Kenyau ari mensia digaga, Petara meri pesan iya nengah bala melikat sereta bala nabi. Nambahka nya, Iya nentuka pesan sereta semaya Iya ditulis. Petara besemaya, jemah ila kitai deka bulih pengidup ti lantang. Kemayaharitu, dini nuan ulih tetemuka semaya Petara tu?

Pesan Petara bisi ditulis ba Bup Kudus. (2 Timoti 3:16) Tang, baka ni chara bala nabi Petara nulis pesan Iya? (2 Peter 1:21) Petara nepuka runding Iya ba penulis, lalu penulis nulis runding Iya. Ngambika chunto, seiku bos engka ngasuh pekereja iya ngarika iya nulis surat. Surat tu ngembuan semua runding sereta iring ari bos nya. Reti iya, surat tu enggi bos nya, ukai pekereja iya. Sama mega, taja pan Petara ngena mensia nulis pesan Iya, tang Iya meh Pengarang ti bendar ba Bup Kudus.

Pesan Petara amat beguna, nya kebuah iya dekaka semua mensia macha lalu meretika nya. Kemayaharitu, “Berita Manah ti meruan belama iya” ulih ditemu ba “semua bansa, raban bansa, jaku enggau menua.” (Pemandang 14:6) Ari berekat Petara, Bup Kudus ulih dibacha penuh tauka sebagi aja, lebih ari 3,000 bengkah bansa jaku. Nya mayuh agi ari semua bup ba dunya.