Ulih madahka kami cherita nuan maya agi mit?

Aku ada ba Itali kena taun 1943. Aku enggau bala menyadi aku dibesaika ba siti kampung ti mit. Apai aku orang ke betanam sereta tukang kayu. Apai indai ngemesaika kami ngambika nyadi orang ke bepengarap Katolik ti manah.

Nama kebuah nuan deka nyadi paderi?

Maya agi mit, aku rindu ningaka utai ke diajar paderi ba gerija. Aku rindu amat lebuh ninga nyawa sida sereta meda adat ke digaga ba gerija. Nya alai aku keran deka nyadi seiku paderi. Lebuh aku beumur 13 taun, aku tama ngagai sekula asrama ke ngelatih nembiak lelaki nyadi seiku paderi. Ba dia, kami belajar mayuh agi pasal pengarap Katolik.

Kati sekula nya ngajar nuan Bup Kudus?

Enda. Maya aku beumur 15 taun, seiku pengajar meri aku bup Injil—ke madahka pasal pengidup sereta pengawa nginjil Jesus—aku macha bup tu beberapa kali. Lebuh aku beumur 18 taun, aku ngagai Rome ngambika ulih belajar ba universiti pengarap, ke dikemataka pope. Aku belajar bansa jaku Latin, bansa jaku Gerika, sejarah, penemu mensia, psikologi, enggau teologi. Taja pan kami suah nyebut sekeda ayat lalu ningaka utai ke dibacha ari Bup Kudus ba sembiang Hari Minggu, kami nadai kala belajarka Bup Kudus.

Kati nuan bisi ngajar orang bukai lebuh nuan nyadi tuai sekula pengarap Katolik?

Kebendar iya, aku gawa ba begian ngatur. Tang aku mega ngajar kelas ke bekaul enggau Majlis Vatican Kedua.

Nama kebuah nuan berengkah kakang ati enggau gerija?

Bisi tiga iti utai. Kesatu, gerija bisi kaul enggau politik. Kedua, gerija enda kiruhka penyalah ke digaga bala tuai pengarap sereta orang ke enggau gerija. Ketiga, aku berasai sekeda ajar ari gerija Katolik enda betul. Chunto iya, kati amat Petara ti bepengerindu ngukum orang ke ngereja dosa belama iya pengudah sida mati? Lalu, kati Petara dekaka kitai ngulang sampi beratus kali ngena rosary? *

Udah nya nama utai ke digaga nuan?

Aku nyabak lebuh besampi minta iring ari Petara. Aku mega meli lalu macha Bup Kudus Katolik, ke dikumbai Jerusalem Bible, ke baru dikeluarka dalam bansa jaku Itali. Ba siti pagi hari minggu, dua iku lelaki datai ngagai sekula aku pengudah sembiang Misa. Seduai iya madahka diri Saksi-Saksi Jehovah. Lebih ari sejam kami berandau pasal Bup Kudus sereta chara ngelala pengarap ti bendar.

Kati asai ati nuan pasal sida?

Aku berasai amat alit ati laban seduai iya landik ngena Bup Kudus Katolik aku. Sida mega bejaku enggau andal. Udah nya, seiku da agi Saksi-Saksi Jehovah ke benama Mario datai ngelawa aku ninting hari enam. Enda ngira baka ni gaya mua hari—iya tetap ngetuk pintu sekula aku pukul semilan pagi.

Nama asai ati paderi bukai lebuh sida ngelawa nuan?

Aku mai sida belajar begulai enggau kami, tang sida enda entu beberatka pengawa nya. Taja pia, aku amat gaga ati belajarka Bup Kudus. Aku amat gaga ulih belajar pasal utai ti narit ati ari Bup Kudus. Chunto iya, kebuah Petara nejuka penyai sereta pemerinsa nyadi—lama aku udah berundingka tanya tu.

Kati paderi ke bepangkat tinggi nguji nagang nuan ari belajarka Bup Kudus?

Ba taun 1975, aku ngabas sida ba Rome kena madahka runding diri. Sida nguji ngemetulka aku, tang nadai seiku ari sida ke ngena Bup Kudus. Pengujung iya, kena 9 Januari 1976, aku nulis surat ngagai Rome kena madahka diri enggai agi enggau gerija Katolik. Dua hari pengudah nya, aku ninggalka sekula aku lalu nepan kerita api ngambika ulih enggau gempuru Saksi-Saksi Jehovah. Tu meh gempuru keterubah aku enggau Saksi-Saksi Jehovah. Tang kebendar iya, gempuru ke dilawa aku tu, gempuru besai ke dilawa mayuh eklisia. Semua utai ke dipeda aku, jauh bebida ari gerija. Tiap iku Saksi muka Bup Kudus kediri empu lalu meda ayat Bup Kudus lebuh pencheramah berandauka mayuh macham topik.

Kati ruang bilik nuan setuju enggau pemutus nuan?

Mayuh ari sida balat nyakal aku. Tang, ba maya nya, aku ninga seiku ari menyadi aku belajar enggau Saksi-Saksi Jehovah di Lombardy, siti menua ba begian utara Itali. Nya alai aku pan kin betemu enggau iya. Udah nya bala Saksi ba dia nulung aku ngiga kereja sereta endur diau. Ba taun nya, aku dibaptisa lalu nyadi seiku ari Saksi-Saksi Jehovah.

Kati nuan nesal enggau pemutus nuan?

Aku sigi enda nesal! Aku baru berasai semak enggau Petara. Aku ngelala Iya ari Bup Kudus, ukai ari penemu mensia tauka adat gerija. Diatu aku ulih ngajar orang bukai pasal Petara enggau andal sereta ari ati.