Ba situasi tu, enti lelaki nya kawin baru, eklisia deka ngumbai tikah iya ti lama udah nadai agi, lalu tikah iya ti baru endang sah ari segi undang-undang. Kena meretika kebuah eklisia ulih berunding baka nya, aram kitai beratika utai ti dipadah Jesus pasal sarak enggau kawin baru.

Nitihka Matthew 19:9, Jesus madahka, semina siti aja kebuah laki bini ulih sarak. Ku iya: “Barang sapa muai [‘nyarakka,’ NWT] bini, kelimpah ari bini iya butang, lalu orang nya bebini baru, iya butang.” Ari utai ke dipadah Jesus, kitai nemu (1) laki bini semina ulih sarak ketegal butang, iya nya laki tauka bini nya ngereja ulah seks enggau orang ke ukai kaling pengidup diri (2) enti seiku laki nyarakka bini iya ketegal kebuah ke enda sejalai enggau Bup Kudus lalu bebini baru, iya butang. a

Nitihka utai ti dipadah Jesus, enti laki nya butang lalu nyarakka bini iya, ari segi prinsip Bup Kudus kati iya ulih bibas kawin baru? Enda semesti iya. Enti laki butang, bini ke enda besalah nya ulih ngaga pemutus sekalika iya deka ngampunka laki iya tauka enda. Enti bini enggai ngampunka laki iya lalu sarak nitihka undang-undang, seduai iya ulih bibas kawin baru pengudah surat sarak seduai iya disahka.

Kelimpah ari nya, bini engka milih enggai sarak enggau laki iya lalu ngampunka laki iya. Tang, baka ni enti laki ke butang enggai diampun lalu nyarakka bini iya nitihka undang-undang mensia? Ketegal bini iya sanggup ngampunka laki iya sereta deka neruska tikah seduai iya, laki iya enda ulih bibas kawin baru nitihka prinsip Bup Kudus. Tang enti laki nya keran deka nyarakka bini iya lalu kawin enggau orang bukai, reti nya iya butang baru. Nya alai, bala tuai gempuru ba eklisia patut ngaga baru siti Komiti Pechara kena mutarka penyalah iya.—1 Kor. 5:1, 2; 6:9, 10.

Enti laki nya kawin baru, taja pan nitihka prinsip Bup Kudus iya enda bibas ngereja nya, nama runding eklisia pasal tikah iya ke suba enggau ke baru? Nitihka Bup Kudus, kati tikah iya ti suba agi sah ba mata Jehovah? Kati bini ke enda besalah nya agi ulih mutus deka neruska tikah enggau laki iya? Kati eklisia deka ngumbai laki nya butang ketegal iya kawin baru?

Suba, tikah baru laki nya deka dikumbai butang seagi-agi bini iya ke enda besalah agi idup, bedau kawin sereta enda butang. Taja pia, lebuh Jesus nerangka pasal sarak sereta kawin baru, iya nadai nyebut pasal kaling pengidup ke enda besalah. Tang iya nerangka, laki ke nyarakka bini iya ketegal kebuah ke enda sejalai enggau Bup Kudus lalu udah nya jadi enggau orang bukai, iya deka dikumbai butang. Nya alai, tikah iya ke suba udah enda sah agi.

Enti laki nya nyarakka bini iya lalu kawin baru, pemutus bini ke deka ngampunka laki iya enda diguna agi. Nya alai, bini nya enda ibuh ngaga pemutus ke berat kena ngampunka laki iya ke suba. Nambahka nya, eklisia deka meda tikah  ti baru nya sah, enda bepanggai sekalika bini iya ti lama udah mati, kawin baru, tauka butang. b

Ba chunto atas nya tadi, ketegal laki nya butang, tu ngujungka seduai iya sarak. Baka ni enti laki nya enda butang, tang iya sarak enggau bini iya lalu kawin baru enggau orang bukai? Tauka baka ni enti laki nya butang pengudah iya sarak, lalu kawin baru enggau orang bukai taja pan bini iya ke lama sanggup ngampunka iya? Ari semua chunto tu, laki nya ke nyarakka bini iya lalu kawin baru deka dikumbai butang. Reti nya, tikah seduai iya ke suba udah enda sah agi. Lalu tikah baru laki nya ulih dikumbai sah. Menara Jaga kena 15 November 1979, lambar 32 madahka: “diatu ketegal iya udah kawin baru, iya enda ulih nyarakka bini baru iya lalu enda ulih sepeneka ati pulai baru ngagai bini lama iya, laban tikah ke suba udah nadai agi ketegal pengawa sarak, butang sereta tikah ti baru.”

Ubah ba penerang tu ukai reti iya orang Kristian enda agi ngumbai pengawa tikah nya enda kudus tauka pengawa butang nya ukai dosa ti besai. Enti seiku laki nyarakka bini iya ketegal kebuah ke enda sejalai enggau prinsip Bup Kudus, iya enda bibas kawin enggau orang bukai. Enti laki nya jadi enggau orang bukai, Komiti Pechara deka ditumbuhka ketegal iya butang. (Enti sema indu ke enggau iya jadi nya Saksi Jehovah, indu nya mega deka dipechara ba Komiti Pechara ketegal iya butang.) Taja pan orang engka enda ngumbai seduai iya butang belama iya, tang laki nya enda layak nerima sebarang pengawa ba eklisia dalam timpuh ti lama. Lalu tu nyentukka bala menyadi enda agi pedis ati enggau utai ti enda manah ke dikereja iya suba, tauka nyentukka bala menyadi ulih bebasaka iya baru. Sebedau meri iya sebarang pengawa ba eklisia, tuai gempuru mega deka berunding pasal utai ke benung ditapi bini lama iya sereta bala anak ke ditinggalka iya.—Mal. 2:14-16.

Enti pengawa sarak lalu kawin baru enda sejalai enggau prinsip Bup Kudus, nya ulih mai kesan ti besai. Nya alai, orang Kristian ke bepenemu-dalam patut neladan Jehovah lalu ngumbai pengawa tikah siti atur ti kudus.—P-jar. 5:4, 5; Heb. 13:4.