Ngampun, reti iya enda agi pedis ati tauka ringat ketegal sesiti penyalah. Ngampun, ukai reti iya ngumbai penyalah nya pekara ti mit aja, tauka pepura nadai utai nyadi.

PRINSIP BUP KUDUS: “Sabar enggau pangan diri, lalu ampun pangan diri enti kita bisi enda nyamai ati ngagai pangan diri.”—Kolosi 3:13.

“Enti nuan rinduka seseiku orang, nuan enda betatika pengelemi iya, lalu meda pemanah ke uji digaga iya.”—Aaron.

Enti nuan terus bedendam, tu deka ngachau nuan ari segi fisikal enggau emosi, sereta tikah nuan mega deka bisi penanggul.

“Bisi sekali, aku chukup ringat ngagai laki aku. Taja pan iya minta ampun, aku berasai tusah deka ngampunka iya. Pengujung iya aku ngampunka iya. Tang aku berasai nesal, laban enda ngereja nya tumu agi. Ketegal tu, kaul kami nyau enda rapat.”—Julia.

UJI MEH DIRI

Enti kaling nuan ngemediska ati nuan ba maya bukai, tanya diri empu:

• ‘Kati aku kelalu sensitif?’

• ‘Kati penyalah iya kelalu besai nyentukka iya patut minta ampun? Tauka ulih aku enda ingatka utai nya?’

BERANDAU MEH ENGGAU KALING PENGIDUP NUAN

• Selalu iya, ni pengelama kitai deka ngampunka pangan diri?

• Nama patut digaga kitai ngambika ulih ngampun pangan diri enggau jampat?

TIP

• Lebuh nuan ringat, anang meh nuduh kaling nuan bisi runding ti jai.

• Anang bekira enggau kaling nuan. Ingat meh, “semua kitai bela ngereja mayuh macham penyalah.”—James 3:2.

“Senang agi deka ngampun enti kedua-dua nya besalah, tang tusah agi enti seiku aja ke berupai besalah. Kitai patut amat-amat baruh ati ngampunka orang sereta minta ampun.”—Kimberly.

PRINSIP BUP KUDUS: “Bebaik enggau naka penyampat.”—Matthew 5:25.