Maya aku agi mit, kami sebilik diau semak Leipzig, Jerman Timur. Rumah kami semak garis menua entara Czech enggau Poland. Ketegal kereja apai aku, kami pindah ngagai—Brazil lebuh aku beumur enam taun. Udah nya kami pindah ngagai Ecuador.

Maya aku beumur 14 taun, aku dianjung ngagai sekula asrama ba Jerman. Maya nya apai indai aku ba Amerika Selatan. Nya alai aku patut ngatika diri. Aku bepanggai ba diri empu lalu enda entu berundingka baka ni ulah aku ulih ngachau orang bukai.

Lebuh aku beumur 17 taun, apai indai aku pulai ngagai Jerman. Terubah iya, aku diau enggau sida. Tang aku ngasaika nya tusah deka ngasika sida. Nya alai aku pindah maya aku beumur 18 taun.

Aku nguji ngiga tuju ba pengidup aku. Pengudah meratika gaya pengidup orang bukai, aku ngasaika jalai pengidup ti pemadu manah nya, ngeraun serata dunya ti manah tu sebedau mensia ngerusakka iya.

Aku ninggalka Jerman, lalu nuju ngagai Afrika ngena motosikal. Tang, aku patut pulai ngagai Eropah ngambika ulih ngadu motosikal aku. Udah nya, aku datai ba siti pantai ba Portugal. Dia aku ngaga pemutus deka belayar ngena bot.

Aku enggau siti raban nembiak ke deka belayar meraka Tasik Atlantik. Seiku ari sida nya, Laurie ke deka nyadi bini aku. Keterubah iya, kami belayar ngagai pulau-pulau ba Caribbean. Kami ngetu enda lama ba Puerto Rico, udah nya kami pulai ngagai Eropah. Aku enggau Laurie ngiga sebuah kapal layar ke ulih nyadi endur kami diau. Tang, tiga bulan udah nya, juluk ati kami puntan laban aku patut nyadi soldadu Jerman.

Aku nyadi soldadu tasik pengelama 15 bulan. Aku enggau Laurie kawin maya nya. Kami agi bisi pelan deka raun. Sebedau aku nyadi soldadu, kami meli sebuah kapal. Kami belubah-lubah ngubah kapal nya nyadi kapal layar. Kami berunding deka diau dalam kapal nya seraya kami ngelingi dunya tu. Pengudah pengawa soldadu aku abis, aku betemu enggau Saksi-Saksi Jehovah lalu berengkah belajarka Bup Kudus.

Terubah iya, aku ngasaika diri enda ibuh ngaga mayuh ubah. Aku udah badu nginsap, aku enggau bini aku udah sah nyadi laki bini. (Epesus 5:5) Aku ngasaika pelan kami ke deka ngelingi dunya sereta meda utai ti ditempa Petara nya endang deka ngemuaska ati.

Tang, kebendar iya, aku agi patut ngubah ulah aku. Aku amat sumbung lalu seruran berundingka pengelandik sereta utai ti udah dijapai aku. Aku semina idup ke diri empu aja.

Bisi sekali, aku macha cheramah ke dikenataika Jesus. (Matthew, bagi 5-7) Tang, aku enda meretika utai ti dipadah Jesus pasal pengaga ati. Ambika chunto, iya madahka orang ke lapar enggau aus deka gaga ati. (Matthew 5:6) Aku berunding, baka ni utai tu ulih ngasuh orang gaga ati. Pengudah belajarka Bup Kudus, aku sedar semua kitai bisi utai ti diguna ba pengarap lalu ngambika kitai tau bulih utai nya, kitai enda tau enda baruh ati ngaku diri bisi utai ti diguna ba pengarap. Baka ke dipadah Jesus: “Gaga ati meh orang ke nemu diri begunaka Petara.”—Matthew 5:3, NWT.

Pengudah berengkah belajarka Bup Kudus ba Jerman, aku enggau Laurie pindah ngagai Perancis, lalu udah nya, ngagai Itali. Enda ngira kini penunga kami, kami bisi betemu enggau Saksi-Saksi Jehovah. Aku alit ati laban sida beserakup sereta amat rinduka pangan diri. (John 13:34, 35) Udah nya, aku enggau Laurie dibaptisa nyadi seiku ari Saksi-Saksi Jehovah.

Pengudah dibaptisa, aku enggau naka ulih ngubah pendiau aku. Aku enggau Laurie ngaga pemutus deka belayar nengah benua Afrika lalu meraka Tasik Atlantik ngagai Amerika Serikat. Lebuh belayar, kami dikelingi tasik ti bejuta kilometer pemesai nya. Maya nya, aku baru nemu diri amat mit enti dibandingka enggau Penempa ti pemadu tinggi. Lebuh ba tengah tasik, aku mayuh awak kena macha Bup Kudus. Cherita pengidup Jesus amat besai reti ba aku. Iya sempurna sereta bisi penau ti amat ngalitka ati, tang iya enda sumbung. Ba Jesus orang ke pemadu beguna nya Apai iya ba serega ukai diri empu.

Lebuh beratika teladan Jesus, aku sedar aku patut ngenuluka Perintah Petara. Pengawa bukai enda patut dikemeratka lebih agi ari Perintah Petara. (Matthew 6:33) Lebuh aku enggau Laurie sangkai ba Amerika Serikat, kami mutuska diri deka diau dia lalu ngenuluka sembah kami.

Gaya pengidup aku suba ke betumpu ba diri empu ngasuh aku kurang andal enggau pemutus diri empu. Diatu, aku diiring penemu-dalam ti pemadu tinggi ke enda kala salah. (Isaiah 48:17, 18) Aku mega udah tetemuka tuju pengidup aku empu—iya nya nyembah Petara sereta nulung orang bukai ngelala Iya.

Pengudah nitihka prinsip Bup Kudus, kaul aku enggau Laurie nyadi lebih tegap. Kami gaga ati laban bisi seiku anak indu ke mega ngelala sereta rinduka Jehovah.

Pengidup kami enda seruran senang. Tang enggau bantu ari Jehovah, kami keran deka seruran pechayaka Iya sereta terus bepanggai ba Iya.—Jaku Dalam 3:5, 6.