Dalam taun 2022, kitai suah ninga berita pasal perang, penanggul ekonomi, sereta bencana alam. Semina Bup Kudus aja ulih nerangka enggau betul nama kebuah utai tu nyadi.

Kebuah utai ke nyadi ba taun 2022

 Utai ke nyadi ba taun 2022 nunjukka kitai endang amat diau ba maya ke disebut Bup Kudus “hari ti penudi.” (2 Timoti 3:1) Timpuh tu berengkah ari taun 1914. Aram beratika nama kebuah utai ke nyadi baru-baru tu sama enggau utai ke dipadahka Bup Kudus pasal jeman kitai:

 “Perang.”—Matthew 24:6.

•   “Ba Taun 2022 Menua Eropah Sekali Agi Ngasaika Kesan ti Balat Ketegal Perang.” a

 “Lapar pungkang.”—Matthew 24:7.

•   “Ba Taun 2022 Lapar Pungkang Balat Nyadi.” b

 “Penyakit berampit.”—Luke 21:11.

•   “Penyakit polio datai baru. Penyakit monkeypox enggau COVID-19 majak balat. Tu nunjukka penyakit berampit amat bahaya, lalu kitai ulih meda mensia amat lemi.” c

 “Utai ti ngenakutka.”—Luke 21:11.

•   “Cuaca angat, musin kemarau ti balat, penusah utan angus enggau ampuh bah. Maya musin panas taun 2022, gaya cuaca balat berubah nyentukka mayuh penusah nyadi ti ngujungka beribu iku orang mati sereta bejuta iku orang di serata dunya lenyau alai diau.” d

 “Penyarut.”—Luke 21:9.

•   “Rayat balat ringat ketegal penanggul ekonomi ke nyadi ketegal inflasi. Nya kebuah mayuh orang angkat ngelaban perintah ba taun 2022.” e

Nama deka nyadi ba taun baru?

 Nadai siku ari kitai ulih nemu utai ti amat-amat deka nyadi ba taun 2023. Tang kitai nemu enda lama da agi, Perintah Petara ke bisi ba serega, deka ngaga ubah ti besai ba dunya tu. (Daniel 2:44) Perintah nya deka muai semua utai ke ngasuh mensia merinsa, lalu nentuka peneka Petara nyadi ba dunya tu.—Matthew 6:9, 10.

 Kami meransang nuan nitihka pesan Jesus, lalu “seruran bejaga” ngambika ulih beratika baka ni utai ke nyadi ba dunya tu benung ngamatka jaku benabi ke bisi ba Bup Kudus. (Mark 13:37) Giga meh kami enti nuan deka nemu mayuh agi baka ni Bup Kudus ulih nulung nuan diatu, lalu baka ni iya ulih nulung nuan enggau diri sebilik bulih harapan ti manah ke jemah ila.