah Petara, ngambika sida ulih ‘ngereja semua pengawa sida.’—2 Timoti 4:5.

Sekula Pengerintis. Pengudah setaun nyadi pengerintis biasa, pengerintis nya ulih enggau sekula pengelama 6 hari, ke engka diatur ba Palan Gempuru ke semak. Tuju sekula tu kena nulung bala pengerintis semak agi ngagai Jehovah, landik agi ba semua pengawa nginjil, sereta neruska pengawa sida enggau tetap ati.

Sekula Penginjil Perintah Petara. Sekula 2 bulan tu digaga kena ngelatih bala pengerintis ke bisi peneleba sereta sanggup ninggalka menua sida ngambika ulih nginjil ba endur ti begunaka penginjil. Sida neladan Jesus Kristus, Penginjil ti pemadu nyulut ke kala nginjil ba dunya tu, laban sida ngembuan runding, “Tu aku! Kirumka aku!” (Isaiah 6:8, NW; John 7:29) Laban diau jauh ari menua diri, sida mega engka patut nelebaka diri idup enggau pengumbas iya. Chara pengidup, gaya hari, enggau pemakai engka enda sebaka enggau ke ba menua diri. Sida mega engka belajarka bansa jaku ti baru. Sekula tu nulung bala menyadi Kristian ke bujang dara sereta sida ke udah kawin, ke beumur 23 ngagai 65 taun, ngemansangka kualiti pengarap ke dikena sida bejalaika pengawa sida. Pia mega, sekula tu ngemansangka pengelandik ke ulih nulung sida ngereja mayuh agi pengawa ke Jehovah sereta gerempung Iya.

Sekula Gilead. Dalam leka jaku Hebrew, “Gilead” reti iya “Tugung Saksi.” Kenyau ari Gilead ditubuhka ba taun 1943, lebih ari 8,000 iku orang ke udah nembuka pelajar ba sekula tu udah dianjung nyadi pengerintis seberai tasik ngambika ngerembaika berita manah “nyentuk ngagai ujung dunya” enggau mujur. (Kereja Rasul 13:47) Lebuh sekeda pelajar Gilead keterubah iya datai ba Peru, nadai siti pan eklisia bisi ba menua nya. Tang, diatu bisi lebih ari 1,000 iti eklisia ba menua nya. Lebuh pengerintis seberai tasik baru datai ba Jipun, bala Saksi ba menua nya kurang ari 10 iku. Tang, diatu bisi lebih ari 200,000 iku Saksi ba Jipun. Latih 5 bulan ba Gilead mega nyengkaum belajarka Jaku Petara enggau silik. Sida ke nyadi pengerintis spesial tauka pengerintis seberai tasik, sida ke gawa ba pampang opis, tauka sida ke bejalaika pengawa ba pelilih dipinta enggau sekula tu ngambika bulih latih ke ulih nulung negapka sereta ngemansangka pengawa nginjil ba serata dunya.

• Nama tuju Sekula Pengerintis?

• Sekula Penginjil Perintah Petara digaga ke sapa?