“Ba serata dunya, mayuh kes orang indu dijamah. Penanggul tu patut diputarka enggau jampat,” ku Pertubuhan Kesihatan Sedunia (WHO). Nitihka riput ari WHO, dalam urung 30 peratus, “orang indu dijamah ba fisikal tauka dikachau ba seks ari kaling pengidup sida empu.” Pia mega, Pertubuhan Bangsa-Bangsa Bersatu madahka penyampau orang indu dibunuh tiap hari kira-kira dalam urung 137 iku. Iya ke ngenyinuka ati agi, orang ke ngemediska sida, iya nya kaling pengidup tauka diri sebilik sida empu. a

 Maya kitai meda statistik kes jamah, terang amat, pengawa tu ngirauka mayuh orang. Tang, penyampau ke dipadah tu enda ulih ngambarka pemedis ti ditapi mansa ke kena jamah ba emosi sereta fisikal.

 Kati nuan mega seiku ari mansa ke kena jamah? Tauka, kati nuan ngelala seseiku orang ke kena jamah? Enti pia, jaku peransang ari Bup Kudus tu ulih nulung nuan.

  Nya ukai salah nuan

  Bantu ke disediaka

  Nuan enda kediri aja

  Pemerinsa ketegal kena jamah deka nadai agi

  Chara nulung mansa ke kena jamah

 Peransang ari Bup Kudus: ‘Nya alai, genap iku kitai deka madahka pasal diri empu ngagai Petara.—Rome 14:12.

 Ingat meh: Orang ke nyamah nuan, deka betanggungjawapka pengawa iya empu ngagai Petara.

 Kaling pengidup nuan enda patut nyalahka nuan ketegal pengawa iya. Bini patut dikesayau, ukai dijamah.—Kolosi 3:19.

 Kekadang, orang ke nyamah ngereja penyalah tu ketegal chara iya dibesaika. Tauka, iya engka bisi penanggul ba mental sereta emosi, tauka mega iya enda ulih berunding ketegal balat mabuk. Tang semua kebuah tu, enda ulih nyeliahka iya ari betanggungjawapka pengawa diri empu ngagai Petara. Iya patut berubah ari ulah ti jai nya.

 Peransang ari Bup Kudus: “Enti nuan nadai bulih jaku lalau, pengawa nuan deka puntan.”—Jaku Dalam 15:22.

 Ingat meh: Enti nuan ngasaika diri enda likun, lalu enda nemu nama patut digaga, minta tulung ari orang bukai.

 Nama kebuah tu amat beguna? Dijamah ukai penanggul ti mit. Sebedau nuan ngaga sebarang pemutus, perundingka sekeda pekara ba baruh:

•   Pengelikun nuan empu

•   Pengelikun bala anak nuan

•   Belanja nuan

•   Pengerindu ngagai kaling pengidup naun

•   Pengingin deka ngemetulka kaul enggau kaling pengidup nuan enti iya berubah

 Nuan engka charut runding. Enda nemu nama patut digaga. Sapa ke ulih nulung nuan?

 Kaban tauka diri sebilik ke ulih dikearapka ulih meri tulung ti betul, sereta nulung nuan ba emosi. Lebuh nuan mansutka asai ati ngagai orang ke sayauka nuan, nuan tentu berasai nyamai agi.

 Ngembuan talian bantuan kena nulung mansa ke kena jamah. Enggau jampat minta tulung. Sida ulih madahka nuan, chara nyaga diri ari dikemediska. Enti kaling pengidup nuan ngaku penyalah diri lalu berubah, talian bantuan ke baka nya bisi runding ti manah kena nulung nuan.

 Bantu ke bukai ulih nulung enggau jampat enti nyawa nuan enda likun. Tu nyengkaum bala lutur, indu misi, tauka pakar berubat ke bukai.

 Peransang ari Bup Kudus: ‘Jehovah b diau semak orang ke tusah ati lalu ngidupka sida ke nadai agi pengadang.’—Masmur 34:18.

 Ingat meh: Petara besemaya deka nulung nuan.

 Jehovah amat ibuhka nuan. (1 Peter 5:7) Iya nemu asai ati sereta runding nuan ke enda dipeda orang bukai. Iya ulih meransang nuan nengah Jaku Iya, Bup Kudus. Iya mega mai nuan besampi ngagai Iya. Maya besampi, pinta meh penemu-dalam sereta pengering, kena mutarka utai ti ditapi nuan.—Isaiah 41:10.

 Peransang ari Bup Kudus: “Semua orang deka diau bebaik enggau pangan diri ba sebelah kebun anggur enggau ba madang kayu ara sida, lalu nadai agi orang deka ngemba sida.”—Mikah 4:4.

 Ingat meh: Dalam Bup Kudus bisi semaya, tiap iti ruang bilik deka nyadi endur ti pemadu likun sereta bisi pemaik.

 Semina Petara Jehovah ulih muai semua penanggul kitai belama iya. Dalam Bup Kudus bisi semaya: “Iya deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.” (Pemandang 21:4) Maya nya, semua pengingat ti pait deka diganti enggau pengingat ti manis. (Isaiah 65:17) Tu meh pengadang ke jemah ila, ti amat ngagitka ati kitai. Lalu semua tu bisi dipadah dalam Bup Kudus.