KATI NUAN AMAT ULIH MUTUSKA JALAI PENGIDUP NUAN KE JEMAH ILA? Sekeda orang ngumbai pengidup sida udah ditentuka nasit tauka udah diatur lalu sida enda ulih ngaga pemutus ke diri empu. Lebuh sida enda ulih nyapai sekeda juluk ati, sida ngumbai nya pekara ti enda ulih diseliahka. Ku sida: “Nadai ku enggau meh!”

Sekeda asa ati lebuh sida ngasaika diri enda ulih rari ari dunya ti balat nekan sereta enda lurus. Sida engka nguji deka ngasuh pengidup sida manah agi tang utai ke diperambuka sida enda nyadi ketegal perang, jenayah, penusah alam ti ngenyit sereta penyakit. ‘Tusah amat!’ ku sida mansutka sebana diri.

Endang amat, utai ke nyadi ba pengidup ulih balat ngachau utai ke diperambuka nuan. (Pengajar 9:11) Tang ke bendar iya, nuan ulih ngaga pemutus bekaul enggau pengidup nuan jemah ila. Indah, Bup Kudus madahka pengidup nuan jemah ila bepanggai ba pemutus ke digaga nuan. Aram kitai meda nama utai ke dipadah Bup Kudus.

Moses nyadi tuai bansa Israel kelia menya. Sebedau bansa Israel tama ngagai Menua ti Udah Disemaya, dalam nama Jehovah, iya madahka: ‘Aku diatu ngasuh kita milih entara pengidup enggau pemati, entara berekat enggau sumpah. . .. Pilih pengidup. Rinduka Jehovah Petara kita. Titihka Iya, lalu tetap ati arapka Iya.’—Ulang Adat 30:15, 19, 20.

“Aku diatu ngasuh kita milih entara pengidup enggau pemati, entara berekat enggau sumpah . . . Pilih pengidup.”—Ulang Adat 30:19

Amat! Petara ngelepaska orang Israel ari nyadi ulun ba menua Ejip lalu besemaya deka meri sida pengidup ti lantang ba Menua ti Udah Disemaya. Tang sida patut ngereja sekeda utai kena bulih berekat nya. Sida patut milih “pengidup.” Baka ni? Enggau ‘rinduka Jehovah Petara kita. Titihka Iya, lalu tetap ati arapka Iya.’

Diatu, nuan patut ngaga pemutus laban pengidup nuan ke jemah ila bepanggai ba pemutus ke digaga nuan. Enggau rinduka Petara, nitihka Iya sereta tetap ati arapka Iya, nuan deka bulih pengidup ti meruan ba bumi paradais. Tang baka ni kitai ulih ngereja tu?

Pengerindu nya kualiti Petara ti pemadu nyulut. Rasul John nulis: ‘Petara endang pengerindu.’ (1 John 4:8) Ketegal tu, nembiak Petara diperansang: ‘Rinduka Jehovah Petara kita, lalu seruran ngasika semua adat Iya.’ (Ulang Adat 11:1) Kaul enggau Petara Jehovah patut diperansang ngena pengerindu, ukai ketegal kitai takutka Iya tauka semina ngasi pia aja. Nya alai, nama kebuah kitai patut rinduka Iya?

Pengerindu Petara ngagai mensia nya baka pengerindu apai indai ngagai anak sida. Taja pan enda sempurna, apai indai ti ngembuan pengerindu ngajar, meransang, nyukung sereta disiplin anak sida. Tu ketegal sida deka anak sida lantang sereta mujur. Nama utai ti dikearapka apai indai ari anak sida? Sida deka anak rinduka sida, lalu nerima utai ke diajar sida ngambika bala anak sida bulih penguntung. Pia mega, Petara ngarapka kitai ngayanka pengerindu ngagai Iya laban Iya udah meri mayuh utai ke kitai.

Lebuh kitai nitihka Petara, tu nyengkaum belajarka  sereta ngasika utai ke dipadah Iya. Laban kitai enda ulih ninga nyawa Petara enggau nyengala, kitai ngasika Iya lebuh macha sereta nitihka utai ke ditulis ba Jaku Iya, Bup Kudus.—1 John 5:3.

Kena nunjukka penguntung nitihka Petara, bisi sekali Jesus madahka: ‘Mensia enda ulih idup makai roti aja, tang beridup ba genap leka jaku ti pansut ari mulut Petara.’ (Matthew 4:4) Kitai begunaka pemakai kena beridup. Tang penemu pasal Petara beguna agi ari pemakai. Nama kebuah? Raja Solomon madahka: “[Penemu-dalam] deka meri kitai pengelikun baka duit. Penemu-dalam deka ngasuh nuan likun. Nya meh penguntung bisi penemu.” (Pengajar 7:12) Penemu-dalam ari Petara ulih ngelindung kitai diatu lalu nulung kitai ngaga pemutus ti betul ngambika kitai ulih idup belama iya jemah ila.

Kingatka sempama Jesus ke udah diperundingka kitai ba artikel sebedau tu, lebuh iya madahka: “Pintu ti sempit, enggau jalai ti mar, nuju ngagai pengidup, lalu semina mimit aja orang tetemuka iya.” (Matthew 7:13, 14) Enti bisi orang ke semak sereta mengkang nguluka kitai nengah jalai nya, kitai tentu deka bulih penguntung lalu ulih datai ba penyangkai kitai—pengidup ti meruan belama iya. Nya alai kitai bisi kebuah ti manah mengkang semak enggau Petara. (Masmur 16:8) Baka ni kitai ngereja nya?

Ninting hari, mayuh utai ke patut digaga kitai sereta mayuh agi ke deka digaga kitai. Utai nya ulih majak ngasuh kitai kisuk tauka ngelimpangka kitai nyentukka kitai nadai hari deka berundingka pasal peneka Petara. Nya alai Bup Kudus ngingatka kitai: “Idup enggau bejimat, ukai baka orang ke beli, tang baka orang ke bepenemu-dalam. Kena semua peluang kita enggau badas, laban hari tu jai.” (Epesus 5:15, 16) Kitai tetap ati ngagai Petara enti kitai ngemeratka kaul enggau Iya ba pengidup kitai.—Matthew 6:33.

Taja pan nadai utai ti ulih digaga nuan kena ngubah utai ke udah nyadi, nuan ulih milih ngereja utai ke ulih meri pengidup ti manah ba nuan sereta ba orang ke dikesayauka nuan. Bup Kudus nerangka Petara Jehovah nya amat rinduka kitai sereta Iya madahka kitai utai ti dikedekaka Iya. Perundingka utai ke dipadahka nabi Mikah:

‘Jehovah udah madahka ngagai kitai utai ti manah. Utai ti diguna Iya ari kitai nya baka tu: ngereja utai ti lurus, seruran ngayanka pengerindu, lalu diau begulai sejalai enggau Petara kitai enggau ati ti baruh.’—Mikah 6:8.

Deka nuan nerima kangau ari Jehovah ke mai nuan bejalai enggau Iya sereta bulih berekat ti meruan belama iya? Nama pemutus nuan?