Pamela nerangka, “Sepemanjai aku berubat, aku berasai takut. Tang lebuh aku besampi ngagai Petara Jehovah, ati aku berasai nyamai agi lalu ulih berunding. Pemedis nya agi bisi, tang sampi nulung aku ngembuan runding ti positif. Lebuh orang bukai nanya pasal pengerai aku, aku nyaut, ‘Enda ga bangat nyamai, tang enda ga aku bangat tusah ati.’”

Amat, kitai enda nganti diri empu sakit baru meh kitai besampi. Enda ngira besai tauka mit, semua kitai napi penguji. Ketegal tu, kitai begunaka tulung kena napi nya. Tang, kati sampi nulung?

Bup Kudus madah: ‘Serahka penusah nuan ngagai Jehovah, lalu Iya deka nyaga nuan. Iya nadai kala nejuka orang ke lurus alah.’ (Masmur 55:22) Ayat tu amat meransang! Nyadi, baka ni sampi ulih ngelantangka ati nuan? Lebuh nuan besampi ngagai Petara enggau chara ti betul, Iya deka meri utai ke diguna kena nuan napi penguji.—Peda kutak “ Penguntung ari Besampi.”