ARTIKEL DIPELAJAR 6
LAGU 18 Terima Kasih ke Tebus
Beterima Kasih meh laban Jehovah Ngampunka Dosa Kitai
“Petara balat rinduka dunya tu, nya alai Iya meri Anak tunggal Iya.”—JHN. 3:16.
TUJU ARTIKEL TU
Kitai deka ngenalamka agi asai terima kasih kitai laban Jehovah ngampunka dosa kitai. Kena ngereja nya, kitai deka belajarka utai ti udah digaga Jehovah ngambika dosa kitai ulih diampun.
1-2. Baka ni situasi mensia sama enggau situasi nembiak lelaki ke dipadah ba genteran 1?
GAMBARKA siku nembiak lelaki ke bisi apai indai ti kaya. Tang enda memukai, nembiak lelaki nya nerima berita ti ngenusahka ati. Apai indai iya bebadi dalam siti eksiden. Taja pia, bisi berita ti lebih agi ngenusahka ati. Iya nyau nemu apai indai iya udah ngabiska semua duit enggau reta tengkira sida lalu ninggalka iya enggau mayuh utang. Ketegal nya, nembiak lelaki tu nadai bulih duit tauka reta, tang iya patut mayar semua utang apai indai iya. Pia mega, mayuh orang minta iya mayar utang nya enggau lengkas. Kati nembiak nya ulih mayar semua utang nya? Tentu enda!
2 Baka nya mega, situasi kitai nyau sama enggau situasi nembiak lelaki nya. Apai indai kitai ti keterubah, Adam enggau Awa nya mensia ti sempurna sereta diau ba dunya Paradais ti amat manah. (P-kal. 1:27; 2:7-9) Seduai iya ulih idup belama iya enggau ati ti gaga. Taja pia, semua tu berubah lebuh seduai iya bedosa. Seduai iya lenyau dunya Paradais enggau harapan idup belama iya. Nyadi, nama utai ke diberi Adam seduai Awa ngagai semua peturun seduai iya? Bup Kudus madahka: “Dosa tama ke dunya nengah siku orang [Adam], lalu dosa mai pemati. Nya alai, pemati ngelekai ngagai semua orang, laban semua orang bela bedosa.” (Rom. 5:12) Nyadi, Adam meri kitai dosa ke ngujungka semua kitai mati. Dosa ke diterima kitai baka siti utang ti amat besai. Nadai siku pan ari kitai ulih mayar utang nya.—Mas. 49:8.
3. Nama kebuah dosa kitai ulih disemaka baka “utang”?
3 Jesus nyemaka dosa baka “utang.” (Mat. 6:12, nota kaki; Luk. 11:4) Lebuh kitai bedosa, nya baka ke kitai bisi utang enggau Jehovah. Jehovah ulih mejal kitai mayar utang dosa nya. Enti kitai enda mayar utang nya, utang nya semina ulih dibuai lebuh kitai mati.—Rom. 6:7, 23.
4. (a) Enti nadai tulung, nama deka nyadi ngagai semua orang ke bedosa? (Masmur 49:7-9) (b) Dalam Bup Kudus, leka jaku “dosa” ulih merujuk ngagai nama? (Peda kutak “ Dosa.”)
4 Enti kitai bepanggai ba pengering diri empu, kitai sigi enda ulih bulih baru utai ke udah dilenyauka Adam seduai Awa. (Bacha Masmur 49:7-9.) Enti nadai tulung, kitai nadai harapan ke jemah ila tauka peluang diangkatka idup baru. Baka jelu, kitai deka mati lalu enda diangkatka idup baru.—P-jar. 3:19; 2 Pet. 2:12.
5. Baka ni Apai kitai ti bepengerindu udah nulung kitai mayar utang dosa kitai? (Peda gambar.)
5 Perundingka baru nembiak lelaki ke dipadah ba pun artikel tu. Nama asai ati iya enti siku lelaki ti kaya madahka diri deka nulung iya mayar semua utang nya? Nembiak lelaki nya tentu berasai amat beterima kasih lalu nerima pemeri ti gerah jari nya. Baka nya mega, Apai kitai ti bepengerindu, Jehovah, udah meri kitai siti pemeri kena mayar utang dosa ke diulih kitai ari Adam. Jesus madahka: “Petara balat rinduka dunya tu, nya alai Iya meri Anak tunggal Iya, ngambika genap iku orang ke arapka Anak Iya enda dipunaska tang bulih pengidup ti meruan belama iya.” (Jhn. 3:16) Pemeri tu mega muka peluang ngambika kitai tau bulih kaul ti manah enggau Jehovah.
Lebuh Jesus nginjil pasal Berita Manah, iya nusui pasal sifat Jehovah ti ngampun, bepelasarka genselan tebus. (Jhn. 3:16) Udah nya, Jesus sanggup nyerahka nyawa diri ngambika ulih nyediaka tebus nya (Peda genteran 5)
6. Nama deka dikerandauka kitai dalam artikel tu, lalu nama kebuah?
6 Baka ni kitai tau bulih penguntung ari pemeri ti berega tu, ke muka jalai ngambika dosa kitai ulih diampun? Kena nyaut tanya nya, kitai deka berandauka sekeda utai ke dipadah dalam Bup Kudus sereta reti iya. Seraya kitai belematika utai ti udah digaga Jehovah kena ngampun kitai, kitai deka lebih agi beterima kasih ngagai Iya.
JEHOVAH DEKAKA KITAI NYADI KABAN IYA
7. (a) Nama utai bukai ke dilenyauka Adam seduai Awa? (b) Ketegal kitai peturun Adam seduai Awa, nama utai ti amat diguna kitai? (Rome 5:10, 11)
7 Lebuh Adam seduai Awa bedosa, seduai iya ukai semina lenyau peluang idup belama iya. Tang seduai iya mega lenyau kaul enggau Apai seduai iya, Jehovah. Sebedau Adam enggau Awa bedosa, seduai iya sebagi ari ruang bilik Petara. (Luk. 3:38) Tang lebuh seduai iya enda ngasika Jehovah, Jehovah enda ngemendarka seduai iya nyadi sebagi ari ruang bilik Iya agi. Utai tu nyadi sebedau Adam seduai Awa bisi anak. (P-kal. 3:23, 24; 4:1) Nadai siku ari peturun seduai iya, nyengkaum kitai, ulih nyadi sebagi ari ruang bilik Jehovah. Nyadi, kitai begunaka tulung ngambika ulih bebaik enggau Jehovah. (Bacha Rome 5:10, 11.) Reti iya, kitai patut ngembuan kaul ti manah enggau Iya, lalu nyadi kaban Iya. Tang utai ti ngalitka ati, iya nya Jehovah meh ke ngambi inisiatif ngambika utai tu ulih nyadi. Baka ni Iya ngereja nya?
PETARA NYEDIAKA JALAI NGAMBIKA KITAI TAU NYADI KABAN IYA
8. Nama utai ke udah disediaka Jehovah ngambika bala mensia ti bedosa ulih nyadi kaban Iya?
8 Jehovah udah ngaga atur ngambika bala mensia ti bedosa ulih nyadi kaban Iya. Atur nya nyengkaum nyediaka utai ti sama rega enggau utai ti udah dilenyauka Adam. Bup Kudus Begian Jaku Gerika mega madahka chara ke udah disediaka Jehovah ngambika sesiku orang ulih bebaik enggau Iya sereta ngembuan kaul ti manah enggau Iya.—Rom. 3:25.
9. Nama digaga Jehovah ngambika dosa orang Israel ulih diampun?
9 Jehovah nyediaka jalai ngambika dosa orang Israel ulih diampun, lalu sida ulih ngembuan kaul ti manah enggau Iya. Ba menua Israel, Hari Pengampun Dosa diintu ninting taun. Ba hari nya, imam besai deka meri pemeri jelu kena ngarika orang Israel. Endang amat, pemeri jelu aja enda ulih muai dosa orang Israel enggau pengabis iya, laban nyawa jelu enda sebesai rega nyawa mensia. Tang seagi-agi orang Israel ti nesal ati meri pemeri tauka korban ke dipinta Jehovah, Iya sanggup ngampun dosa sida. (Heb. 10:1-4) Pemeri ke diberi maya Hari Pengampun Dosa sereta ba maya bukai nulung orang Israel sedar, sida orang ti bedosa, lalu sida begunaka utai ti berega agi kena muai abis dosa sida.
10. Nama digaga Jehovah ngambika dosa mensia ulih diampun?
10 Nama digaga Jehovah ngambika dosa mensia ulih diampun? Iya ngatur ngambika nyawa Anak Iya ti dikesayau “diserahka sekali aja ke belama iya kena muai dosa mayuh orang.” (Heb. 9:28) Jesus “nyerahka nyawa diri nyadika tebus ke orang mayuh.” (Mat. 20:28) Nama reti tebus?
REGA KE DIBAYAR NGAMBIKA KITAI ULIH NYADI KABAN PETARA
11. (a) Nitihka Bup Kudus, nama kebuah tebus patut dibayar? (b) Sapa ulih mayar tebus nya?
11 Nitihka Bup Kudus, Jehovah mutuska tebus a patut dibayar ngambika dosa kitai ulih diampun, lalu kitai ulih nyadi kaban Iya. Nama rega tebus ke patut dibayar ngambika mensia tau bulih baru utai ti udah dilenyauka Adam? Kingatka, Adam seduai Awa lenyau nyawa ti sempurna sereta enda ulih agi idup belama iya. Nyadi, rega tebus nya patut sama rega enggau utai ti udah lenyau nya. (1 Tim. 2:6) Rega tebus tu semina ulih dibayar siku lelaki dewasa ti (1) sempurna, (2) ulih idup belama iya ba dunya, sereta (3) sanggup nyerahka tauka korbanka nyawa iya ke kitai. Nya baru rega nyawa orang nya ulih mayar rega nyawa ti udah dilenyauka Adam.
12. Nama kebuah Jesus ulih mayar rega tebus nya?
12 Peratika tiga iti kebuah Jesus ulih mayar rega tebus nya. (1) Iya sempurna, lalu “iya enda ngereja dosa.” (1 Pet. 2:22) (2) Ketegal nya, iya ulih idup belama iya ba dunya. (3) Iya sanggup mati, lalu nyerahka nyawa iya ke kitai. (Heb. 10:9, 10) Jesus siku lelaki ti sempurna, sama baka Adam sebedau Adam bedosa. (1 Kor. 15:45) Nyadi, ketegal Jesus mati ke kitai, iya ulih mayar rega ti sama kena nganti utai ti udah dilenyauka Adam. (Rom. 5:19) Nya alai, Jesus nyadi “Adam ke penudi.” Kitai enda agi begunaka mensia ti sempurna ke bukai kena mayar utai ti udah dilenyauka Adam. Jesus mati “sekali aja ke belama iya.”—Heb. 7:27; 10:12.
13. Nama kebuah kitai ulih ngembuan kaul ti manah enggau Jehovah?
13 Nama kebuah kitai ulih ngembuan kaul ti manah enggau Jehovah? Jehovah nyediaka jalai ngambika dosa kitai ulih diampun lalu kitai ulih ngembuan kaul ti manah enggau Iya. Jesus nyerahka nyawa iya ti sempurna kena mayar rega ti setipak ke dosa kitai.—Eps. 1:7; Heb. 9:14.
JEHOVAH NGELEPASKA KITAI ARI DOSA ENGGAU PEMATI, LALU NGUMBAI KITAI LURUS
14. Nama deka dikerandauka kitai diatu, lalu nama kebuah?
14 Nama penguntung ke diulih kitai ari utai ke udah digaga Jehovah? Kena nyaut tanya nya, kitai deka berandauka reti dua iti rambai jaku ke dikena Bup Kudus kena nulung kitai meretika chara kitai tau bulih penguntung ketegal Jehovah ngampunka kitai.
15-16. (a) Dalam Bup Kudus, nama reti leka jaku “ditebus”? (b) Nama kesan tu ke kitai?
15 Bup Kudus madahka, ketegal tebus udah dibayar, kitai udah ditebus tauka dilepaska. Ku Rasul Peter madah: “Kita udah dilepaska [jaku asal, “ditebus”] ari jalai pengidup ke nadai guna ke diulih kita ari aki ini kita, lalu kita nemu utai ke ngelepaska kita ukai utai ke ulih reput, ukai pirak tauka emas. Tang kita udah dilepaska ngena darah Kristus ke berega. Darah iya baka darah anak bedus ke nadai penimpang sereta tuchi.”—1 Pet. 1:18, 19; nota kaki.
16 Ketegal genselan tebus, kitai ulih dilepaska ari dosa enggau pemati, ke ngasuh kitai balat merinsa. (Rom. 5:21) Nya alai, kitai amat beterima kasih ngagai Jehovah enggau Jesus laban nyawa tauka darah Jesus ti berega udah nebus kitai.—1 Kor. 15:22.
17-18. (a) Nama reti iya lebuh kitai dikumbai lurus? (b) Nama penguntung ke diulih kitai ketegal Jehovah ngumbai kitai lurus?
17 Bup Kudus madahka, bala nembiak Jehovah dikumbai lurus. Tu reti iya, Jehovah enda minta kitai mayar dosa ti udah digaga kitai. Taja pan Iya enda minta kitai ngereja nya, tang Iya agi ngetanka standard pengelurus Iya. Iya ngumbai kitai lurus ukai ketegal utai ti udah digaga kitai tauka ketegal Iya setuju enggau dosa ke digaga kitai. Tang Jehovah sanggup ngampun dosa kitai laban kitai ngayanka pengarap ngagai utai ti udah digaga Iya enggau Jesus kena nyediaka tebus ke kitai.—Rom. 3:24; Gal. 2:16.
18 Nama reti tu ba tiap iku kitai? Sekeda ari sida ke dikumbai lurus udah dipilih merintah enggau Kristus ba serega, lalu nyadi anak Petara. (Tit. 3:7; 1 Jhn. 3:1) Semua dosa sida udah diampun magang. Sida baka ke enda kala ngereja dosa nya. Ketegal nya, sida ulih tama ngagai Perintah Petara. (Rom. 8:1, 2, 30) Bisi mega ke bukai ke dikumbai lurus deka idup belama iya ba dunya. Jehovah udah ngampunka dosa sida, lalu sida udah nyadi kaban Iya. (Jas. 2:21-23) Raban orang ti mayuh ke selamat ari Armagedon bisi peluang enda sekali-kali deka mati. (Jhn. 11:26) “Orang ke lurus” enggau “orang ke enda lurus” ke udah mati deka diangkatka idup baru. (SKR. 24:15; Jhn. 5:28, 29) Ba pengujung iya, semua nembiak Jehovah ti ngasi ba dunya deka “bulih pengelepas enggau mulia nyadi anak Petara.” (Rom. 8:21) Kitai enda sabar nganti maya kitai ngembuan kaul tu enggau Apai kitai, Jehovah.
19. Ketegal utai ke udah digaga Jehovah enggau Jesus ke kitai, baka ni situasi kitai berubah nyadi manah agi? (Peda mega kutak “ Atur Jehovah ngambika Dosa Kitai Diampun.”)
19 Endang amat, situasi kitai keterubah iya nadai harapan baka nembiak lelaki ke dipadah tadi. Iya lenyau semua utai, lalu bulih utang ti besai ke enda ulih dibayar iya. Tang Jehovah udah nulung kitai. Situasi kitai berubah laban Jehovah udah nyediaka jalai ngambika dosa kitai ulih diampun, lalu Jesus mayar tebus ke kitai. Ketegal kitai arapka Jesus Kristus, kitai ulih ditebus tauka dilepaska ari dosa enggau pemati. Lebuh Jehovah ngampunka dosa kitai, nya baka ke kitai enda kala ngereja dosa nya. Tang utai ti pemadu penting, iya nya diatu kitai ulih ngembuan kaul ti manah enggau Apai kitai ti bepengerindu, Jehovah.
20. Nama deka dikerandauka kitai ba artikel ke nangkanka tu?
20 Lebuh kitai belematika utai ke udah digaga Jehovah enggau Jesus ke kitai, ati kitai deka penuh enggau asai beterima kasih. (2 Kor. 5:15) Enti nadai tulung ari seduai iya, kitai langsung nadai harapan! Artikel ke nangkanka tu deka ngena sekeda sempama dalam Bup Kudus kena nulung kitai meda, lebuh Jehovah ngampunka kitai, kitai enda ibuh agi terus berasai besalah.
LAGU 10 Puji Jehovah, Petara Kitai!
a Ba sekeda bansa jaku, leka jaku “tebus” disalin enggau rambai jaku ke mai reti “rega nyawa,” tauka “rega ti udah dibayar.”
