BAKA NI laki patut ngintu bini iya? Mayuh orang pechaya laki patut nyediaka belanja ke diri sebilik. Taja pia, sekeda bini ke bisi mayuh reta agi enda lantang ati—sereta takut. Chunto, seiku indu bansa Sepanyol ke benama Rosa, madahka pasal laki iya, “Ba luar iya manah enggau orang, tang ba rumah iya jai.” Joy, ari menua Nigeria madahka, “Enti aku enda setuju, laki aku deka nyebut, ‘Nuan patut ngereja semua utai ke dipadah aku, laban aku laki nuan.’”

Baka ni laki bejalaika tanggungjawap iya enggau pengerindu? Nama patut digaga laki kena ngintu ruang bilik ngambika meri pengelantang ngagai bini iya?—Rut 1:9.

Taja pan laki enggau bini sama aja ba mata Petara, Bup Kudus madahka seduai iya sama bisi tanggungjawap ba ruang bilik. Rome 7:2 madahka, indu ke udah belaki “ditanchang adat ngagai laki iya.” Baka gerempung ke milih seiku tuai kena ngemataka semua utai, Petara udah milih laki nyadika tuai atas bini iya. (1 Korint 11:3) Laki patut ngiring ruang bilik iya.

Kita ke laki, baka ni kita ngena penuduk ke diberi Petara? Bup Kudus madahka, “rinduka bini kita, baka Kristus ke rinduka eklisia [gerempung].” (Epesus 5:25) Taja pan Jesus enda bebini, teladan iya ulih nulung kita nyadi laki ke manah. Aram kitai meda.

Jesus deka ngelantang sereta nulung orang bukai. Jesus besemaya ngagai semua orang ke ditekan enggau ke bisi penanggul: ‘Datai ngagai aku . . . lalu aku deka ngasuh kita belelak.’ (Matthew 11:28, 29) Iya suah ngurangka pemerinsa sereta nyediaka utai ti diguna orang ba pengarap. Nya alai, mayuh orang deka semak ngagai Jesus laban sida pechaya iya deka ngurangka pemerinsa sida!

Baka ni laki ulih neladan Jesus. Ngiga chara ngelempungka pengawa bini nuan. Sekeda bini ngasaika utai ti dipadah Rosa: “Aku baka ke nyadi orang gaji laki aku.” Tang seiku lelaki ke benama Kweku madahka,  “Aku selalu nanya bini aku baka ni aku ulih nulung iya. Laban aku sayauka iya, aku selalu nulung iya ngereja pengawa ba rumah.”

Jesus berundingka orang bukai sereta bisi penyinu. Seiku indu ke seranta udah merinsa ketegal penyakit ti ditapi iya pengelama 12 taun. Lebuh iya ninga pasal pengawa ajih ke digaga Jesus, “iya bejaku dalam ati diri, ‘Enti aku negu baju iya, aku deka gerai.’” Tu endang amat. Iya mansang semak ngagai Jesus, negu ujung baju Jesus, lalu iya gerai tekala nya. Sekeda orang ke meda ngumbai indu nya baka ke enda berunding ngereja pengawa, tang Jesus nemu iya nadai daya agi. * Jesus madahka iya enggau manah: “Anak, . . . gerai ari penyakit nuan.” Jesus enda ngemalu tauka nganu iya, tang Jesus nemu pemerinsa iya ketegal penyakit nya. Enggau tu Jesus nunjukka diri—bisi penyinu.—Mark 5:25-34.

 Baka ni laki ulih neladan Jesus. Enti bini nuan sakit, ayanka pengibuh nuan sereta sabar agi enggau iya. Nguji nemu asai ati iya. Chunto, Ricardo nerangka, “Lebuh aku beratika bini aku jampat ringat, aku enggau naka ulih nyeliahka diri ari nyebut utai ti ngasuh iya ringat agi.”

Jesus bejaku enggau murid iya. Jesus madahka mayuh utai ngagai murid iya. Ku iya: ‘Aku udah madah ngagai kita semua utai ti didinga aku ari Apai.’ (John 15:15) Endang amat, kekadang Jesus deka kediri lebuh iya berunding sereta besampi. Tang iya suah bekunsi utai ke ba dalam ati iya enggau murid iya. Malam sebedau iya diukum mati baka orang ke ngereja penyalah, iya terus terang madahka ati iya “balat tusah.” (Matthew 26:38) Kekadang, taja pan pengawa sida ngenusahka ati iya, Jesus enda ngetu bejaku enggau murid iya.—Matthew 26:40, 41.

Baka ni laki ulih neladan Jesus. Bejaku—ari ati enggau runding—ngagai bini nuan. Bini engka madahka laki iya pejaku enggau orang ba luar, tang ba rumah iya enda bemunyi. Peratika, baka ni asai ati Ana maya laki iya madahka runding enggau asai ati diri ngagai iya. Ku Ana: “Aku ngasaika iya amat sayauka aku, lalu aku berasai semak ngagai iya.”

Anang enda bejaku enggau bini enti bisi penanggul. Seiku indu madahka, “Enti laki aku ringat ngagai aku, iya enggai bejaku enggau aku behari-hari. Iya ngasuh aku berasai salah amat sereta enda beguna.” Tang, Edwin nguji neladan Jesus. “Lebuh aku ringat, aku enda ngelaban, tang aku ngiga maya ti ngena endur kami duai berandauka pekara nya.”

Joy, ke disebut ba pun cherita tu, udah meda laki iya berubah pengudah iya belajarka Bup Kudus enggau Saksi-Saksi Jehovah. Joy madahka, “Iya berubah manah agi sereta enggau naka ulih nyadi laki ti bisi pengerindu baka Jesus.” Bejuta iku laki bini bulih penguntung ari ajar Bup Kudus ti sama. Deka nuan belajarka Bup Kudus baka sida? Nuan ulih madah ngagai seiku ari Saksi-Saksi Jehovah enti deka belajarka Bup Kudus enggau pechuma.