Orang ukai semina bepilih mata nitihka menua asal, bansa, tauka bansa jaku. Tang pia mega bepelasarka pengarap, tikas sosial, sereta laki tauka indu. Bisi mega orang ngakim bedudukka umur, pemandai, penimpang, sereta gamal seseiku orang. Tang, sida enda nemu diri.

Kati nuan mega udah kena rampit ulah tu? Mayuh ari kitai senang meda ulah ti bepilih mata ba orang bukai, tang kitai enda nemu diri pan baka nya. Iya ke amat, semua kitai ngembuan ulah tu, enda ngira mimit tauka mayuh. Seiku pakar ke benama David Williams madahka, lebuh seseiku orang ngembuan runding ti enda manah pasal seraban orang, lalu betemu enggau seiku ari raban nya, “taja pan iya enda berasai, tang chara iya begulai enggau orang nya lain.”

Jovica diau ba Eropah Selatan. Ba menua iya mayuh orang bepilih mata ngagai siti raban bansa. Iya ngaku, “Ba runding aku, nadai orang ke manah ba bansa nya. Aku enda nemu diri udah bepilih mata. Ku aku, utai ke ditemu aku pasal sida endang betul.”

Mayuh perintah ngaga undang-undang kena ngurangka ulah ti bepilih mata. Taja pia, ulah tu enda ulih diketuka. Nama kebuah? Laban undang-undang semina nagang ulah orang, ukai runding tauka asai ati orang. Tang ulah ti bepilih mata datai ari runding enggau ati seseiku orang. Kati kitai ulih ngelaban ulah ti bepilih mata tu? Kati asai ati enggau runding ke baka tu ulih suman?