TOPIK RANDAU | SAPA SAKSI-SAKSI JEHOVAH?
Saksi-Saksi Jehovah Nya Orang Ke Baka Ni?
Kami siti gerempung entarabansa ke nadai kaul enggau raban pengarap ke bukai. Taja pan indu opis kami ba Amerika Serikat, tang mayuh ari Saksi-Saksi Jehovah diau ba menua bukai. Iya ke amat, lebih ari lapan juta iku ari kami ngajar orang Bup Kudus ba lebih ari 230 buah menua. Kami ngereja tu ketegal nitihka jaku Jesus: ‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’—Matthew 24:14.
Enda ngira dini alai kami diau, kami nitihka undang-undang. Tang, kami enggau naka ulih mengkang neutral ba politik. Tu ketegal kami nitihka pesan Jesus ke ngasuh orang Kristian ngambika “ukai enggi dunya.” Nya alai, kami enda enggau pengawa politik tauka nyukung perang. (John 15:19; 17:16) Endang amat, lebuh Perang Dunya II, Saksi-Saksi Jehovah dijil, diperinsa, sereta dibunuh laban sida mengkang neutral. Seiku orang Jerman ke kala nyadi bishop nulis: “Semina sida ke tau dikumbai pemadu bebendar ngetanka pengarap sida maya Third Reich [Nazi Jerman].”
“[Saksi-Saksi Jehovah] ngembuan moral ti amat tinggi. Kitai ulih ngena sida ke enda berundingka diri tu ba pengawa politik ti pemadu tinggi, tang kitai enda kala ulih mai sida megai pengawa tu. . . . Sida ngaku kuasa perintah, tang sida semina arapka Perintah Petara ke ulih mutarka semua penusah mensia.”—Surat kabar Nová Svoboda, Republik Czech
Taja pia, kami enda nyeraraka diri. Jesus besampi ngagai Petara pasal bala murid iya: “Aku ukai minta Nuan ngambi sida ari dunya, tang minta Nuan nyaga sida ari iya ti jai.” (John 17:15) Nya alai nuan ulih meda kami gawa, meli barang sereta besekula ba endur kita diau.
Nuan Engka Rindu Meda Tu
UTAI KE SUAH DITANYA
Nama Kebuah Saksi-Saksi Jehovah Enda Masuk Champur ba Politik?
Kati sida ulih ngachau pengelikun menua?
