Ulih madahka gaya pengidup nuan?

Aku ada ba Amerika Serikat ba taun 1979. Lebuh aku beumur tiga taun, apai indai aku sarak. Indai ngemesaika aku nitihka adat enggau chara orang Judah. Iya mega nganjung aku ngagai yeshiva, tauka sekula Judah. Lebuh aku beumur tujuh taun, kami pindah ngagai Israel pengelama setaun. Dia, aku sekula ba siti komuniti ti dikumbai kibbutz. Udah nya, kami pindah ngagai Mexico.

Taja pan nadai rumah sembiang orang Judah semak rumah endur kami diau, tang aku agi nitih ajar pengarap Judah. Tiap kali hari Sabat, aku deka nunkun dian, macha Torah, lalu besampi ngena siddur, tauka bup sampi. Lebuh ba sekula, aku selalu madah ngagai bala bakih pasal pengarap aku meh ti pemadu dulu bisi. Aku nadai kala macha Sempekat Baru ti nyeritaka pengidup enggau pengawa nginjil Jesus Kristus. Nambahka nya, indai nagang aku macha nya, laban iya irau aku ulih ditesatka.

Nama kebuah nuan berengkah macha Sempekat Baru?

Lebuh aku beumur 17 taun, aku pindah ngagai Amerika Serikat kena ngabiska sekula aku. Seiku bakih aku ti bepengarap Kristian madahka pengidup aku puang enti nadai Jesus.

Aku madah: “Orang ke pechayaka Jesus nya tesat.”

Iya nanya: “Kala nuan macha Sempekat Baru?”

“Enda,” saut aku.

Ku iya: “Enti pia, enda ke nuan benung nyimpulka nya enggau nadai bukti? Baka ni nuan ulih nyimpulka siti utai ke enda ditemu nuan?”

Jaku nya ngachuk ati aku. Ari suba aku ngumbai orang ke meri runding ti nadai bukti nya orang ke beli. Nya alai, aku ngaga pemutus minjau Bup Kudus iya lalu berengkah macha Sempekat Baru.

Nama asai ati nuan pengudah macha nya?

Aku enda nyangka semua Sempekat Baru ditulis orang Judah. Aku nyau nemu Jesus nya seiku lelaki Judah ti manah ati, baruh ati sereta deka nulung orang. Iya mega enda ngambi ulih ba orang bukai. Pengudah nya, aku ngagai librari lalu minjau bup pasal Jesus. Tang aku agi enda andal iya nya Messiah. Bisi orang ngumbai iya Petara—tang tu enda ulih diterima aku. Enti Jesus nya Petara, iya besampi ngagai sapa—diri iya empu? Nambahka nya, Jesus udah mati. Enda patut iya Petara. Bup Kudus madah Petara “meruan belama iya.” *

Nama digaga nuan pengudah nya?

Aku nemu pemendar enda ngasuh charut. Nya alai, aku keran deka ngiga pemendar. Nya meh terubah iya aku besampi enda ngena bup sampi—aku nyabak madahka asai ati aku ngagai Petara. Baru aja aku abis besampi, bisi orang ngetuk pintu aku. Bisi dua iku Saksi-Saksi Jehovah datai betemu enggau aku. Sida meri aku bup pasal Bup Kudus. Pengudah nya, aku berengkah berandau Bup Kudus enggau sida. Lalu aku andal utai ke dipechayaka sida sejalai enggau Bup Kudus. Ambika chunto, Saksi-Saksi Jehovah pechaya Jesus nya ‘Anak Petara’ * lalu “pun semua utai ti udah digaga.” * Sida enda pechaya Jesus sebagi ari Triniti.

Enda lama pengudah nya, aku pulai baru ngagai Mexico. Dia aku terus belajarka Bup Kudus lalu mansik utai ke dipadah Bup Kudus pasal Messiah. Aku tekenyit lebuh aku nemu bisi mayuh utai ti dipadah Bup Kudus pasal Messiah! Tang aku agi kakang ati. Aku berunding: ‘Kati semina Jesus aja ke ngamatka semua jaku ke bisi dalam Bup Kudus?’ tauka ‘Kati iya semina seiku pelakun ke landik nipu orang?’

Nama utai ke ngasuh nuan amat pechaya?

Bala Saksi nunjukka jaku ke dipadah Bup Kudus ke nyaut tanya aku. Ambika chunto, lebih ari 700 taun sebedau Messiah ada, nabi Mikah udah nulis pasal Messiah ke deka ada ba Betlehem Judea. * Kati Jesus ulih milih endur iya deka ada? Tentu enda. Kelimpah ari nya, nabi Isaiah nulis pasal Messiah ke deka dibunuh baka orang jai lalu dikubur enggau orang ti kaya. * Endang amat, Jesus enda ngatur semua utai ke dipadah dalam Bup Kudus tang semua nya dikeamatka ba pengidup iya.

Siti agi bukti ti ngasuh aku andal iya nya, tiris peturun Jesus. Bup Kudus madahka Messiah datai ari peturun Raja David. * Orang Judah nyimpan penerang pasal tiris peturun sida enggau bejimat. Enti Jesus enda datai ari peturn Raja David, munsuh iya tentu ngerembaika utai nya ngambika orang kakang ati! Tang, sida enda ngereja nya laban bukti pasal peturun Jesus enda ulih disakal. Indah mayuh orang ngangauka Jesus nya “Anak David.” *

Kena nemu sapa Messiah, kitai begunaka tiris peturun Judah ari jeman David. Tang semua penerang nya udah lenyau tauka rusak lebuh soldadu Rome ngerusak Jerusalem ba taun 70 M. Reti nya, Messiah enda tau enda ditemu sebedau taun nya ngambika orang ulih ngelala sekalika iya Messiah tauka enda.

Nama asai ati nuan lebuh nemu pasal utai tu?

Ba Ulang Adat 18:18, 19, dia madah Petara deka milih seiku nabi baka Moses. Petara madah “barang sapa enda mendingka jaku ti disebut nabi nya dalam nama Aku, Aku deka ngasuh orang nya betanggungjawapka diri empu.” Pengudah mansik semua jaku ba Bup Kudus, aku andal Jesus ari Nazaret endang nabi nya.