1, 2. Nama runding orang pasal pengawa ke dipegai sida?

MAYUH orang ngasaika diri beguna tauka enda beguna, bepelasar ba pengawa ke dikereja sida. Ba sekeda menua, enti deka bekelala enggau seiku-seiku orang, sida deka nanya: “Nama bansa pengawa ke dikereja nuan?”

² Kekadang Bup Kudus madah pasal seiku-seiku orang enggau nerangka bansa pengawa ke dikereja sida. Ngambika chunto, Bup Kudus madahka “Matthew ke pengumpul chukai,” “Simon, ke tukang samak,” sereta “Luke, lutur ke dikesayauka kitai.” (Mat. 10:3; SKR. 10:6; Kol. 4:14) Bisi maya iya, Bup Kudus nyebut pasal pengawa ke dipegai orang lebuh gawa ke Jehovah. Perundingka pasal Raja David, nabi Elijah, enggau rasul Paul. Sida beterima kasih ke pengawa ti diberi Jehovah ngagai sida. Sama mega, kitai patut beterima kasih ke sebarang pengawa ke dikembuan kitai lebuh gawa ke Jehovah.

3. Nama kebuah sida ke tuai patut ngelatih sida ke biak? (Peda gambar ba pun artikel.)

³ Kitai rindu gawa ke Jehovah sereta beterima kasih ke pengawa kitai. Mayuh ari kitai rinduka pengawa teokratik nyentukka kitai ngarapka diri ulih terus ngereja pengawa nya seagi-agi kitai ulih  ngereja iya. Tang lebuh orang mansang tuai, sida enda ulih ngereja semua utai ke kala dikereja sida lebuh sida agi biak. (P-jar. 1:4) Tu nyadi penanggul ba nembiak Jehovah. Kemaya hari tu, pengawa nginjil majak mansang, lalu gerempung Jehovah ngena teknologi moden ngenataika berita manah ngagai mayuh agi orang. Tang kekadang, sida ke tuai tusah deka belajarka chara baru ngereja pengawa. (Luk. 5:39) Pia mega, lebuh orang mansang tuai, sida deka lenyau pengering. (J-lam. 20:29) Nya alai, sida ke tuai mandangka pengerindu sereta meri bantu ti beguna enti sida ngelatih sida ke biak megai mayuh agi tanggung pengawa ba gerempung Jehovah.—Bacha Masmur 71:18.

4. Nama kebuah sekeda orang tusah deka meri pengawa? (Peda kutak “ Nama Kebuah Kitai Ngasaika Tusah Deka Meri Pengawa.”)

⁴ Endang enda senang ba orang ke ngembuan kuasa meri pengawa ngagai bala lelaki ke biak. Tu ulih ngasuh menyadi Kristian ke lelaki tusah ati mikirka pasal diri ke ngelengkaka pengawa ti balat dikerinduka sida. Sida mega berasai tusah ati ngenang pasal ngelepaska pengawa spesial ti dikerindu sida. Tauka sida irau enti sida enda ngulu ba pengawa nya, pengawa nya enda ulih mujur. Sida engka ngasaika diri nadai awak ngelatih orang bukai. Pia mega, bala lelaki ke biak patut sabar enti sida enda diberi mayuh agi tanggung pengawa.

5. Nama tanya ke deka dikerandauka kitai ba artikel tu?

⁵ Nya alai nama kebuah nya beguna sida ke tuai nulung sida ke biak megai mayuh agi tanggung pengawa? Baka ni sida ke tuai ulih ngereja tu? (2 Tim. 2:2) Lalu nama kebuah sida ke biak patut ngembuan runding ti betul seraya sida sama bekereja enggau bala menyadi Kristian lelaki ke tuai sereta ke bisi mayuh agi peneleba, lalu belajar ari sida? Kena ngepunka randau, aram kitai beratika baka ni Raja David nyediaka anak lelaki iya ke siti pengawa ti besai.

6. Nama deka digaga Raja David? Nama dipadah Jehovah ngagai iya?

⁶ Betaun David diperinsa sereta patut mindah ari endur siti ngagai endur siti. Lalu pengudah iya nyadi raja, iya diau ba istana ke nyamai alai diau. Nya alai iya madah ngagai nabi Natan: ‘Aku diatu diau dalam rumah ti digaga ari kayu sidar, tang Peti Lampang Batu Adat Jehovah disimpan dalam langkau kain.’ David keran deka nirika sebuah rumah sembiang ti manah ke Jehovah. Natan madah ngagai David: ‘Kereja aja utai ti ku ati nuan, laban Petara bisi enggau nuan.’ Tang tu ukai utai ti dikedekaka Jehovah. Jehovah ngasuh nabi Natan madah ngagai David: “Nuan ukai orang ke diasuh Aku ngaga Rumah alai Aku diau.” Taja pan Jehovah besemaya madahka Diri deka seruran enggau David, tang David nemu seiku ari anak lelaki iya ke deka nirika rumah sembiang nya. Baka ni David nerima pekara tu?—1 Ban. 17:1-4, 8, 11, 12; 29:1.

7. Baka ni chara David nerima atur ari Jehovah?

⁷ David amat keran deka nirika rumah sembiang ke Jehovah, nya alai iya tentu berasai asa amat ati. Tang iya agi nyukung projek ke deka dipejalaika anak iya, Solomon. David nulung ngatur bala pekereja sereta ngempuruka besi, tembaga, pirak, emas enggau kayu. Iya enda irau pasal sapa ke deka bulih puji ari pengawa nirika rumah sembiang ke deka dikumbai rumah sembiang Solomon. Tang iya meransang Solomon lebuh nyebut: ‘Nya alai, anak, awakka Jehovah Petara nuan meruan enggau nuan, lalu awakka Iya ngamatka semaya Iya ti deka ngasuh nuan mujur ngaga sebuah Rumah Sembiang nya ke Iya.’—1 Ban. 22:11, 14-16.

8. Nama kebuah David ngumbai Solomon enda layak nirika rumah sembiang nya? Tang nama digaga David?

 ⁸ Bacha 1 Bansa Israel 22:5. David engka ngasaika Solomon bedau sedia megai projek ti besai. Rumah sembiang nya patut “chukup manah,” lalu Solomon “agi biak, lalu nadai peneleba.” Tang David nemu, Jehovah deka nulung Solomon ngereja pengawa ti spesial tu. Nya alai, David enggau naka ulih nulung Solomon nyediaka diri ke projek ti besai nya.

9. Baka ni sida ke tuai ulih gaga ati meri tanggung pengawa ngagai orang bukai? Beri siti chunto.

⁹ Bala menyadi Kristian lelaki ke tuai enda patut berasai lemi semengat lebuh sida meri sekeda tanggung pengawa ngagai bala lelaki ke biak. Semua kitai nemu, utai ke pemadu beguna kemaya hari tu iya nya pengawa ke diberi Jehovah ngagai kitai. Ngelatih bala lelaki ke biak megai tanggung pengawa ulih ngemujurka pengawa ke diberi Jehovah. Perundingka tu. Lebuh nuan agi nembiak, nuan engka beratika apai nuan deriba kerita. Seraya nuan mansang besai, iya nerangka ngagai nuan utai ti digaga iya. Nyau kelama, nuan bulih lisin kerita, lalu berengkah deriba kerita kediri empu. Taja pia, apai nuan agi meri jaku ajar bekaul enggau chara deriba. Kekadang seduai besilih deriba. Tang seraya apai nuan mansang tuai, nuan deka suah agi deriba. Kati apai nuan pedis ati? Enda, iya tentu gaga ati laban nuan ulih mai iya kin kia. Sama mega, bala menyadi Kristian lelaki ke tuai gaga ati meda bala lelaki ke biak ke udah dilatih sida sedia deka megai tanggung pengawa ba gerempung Jehovah.

10. Baka ni asai ati Moses pasal dimuliaka sereta ngembuan kuasa?

¹⁰ Kitai patut bejimat ngambika enda chemburu enggau pengawa ke diterima  orang bukai. Kitai ulih belajar ari ulah Moses lebuh sekeda orang Israel berengkah ngereja pengawa baka nabi. (Bacha Penyampau 11:24-29.) Josua deka nagang sida, tang Moses madahka: ‘Nama kebuah nuan ngiruh diri pasal aku? Naka meh pemadas enti sema Jehovah deka meri roh Iya ngagai semua nembiak Iya, lalu ngasuh semua sida manjung baka nabi!’ Moses nemu Jehovah ke ngiring pengawa nya. Ari ke ngiga mulia ke diri empu, Moses dekaka semua nembiak Jehovah ngembuan pengawa. Baka ni enggau kitai? Kati kitai gaga ati lebuh orang bukai nerima pengawa ari Jehovah?

11. Nama dipadah seiku menyadi Kristian lelaki pasal meri tanggung pengawa ngagai orang bukai?

¹¹ Bisi mayuh bala menyadi Kristian lelaki ke udah bebendar gawa ke Jehovah bepuluh-puluh taun sereta udah ngelatih bala lelaki ke biak megai mayuh agi tanggung pengawa. Ngambika chunto, aram kitai berandau pasal menyadi Kristian lelaki ke benama Peter. Pengelama 74 taun iya semina gawa ke Jehovah aja, iya ngena 35 taun gawa ba pampang opis di Eropah. Iya lama bendar nyadi tuai ti ngemata ba Opis Penginjil. Udah nya pengawa tu diberi ngagai Paul, seiku lelaki biak ke udah dilatih Peter. Kati Peter enda lantang ati enggau ubah tu? Enda. Ku iya madahka: “Aku gaga amat laban bisi bala menyadi Kristian lelaki ke udah dilatih deka nerima tanggung pengawa ke besai agi sereta bejalaika pengawa nya enggau manah.”

12. Nama ulih dipelajarka kitai ari chunto Rehoboam?

¹² Lebuh anak Solomon, Rehoboam nyadi raja, iya minta jaku ajar ari sida ke tuai bekaul enggau chara bejalaika pengawa iya ke baru. Tang udah nya iya enggai nerima jaku ajar sida! Iya nitihka jaku ajar bala lelaki ke biak ke sama serambau enggau iya. Pengawa iya balat ngenusahka. (2 Ban. 10:6-11, 19) Nama ulih dipelajarka kitai? Endang manah minta jaku ajar ari sida ke tuai sereta bisi mayuh agi peneleba ari kitai. Sida ke biak enda patut berasai ditekan ngereja utai ti sama baka ke udah dikereja sida ke tuai nya. Taja pia sida patut bebasaka penemu sida ke tuai nya lalu anang beguai ngumbai chara sida ke tuai nya enda ulih dikena.

13. Baka ni sida ke biak patut sama bekereja enggau sida ke tuai?

¹³ Kekadang sida ke biak diberi tanggung pengawa ngemataka pengawa ke dipegai bala menyadi Kristian lelaki ke tuai sereta ke bisi mayuh agi peneleba. Endang manah enti sida belajar ari sida ke tuai tu. Ari chunto ke disebut kitai tadi, pengudah Paul nganti Peter nyadi tuai ti ngemataka ba opis Betel, ku iya madahka, “Aku minta jaku ajar ari Peter, lalu aku meransang orang bukai ba opis nya ngereja utai ti sama.”

14. Nama dipelajarka kitai ari chara Timoti enggau rasul Paul ke sama begulai gawa?

 ¹⁴ Timoti jauh biak ari rasul Paul, tang seduai iya udah sama begulai gawa betaun-taun. (Bacha Pilipi 2:20-22.) Paul madah ngagai orang Kristian ba Korint: ‘Aku ngasuh Timoti, anak ke tetap ati sereta dikerinduka aku dalam Tuan, nemuai ngagai kita, ngambika iya mai kita ngingatka gaya pengidup aku dalam Kristus, baka ke diajar aku ngagai semua eklisia.’ (1 Kor. 4:17) Ari tu kitai enggau terang nemu, Paul seduai Timoti ulih sama begulai gawa sereta betulung pangan diri. Paul ngena awak ngajar Timoti gaya iya gawa ke Jesus Kristus, lalu Timoti jampat belajar. Paul sayauka Timoti lalu pechaya Timoti ulih ngintu bala menyadi Kristian ba Korint. Bala tuai gempuru ulih neladan rasul Paul seraya sida ngelatih bala lelaki ke bukai ngulu ba eklisia.

15. Baka ni Rome 12:3-5 ulih nulung kitai napi ubah?

¹⁵ Kitai idup ba maya ti ngagitka ati. Gerempung Jehovah di dunya tu benung mansang ba mayuh pekara. Reti nya mayuh utai deka majak berubah. Sekeda ari ubah tu ngachau kitai sereta tusah deka diputarka. Kitai ulih napi tu enti kitai baruh ati sereta betumpu ba utai ti manah ba pengawa ke Perintah Petara, ukai betumpu ba utai ke engka dikedekaka kitai empu. Enti kitai ngereja tu, kitai mengkang beserakup. Paul nulis ngagai orang Kristian ba Rome: “Aku bejaku ngagai genap iku kita: anang ngumbai diri pama [lebih] agi ari ti patut.” Iya udah nya nerangka, sama baka tiap iti perengka tubuh ke bisi guna ti enda sebaka, tiap iku raban ba eklisia bisi ungkup ti enda sebaka.—Rom. 12:3-5.

16. Nama ulih digaga tiap iku orang Kristian kena ngetanka pemaik sereta penyerakup ba gerempung Jehovah?

¹⁶ Semua nembiak Jehovah deka nyukung Perintah Petara sereta ngereja sebarang utai ke diasuh Jehovah kereja sida. Bala menyadi Kristian lelaki ke tuai ulih ngelatih sida ke biak. Bala menyadi Kristian lelaki ke biak ulih megai mayuh agi tanggung pengawa enggau baruh ati sereta basa. Lalu bala menyadi Kristian lelaki ke udah kawin berasai beterima kasih lebuh bini sida besaup enggau sida indah ba maya bisi utai ke berubah. Bala ke indu tu ulih neladan Prisila, ke tetap ati sama gawa enggau laki iya, Akuila.—SKR. 18:2.

17. Jesus ngelatih bala murid iya ngereja nama?

¹⁷ Jesus netapka teladan ti pemadu manah laban sanggup ngelatih orang bukai. Jesus nemu, orang bukai patut neruska pengawa iya. Endang amat, iya nemu bala murid iya enda sempurna. Tang iya pechaya, sida ulih ngerembaika berita manah enggau jauh agi ari ke udah dikereja iya. (Jhn. 14:12) Iya ngelatih sida enggau manah, lalu sida ulih nginjil ba tiap buah menua ke ulih digagai sida.—Kol. 1:23.

18. Nama pengawa ke deka dikemisi kitai jemah ila? Nama pengawa ke dikemisi kitai diatu?

¹⁸ Pengudah Jesus mati, Jehovah ngangkatka iya idup baru lalu meri iya mayuh agi pengawa, nyengkaum kuasa ke “jauh ari atas semua adat enggau pemerintah, kuasa, enggau perintah.” (Eps. 1:19-21) Enti kitai mati nyadi nembiak Jehovah ke tetap ati sebedau Armagedon, kitai deka diangkatka idup baru sereta ngembuan mayuh pengawa ke bisi reti ba dunya baru. Lalu diatu, semua kitai bisi pengawa ti besai, iya nya nusui berita manah sereta nyadika orang murid. Nya alai sekalika kitai tuai tauka biak, tiap iku kitai ulih terus ngereja mayuh pengawa ke Tuan.—1 Kor. 15:58.