Nama chara ke ulih nulung nuan rindu macha Bup Kudus sereta bulih mayuh penguntung ari pengawa macha nya? Peratika lima iti chara ke udah mujur dikena mayuh orang.

Ngiga endur ke ngena. Nguji ngiga endur ke sunyi. Nyeliahka utai ke ulih ngachau ngambika nuan ulih belematika utai ke dibacha nuan. Chukup terang sereta bisi angin ulih nulung nuan bulih mayuh penguntung ari utai ke dibacha nuan.

Ngembuan runding ti betul. Ketegal Bup Kudus datai ari Apai kitai ti di serega, nuan deka bulih mayuh penguntung enti nuan ngembuan ulah baka anak mit ke sedia deka belajar ari apai tauka indai ke bisi pengerindu. Enti nuan bisi runding ti enda manah tauka penemu diri empu pasal Bup Kudus, uji buai runding ke baka nya ngambika Petara ulih ngajar nuan.—Masmur 25:4.

Besampi sebedau nuan macha. Bup Kudus ngundan runding Petara, nya alai kitai begunaka tulung ari Iya kena meretika Bup Kudus. Petara  besemaya deka meri ‘roh kudus ngagai orang ke minta ari Iya!’ (Luke 11:13) Roh Kudus ulih nulung nuan meretika runding Petara. Nyau kelama, roh kudus deka muka runding nuan kena meretika ‘utai ti dalam buntut runding Petara.’—1 Korint 2:10.

Macha ngambika ulih mereti. Anang semina macha ketegal deka ngabiska iya. Perundingka utai ke dibacha nuan. Tanya diri empu: “Nama kualiti ke ulih dipeda aku lebuh macha pasal orang ke dibacha aku dalam Bup Kudus? Baka ni aku ulih ngena tu ba pengidup aku?

Netapka juluk ati. Ngambika bulih penguntung ari macha Bup Kudus, tentuka nuan deka belajar pasal utai ke ulih meri penguntung ba pengidup nuan. Nuan ulih netapka juluk ati baka: ‘Aku deka belajar mayuh agi pasal Petara.’ ‘Aku deka nyadi orang ke manah agi, laki tauka bini ke manah agi.’ Udah nya, pilih begian Bup Kudus ke ulih nulung nuan ngulihka juluk ati nya. *

Lima iti chara tu deka nulung nuan berengkah macha Bup Kudus. Tang baka ni nuan tau ngasuh pengawa macha nya ngerinduka ati? Artikel pengudah tu bisi madahka sekeda chara iya.