Enti nuan deka ngagai siti endur ke enda kala dituju nuan, nama patut digaga nuan?

1. 1. Bejalai aja nitihka asai ati nuan.

2. 2. Nitihka orang bukai, lalu ngarapka sida nemu pejalai nya.

3. 3. Nitihka utai ke ulih dipechaya, chunto iya GPS, peta, tauka kaban ke ulih dikearapka sereta nemu jalai nya.

Enti kitai milih chara kesatu enggau chara kedua, kitai engka enda datai ba destinasi ke dituju. Enti kitai milih chara ketiga, kitai ulih andal, kitai sigi datai ba destinasi ke dituju.

Pengidup kitai baka siti pejalai ti panjai. Lalu kitai ngarapka pejalai tu mai kitai ngagai pengidup ti gaga ati. Tu bepanggai ngagai dini kitai ngiga iring tauka bantu lebuh kitai ngaga pemutus.

Sekeda ari pemutus kitai nya mit, tang bisi mega pemutus ke digaga nya amat penting ke ulih mai kesan ti amat besai ba pengidup kitai. Pemutus ti besai tu nunjukka runding kitai pasal utai ti betul enggau salah. Pemutus tu mega meri kesan ngagai kitai empu enggau orang ke dikesayauka kitai indah ba timpuh ti lama, enda ngira nya manah tauka enda manah. Pemutus ke disebut tu nyengkaum:

• Seks enggau tikah

• Pengelurus, kereja, enggau duit

• Chara ngemesaika anak

• Chara ngelayan orang bukai

Nama kebuah nuan ulih andal pemutus ke digaga nuan ulih mai pengaga ati ngagai nuan empu sereta diri sebilik nuan?

Tiap iku kitai patut berundingka tanya tu: Nama utai ke ulih nulung aku ngaga pemutus ti manah pasal utai ti betul enggau utai ti salah?

Majalah tu deka nerangka kebuah kitai ulih pechayaka utai ke disebut dalam Bup Kudus pasal utai ti betul enggau salah. Lalu baka ni nya ulih nulung nuan.