Kati penemu ke madahka orang mati deka idup baru enda tau dikearapka? Rasul Paul enda berunding baka nya. Iya nulis: “Enti pengadang kitai dalam Kristus semina ke pengidup kitai di dunya tu aja, reti nya, kami tu patut lebih agi dikesinuka ari semua orang bukai. Tang iya ti bendar, Kristus udah diangkatka ari mati, nyadi orang ke terubah diangkatka idup baru ari bala orang ke udah mati.” (1 Korint 15:19, 20) Ba runding Paul, pengangkat ari mati tau dikearapka. Agi mega, Jesus empu udah diangkatka ari mati. * (Kereja Rasul 17:31) Nya kebuah Paul ngumbai Jesus “orang ke terubah”—iya orang keterubah diangkatka idup belama iya. Enti Jesus nya keterubah, tentu bisi orang bukai mega deka diangkatka idup belama iya.

Ditu siti da agi kebuah nuan tau arapka peluang diangkatka idup baru. Jehovah nya Petara pemendar. ‘Petara . . . enda kala bula.’ (Titus 1:2) Jehovah enda kala bula, lalu Iya sigi enda bula. Kati Iya deka meri semaya pasal pengangkat ari mati, nunjukka Iya ulih ngangkatka orang ari mati, tang udah nya Iya enda ngamatka utai ti disemaya? Tentu enda!

Nama kebuah Jehovah deka ngangkatka orang mati idup baru jemah ila? Laban Iya bisi pengerindu. “Enti orang mati, kati iya ulih angkat idup baru?” ku Jop nanya. “Nuan deka ngangau, lalu aku deka nyaut, lalu Nuan deka gaga ati ke aku, ti udah digaga Nuan.” (Jop 14:14, 15) Jop pechaya Apai iya ti bepengerindu ke di serega keran deka ngangkatka iya ari mati. Kati Petara deka berubah? ‘Aku tu Jehovah, lalu Aku enda berubah.’ (Malaki 3:6) Petara agi keran deka ngangkatka orang mati  idup baru. Iya deka sida gerai sereta lantang ati. Tu utai ti dikedekaka apai indai enti sida lenyau anak ketegal pemati. Endang amat, bida iya, Petara bisi kuasa kena ngereja utai ti dikedekaka Iya.—Masmur 135:6.

Jehovah deka meri Anak Iya kuasa kena ngenataika pengelantang ti besai ngagai orang ke merinsa ketegal lenyau orang ti dikesayau. Lalu baka ni asai ati Jesus pasal pengangkat ari mati? Sebedau ngangkatka Lasarus idup baru, Jesus meda pemerinsa bala menyadi indu Lasarus enggau bala kawan iya, lalu iya “nyabak.” (John 11:35) Kelimpah ari nya, Jesus betemu enggau indu balu ari menua Nain ke udah lenyau anak lelaki iya ketegal pemati. Nya anak tunggal iya. Jesus “sinu ati ke iya, lalu bejaku ngagai iya, ‘Anang nyabak.’” Tekala nya iya ngidupka anak indu nya. (Luke 7:13) Nya alai, Jesus ngasaika pemerinsa ketegal pemati. Naka meh pengaga ati iya lebuh iya muai pemerinsa, lalu nganti iya enggau pengelantang ba serata dunya!

Kala nuan ngasaika pemerinsa nya? Nuan engka ngasaika pemati nya penusah ke enda ulih diputarka. Tang, bisi chara iya. Petara deka ngena Anak Iya ngangkatka orang ari mati. Kingatka, Petara deka nuan nemu chara tu. Iya deka nuan betemu baru sereta merap orang ke dikesayauka nuan. Uji gambarka, kitai badu agi beserara enggau sida, tang ulih begulai ngereja pengawa enggau sida belama iya!

Lionel, ke disebut ba artikel sebedau tu, madahka: “Pengujung iya, aku belajar pasal pengangkat ari mati. Keterubah iya tusah aku deka pechaya. Aku enda pechayaka orang ke madahka aku utai tu. Tang, aku meresa ba Bup Kudus, lalu nemu nya amat! Aku enda sabar deka betemu baru enggau aki aku.”

Deka nuan nemu mayuh agi? Saksi-Saksi Jehovah enggau gaga ati madahka nuan kebuah sida pechayaka peluang pengangkat ari mati ke jemah ila, ngena Bup Kudus nuan empu. *