1. Nama utai ti diajar Raja Solomon ba Pengajar 7:20?

 RAJA Solomon nulis: “Nadai orang di dunya tu ti nadai kala ngereja utai ti salah.” (P-jar. 7:20) Jaku nya endang sigi amat! Kitai semua bedosa. (1 Jhn. 1:8) Nya alai, semua kitai begunaka pengampun ari Petara sereta orang bukai.

 2. Baka ni asai ati nuan lebuh kaban rapat nuan ngampunka nuan?

² Kati nuan kala ngemediska ati kaban rapat nuan? Ketegal nuan deka terus bebakih enggau iya, nya alai nuan bebendar minta ampun. Baka ni asai ati nuan lebuh iya ngampunka nuan? Tentu nuan berasai nyamai sereta gaga ati!

 3. Nama deka dikerandauka kitai ba artikel tu?

³ Kitai deka Jehovah nyadi Pangan kitai ti pemadu rapat. Tang, kekadang kitai engka nyebut tauka ngereja utai ti ngemediska ati Iya. Taja pia, nama kebuah kitai ulih andal Jehovah keran deka ngampunka kitai? Nama bida iya lebuh Jehovah ngampunka seseiku orang enggau lebuh kitai ngampunka seseiku orang? Lalu sapa deka bulih pengampun ari Petara?

 4. Nama kebuah kitai ulih andal Jehovah sedia deka ngampun?

⁴ Bup Kudus madahka Jehovah seruran sedia deka ngampun. Bisi sekali, Jehovah bejaku ngena seiku melikat ngagai Moses ba Bukit Sinai. Ku Jehovah: ‘Aku tu Jehovah Petara ti kasih sereta siru, lubah ringat, sereta mandangka penetap  ati enggau pengerindu ti besai. Aku deka tetap rinduka beribu-ribu serak lalu ngampun penyai enggau dosa.’ (P-sut. 34:6, 7) Jehovah nya manah ati sereta penuh enggau pengasih. Iya seruran sedia deka ngampunka sida ti bedosa ke udah nesal ati.—Neh. 9:17; Mas. 86:15.

 5. Nitihka Masmur 103:13, 14, penemu Jehovah pasal tiap iku orang meransang Iya ngereja nama?

⁵ Ketegal Jehovah udah ngaga kitai, Iya nemu semua utai pasal kitai. Perundingka tu, Jehovah nemu semua utai pasal tiap iku orang ba dunya tu. (Mas. 139:15-17) Nya alai, Iya ulih meda semua pengelemi kitai. Indah, Iya nemu utai ke kala nyadi ba pengidup kitai ulih ngubah personaliti, tauka ulah enggau runding kitai. Nyadi, utai ti ditemu Jehovah pasal tiap iku orang meransang Iya ngereja nama? Nya deka meransang Jehovah ngayanka pengasih ngagai kitai.—Mas. 78:39; bacha Masmur 103:13, 14.

 6. Baka ni Jehovah nunjukka Diri keran deka ngampun?

⁶ Jehovah udah nunjukka Diri keran deka ngampun. Iya nemu ketegal penyalah Adam, semua kitai bedosa lalu mati. (Rom. 5:12) Kitai enda ulih ngelepaska diri tauka orang bukai ari dosa enggau pemati. (Mas. 49:7-9) Taja pia, Jehovah ngayanka penyiru lalu ngaga atur ngambika kitai ulih dilepaska. Nama digaga Iya? Nitihka John 3:16, Jehovah nganjung Anak Tunggal Iya ngambika nyerahka nyawa diri kena nebus dosa kitai. (Mat. 20:28; Rom. 5:19) Jesus ngarika kitai lebuh iya merinsa lalu mati, kena ngelepaska orang ke arapka iya. (Heb. 2:9) Naka meh penusah ati Jehovah lebuh Iya meda Anak Iya ti dikesayau diperinsa sereta dikemaluka nyentukka mati! Enti Jehovah enggai ngampunka kitai, Iya tentu enda nejuka Anak Iya mati ke dosa kitai.

 7. Nama sekeda chunto ari Bup Kudus pasal orang ke diampunka Jehovah?

⁷ Bup Kudus ngundan mayuh chunto pasal orang ke diampunka Jehovah. (Eps. 4:32) Sapa ke ulih diperundingka nuan? Nuan engka berundingka Raja Manasi. Iya ngereja mayuh dosa ngelaban Jehovah. Iya nyembah petara pelesu sereta meransang orang bukai ngereja utai ti sama. Iya munuh bala anak iya nyadika pemeri tunu ngagai  petara pelesu. Iya indah ngaga engkeramba lalu ngengkahka nya ba rumah sembiang Jehovah. Bup Kudus madahka utai tu pasal Manasi: ‘Iya balat bedosa ngelaban Jehovah, lalu nyungkak Jehovah ringat.’ (2 Ban. 33:2-7) Taja pia, lebuh Manasi nunjukka diri amat nesal ati, Jehovah ngampunka iya. Jehovah indah ngasuh iya nyadi raja sekali agi. (2 Ban. 33:12, 13) Engka nuan mega berundingka Raja David. Iya ngereja mayuh dosa ti besai, nyengkaum ngereja ulah seks enggau bini orang, sereta munuh orang. Tang, lebuh David ngaku dosa diri sereta bebendar nesal ati, Jehovah mega ngampunka iya. (2 Sam. 12:9, 10, 13, 14) Nyadi, kitai ulih andal Jehovah keran deka ngampun. Lalu baka ke deka dipelajarka kitai pengudah tu, chara Jehovah ngampun enda sama enggau chara kitai mensia ngampun orang bukai.

 8. Ketegal Jehovah nya Hakim, baka ni ku chara Iya ngampun?

⁸ Jehovah nya “Hakim ke ngakim semua dunya.” (P-kal. 18:25) Seiku hakim ti manah patut meretika adat, tauka undang-undang enggau manah. Ba senentang tu, Jehovah nya Hakim kitai. Lalu Iya mega ke meri adat ngagai kitai. (Isa. 33:22) Nya alai, nadai seiku pan mensia ulih nentuka utai ti betul enggau salah, manah agi ari Jehovah. Kelimpah ari nya, nama utai bukai ke diguna seiku hakim ti manah? Iya patut nemu semua penerang ti betul sebedau ngaga pemutus. Ketegal tu, Jehovah meh ke pemadu layak nyadi Hakim.

 9. Nama utai ke ditemu Jehovah lebuh deka ngampunka orang tauka enda?

⁹ Jehovah enda sama baka hakim mensia. Iya seruran nemu semua fakta. (P-kal. 18:20, 21; Mas. 90:8) Nambahka nya, Jehovah enda ngakim baka chara mensia ngakim. Tu ketegal, mensia ngakim bepelasarka utai ti dipeda tauka didinga aja. Tang, Jehovah amat meretika kebuah seseiku orang ngereja sesiti utai. Iya nemu, mayuh utai ulih meri kesan ba pengawa ke digaga orang nya baka chara iya dibesaika, pelajar ke diterima iya, utai ti ngelingi ba endur iya dibesaika, sereta keadaan emosi enggau mental iya. Nyadi Jehovah amat meretika ati kitai. Iya amat meretika tuju ati tiap iku orang. Nadai utai ulih dipelalaika ari Jehovah. (Heb. 4:13) Nya alai, lebuh Jehovah ngampunka seseiku orang, tu ketegal Iya nemu semua fakta.

10. Nama kebuah kitai nemu chara Jehovah ngakim nya seruran adil? (Ulang Adat 32:4)

¹⁰ Chara Jehovah ngakim nya seruran adil. Iya enda berat sepiak. Pengampun ari Jehovah enda bepelasarka gamal seseiku orang, pengaya, penuduk tauka pengelandik iya. (1 Sam. 16:7; Jas. 2:1-4) Jehovah mega enda ulih dipejal ngereja sesiti utai. Lalu Iya enda makai suap. (2 Ban. 19:7) Taja pan Jehovah nemu ringat tauka nemu kasihka orang, tang Iya enda ngaga pemutus nitihka asai ati Iya. (P-sut. 34:7) Endang amat, Jehovah nya Hakim ti pemadu badas laban Iya meretika semua utai pasal kitai enggau situasi kitai.—Bacha Ulang Adat 32:4.

11. Baka ni chara Jehovah ngampun bebida ari mensia?

¹¹ Penulis bup Sempekat Lama sedar chara Jehovah ngampun jauh bebida ari mensia. Dalam sekeda ayat, bala penulis ngena siti leka jaku Hebrew kena ngambarka pengampun ari Petara. Siti rujukan madahka: “Leka jaku tu semina dikena ngambarka pengampun ari Petara ngagai sida ke bedosa.  Pengampun ke diayanka mensia ngagai pangan diri bisi taka iya. Leka jaku tu enda dikena ngambarka pengampun ke diayanka mensia.” Semina Jehovah aja bisi hak ngampunka orang ke bedosa ti udah nesal ati enggau pengabis iya. Nama penguntung ke diulih lebuh Jehovah ngampunka kitai?

12-13. (a) Nama utai ke diasaika seseiku orang lebuh iya diampun Jehovah? (b) Pengampun ari Jehovah deka mai penguntung. Tang berapa lama kitai ulih ngasaika penguntung nya?

¹² Lebuh kitai pechaya Jehovah udah ngampunka kitai, kitai deka ngasaika ‘timpuh penyamai.’ Kitai mega deka berasai tenang sereta ngembuan ati ti beresi. Pengampun ke baka tu enda ulih datai ari mensia, tang semina ulih datai ari Jehovah Empu. (SKR. 3:19, Bup Kudus Berita Manah Ka Rebak Diatu) Lebuh Jehovah ngampunka kitai, Iya ngemendarka kitai nyadi pangan Iya baru. Lalu ba Jehovah, tu baka kitai nadai kala bedosa ngagai Iya.

¹³ Pengudah Jehovah ngampunka kitai, Iya enda agi nyalahka tauka ngukum kitai ketegal dosa nya. (Isa. 43:25; Jer. 31:34) Jehovah muai dosa kitai “baka timur ti jauh ari barat.” b (Mas. 103:12) Lebuh kitai berunding enggau dalam pasal pemesai pengampun Jehovah, kitai deka alit ati sereta beterima kasih ke Iya. (Mas. 130:4) Tang sapa ke deka diampun Jehovah?

14. Naka ke diatu, nama udah dipelajarka kitai pasal chara Jehovah ngaga pemutus deka ngampunka orang?

¹⁴ Kitai udah belajar, pengampun ari Jehovah enda bepanggai sekalika penyalah seseiku orang nya besai tauka mit. Pia mega, kitai udah belajar, Jehovah meh ke udah meri Adat ngagai kitai. Iya meh ke udah ngaga semua utai, lalu Iya mega Hakim kitai. Nya alai, Iya ngena semua penemu ke dikembuan Iya lebuh mutuska deka ngampun tauka enda. Tang, nama utai ke diperundingka Jehovah dulu sebedau Iya ngaga pemutus nya?

15. Nitihka Luke 12:47, 48, nama siti utai ke diperundingka Jehovah lebuh deka ngampunka orang?

¹⁵ Siti utai ti diperundingka Jehovah iya nya, sekalika orang nya nemu diri ngereja penyalah tauka enda. Jesus nerangka utai tu  ba Luke 12:47, 48. (Bacha.) Seiku orang engka ngaga pelan kena ngereja utai ti jai taja pan iya nemu Petara begedika pengawa nya. Nyadi, enti iya ngereja utai baka ke udah dipelan nya, iya ngereja dosa ti besai. Jehovah engka enggai ngampunka orang ke baka nya. (Mrk. 3:29; Jhn. 9:41) Kekadang kitai sedar diri benung ngereja penyalah. Enti pia, kati Jehovah deka ngampunka kitai? Au! Laban bisi utai bukai ke deka diperundingka Jehovah sebedau Iya mutuska deka ngampunka kitai.

16. Nama reti nesal ati, lalu nama kebuah nya penting enti kitai deka Jehovah ngampunka kitai?

¹⁶ Bisi siti agi utai ti diperundingka Jehovah. Iya deka meda sekalika orang ke bedosa nya amat-amat nesal ati tauka enda. Nama reti nesal ati? Reti iya, “ngubah runding, ulah enggau tuju ati.” Tu nyengkaum asai ati ti balat tusah sereta asa ati ketegal udah ngereja utai jai, tauka ketegal enda ngereja utai ti betul. Orang ke nesal ati ukai aja tusah ati ketegal penyalah diri empu, tang mega laban kaul iya enggau Jehovah nyadi lemi. Lalu tu ke ngasuh iya bedosa ngagai Jehovah. Taja pia, perundingka baru Raja Manasi enggau David ke udah ngereja dosa ti besai. Jehovah ngampunka seduai iya laban udah nesal ati. (1 Raj. 14:8) Nyadi, Jehovah semina ulih ngampunka kitai enti Iya meda kitai amat udah nesal ati. Tang, kati nya chukup enti kitai semina berasai besalah pasal dosa ke udah digaga kitai? Kebendar iya, agi bisi utai ke patut digaga kitai. c Lalu tu meh utai bukai ke diperundingka Jehovah mega.

17. Nama reti ngaga ubah ba pengidup, lalu nama kebuah nya penting enti kitai deka nyeliahka diri ari ngulang penyalah diri? (Isaiah 55:7)

¹⁷ Jehovah mega beratika sekalika orang ke besalah nya ngaga ubah tauka enda. Ngaga ubah mai reti “nikal baru.” Orang nya patut badu ngereja penyai, lalu berengkah idup nitihka chara Jehovah. (Bacha Isaiah 55:7.) Iya mega patut ngubah chara iya berunding ngambika iya nitihka runding Jehovah. (Rom. 12:2; Eps. 4:23) Iya patut  keran agi badu nitihka runding enggau pengawa iya suba ti jai. (Kol. 3:7-10) Endang amat, enti kitai arapka genselan tebus Jesus, Jehovah ulih ngampunka kitai sereta nuchi dosa kitai. Enti Jehovah beratika kitai bebendar ngubah pengidup kitai, tentu Iya ngasuh kitai nerima penguntung ke datai ari tebus nya.—1 Jhn. 1:7.

18. Nama udah dipelajarka kitai pasal pengampun ari Jehovah?

¹⁸ Aram kitai ngelansa sekeda batang ajar ke udah dikerandauka kitai tadi. Jehovah endang amat rindu ngampunka orang. Nama kebuah kitai ulih pechayaka nya? Kesatu, Iya seruran sedia deka ngampun. Kedua, Iya nemu semua utai pasal kitai. Nya alai, Jehovah aja ke amat nemu enti kitai amat udah nesal ati. Lalu ketiga, Jehovah ngampunka kitai enggau pengabis iya. Lalu ba Jehovah, nya baka kitai nadai kala bedosa ngagai Iya. Ketegal nya, kitai deka bisi ati ti beresi sereta diterima Iya.

19. Nama kebuah kitai ulih gaga ati taja pan kitai enda sempurna lalu enda ulih rari ari ngereja penyalah?

¹⁹ Seagi-agi kitai enda sempurna, kitai enda ulih rari ari ngereja penyalah. Taja pia, penerang ba bup Pemahaman Alkitab, Jilid 2, lamb. 1055 dalam jaku Indonesia ulih ngelantangka ati kitai. Bup nya nerangka: “Ketegal Jehovah penuh enggau pengasih, Iya meretika pengelemi nembiak Iya. Sida enda ibuh terus berasai besalah ke penyalah sida ketegal sida enda sempurna. (Mas. 103:8-14; 130:3) Enti sida enggau naka ulih idup nitihka standard Petara, sida ulih gaga ati. (Plp. 4:4-6; 1 Jhn. 3:19-22).” Endaka penerang tu ngelantangka ati kitai?

20. Nama deka dipelajarka kitai ba artikel pengudah tu?

²⁰ Kitai beterima kasih laban Jehovah sedia deka ngampunka kitai enti kitai nesal ati ke dosa kitai. Tang baka ni kitai ulih neladan Jehovah ke rindu ngampun? Nama utai ti sama entara chara kitai ngampun enggau chara Jehovah ngampun, tang nama utai ke enda sama? Nama kebuah penting kitai patut meretika bida nya? Artikel pengudah tu deka nyaut semua tanya nya.