Nama Kaul Cherita pasal Kebun Eden enggau Nuan?

SEKEDA pakar madahka, cherita pasal Kebun Eden enda disukung begian bukai ba Bup Kudus. Ambika chunto, seiku profesor pengarap ke benama Paul Morris nulis tu: “Bup bukai dalam Bup Kudus nadai nyebut pasal cherita Kebun Eden.” Mayuh pakar engka besetuju enggau iya tang kati nya amat?

Kebendar iya, bisi mayuh bup dalam Bup Kudus ke nyebut pasal Kebun Eden, Adam, Awa, enggau ular nya. * Nya alai, lebuh tuai pengarap enggau sida ke bepelajar ti mantah Bup Kudus madahka cherita pasal Kebun Eden enda kala nyadi, sida kebendar iya benung nyerang semua Bup Kudus. Nama kebuah kitai ulih madah bunyi nya?

Kebendar iya, utai ti nyadi ba Kebun Eden bekaul enggau tema Bup Kudus. Ukai semina nya aja, saut ari Bup Kudus ngagai mayuh tanya ba pengidup ulih ditemu lebuh kitai mansik utai ti nyadi ba Kebun Eden. Aram kitai meda sekeda chunto.

● Nama kebuah kitai nyadi tuai sereta mati? Adam enggau Awa ditempa ngambika ulih idup belama iya. Sida semina mati enti sida ngelaban Petara. (Pemungkal 2:16, 17; 3:19) Pengudah sida enda ngasika Petara, sida enda agi sempurna. Ketegal nya, sida mai dosa ngagai peturun sida. Bup Kudus madahka: “Baka dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia, laban semua bela udah bedosa.”—Rome 5:12.

● Nama kebuah Petara nejuka penyai nyadi? Ba Kebun Eden, Sitan nuduh Petara nya pemula ke ngenanka utai ti manah ari utai ti ditempa Iya. (Pemungkal 3:3-5) Kebendar iya, Sitan ngelaban hak Jehovah merintah. Lalu iya mega madahka, mensia ulih nentu kediri empu nama utai ti manah enggau jai. Sayau amat, Adam enggau Awa ningaka jaku Sitan lalu nulak chara Jehovah merintah. Nya alai, Jehovah nejuka siti timpuh ngambika mensia ulih merintah diri empu. Jehovah nemu, tu meh chara ti pemadu manah kena nyaut jaku Sitan. Ketegal nya, penyai majak nyadi laban Sitan enggau pemerintah mensia. Utai tu nyadi baka ke dipadah ba Bup Kudus: Mensia nadai kuasa nentuka jalai pengidup sida.—Jeremiah 10:23.

● Nama tuju Petara ke dunya? Lebuh ba Kebun Eden, Jehovah udah madahka tuju Iya ngagai mensia enggau dunya. Iya ngasuh Adam enggau Awa beranak betelesak lalu ngemenuhka dunya. (Pemungkal 1:28) Tu enggau terang nunjukka Petara deka dunya tu nyadi endur ti manah ke nyadi endur diau peturun Adam enggau Awa ti sempurna. Ba Bup Kudus, tuju Petara tu suah ditandu.

● Nama kebuah Jesus datai ke dunya? Pengawa ngelaban ba Kebun Eden udah mai dosa enggau pemati ngagai Adam, Awa, enggau semua peturun sida. Tang, kitai berasai gaga ati laban Petara udah nganjung Anak Iya nyadika tebus. (Matthew 20:28) Jesus ngasika Petara nyentukka iya mati sereta nyerahka nyawa iya nyadika tebus ke kitai. Nya meh kebuah Bup Kudus ngumbai Jesus “Adam ti penudi.” Asil iya, dosa kitai ulih diampun lalu kitai bisi peluang bulih pengidup ti sempurna ke udah dilenyauka Adam enggau Awa. (1 Korint 15:22, 45; John 3:16) Genselan tebus Jesus nyadi jamin ke nunjukka tuju asal Petara ngagai dunya deka dikeamatka. *

Tuju Petara ke dunya nyata lalu ukai semina jaku ngapa. Kebun Eden amat kala bisi ba dunya lalu Petara deka kitai ngembuan pengidup ti sempurna ba Paradais jemah ila. Kati nuan deka meda Paradais? Saut nya ba nuan empu.—1 Timoti 2:3, 4.

Lebuh Jesus dipantang ba tiang perinsa, iya madah ngagai penjenayah ba sepiak iya: “Nuan deka sama enggau aku di Paradais.” (Luke 23:43, NWT) Taja pan lelaki nya kala ngereja utai ti jai, Jesus meri iya peluang ngambika ulih diangkatka idup baru lalu idup ba dunya Paradais ti manah baka Kebun Eden. Endaka tu nunjukka Jehovah enggau Jesus deka nuan idup ba Paradais jemah ila? Enti nuan deka diau dia, bebendar meh ngelala Petara Jehovah enggau peneka Iya.

[Nota Kaki]

[Kutak/​Gambar]

JAKU BENABI KE BEKAIT ENGGAU TIAP ITI BEGIAN BA BUP KUDUS

“Aku deka ngasuh nuan [ular nya] enggau indu tu begedika pangan diri. Anak iya enggau anak nuan deka seruran bemunsuh enggau pangan diri. Anak iya deka ngeredakka pala nuan, lalu nuan deka mantuk tumbit anak iya.”—Pemungkal 3:15.

Tu jaku benabi Bup Kudus ti keterubah dipadah Petara ba Kebun Eden. Sapa digambarka (1) indu, (2) anak indu nya, (3) ular, enggau (4) anak ular? Nama nyadi pengujung iya?

ULAR

Antu Sitan.—Pemandang 12:9.

INDU

Gerempung Jehovah ke nyengkaum semua melikat ba serega. (Galatia 4:26, 27) Isaiah nyebut jaku benabi pasal “indu” nya ke deka ngadaka bansa Israel rohani.—Isaiah 54:1; 66:8.

ANAK ULAR

Orang ke ngereja peneka Sitan.—John 8:44.

ANAK INDU

Begian besai ari tu iya nya Jesus Kristus ke sebagi ari gerempung Jehovah ba serega. Anak indu tu mega nyengkaum bala menyadi Kristus ke dipilih ngagai serega. Sida deka sama merintah enggau Jesus ba serega. Raban ke dipilih tu bansa Israel rohani, iya nya ‘orang Israel ke nembiak Petara.’—Galatia 3:16, 29; 6:16; Pemungkal 22:18.

TELIH BA TUMBIT

Messiah bulih telih ti pedis tang empas nya enda lama. Tu nyadi lebuh Sitan ngasuh Jesus mati. Tang Jesus diangkatka idup baru.

TELIH BA PALA

Sitan deka bulih telih ti deka ngasuh iya mati. Jesus deka ngerusakka Sitan belama iya. Sebedau nya, Jesus deka ngaduka baru semua utai ti jai ke nyadi ketegal Sitan.—1 John 3:8; Pemandang 20:10.

Kena nemu mayuh agi pasal tema Bup Kudus, peda brosur Bible—Apakah Mesejnya? ke dikeluarka Saksi-Saksi Jehovah dalam jaku Melayu.

[Gambar]

Adam enggau Awa merinsa ketegal dosa seduai iya